Yobu 19 - Baibuli I Leb Kumam 2013

Kop kame Yobu Odwoko

¹ Yobu oko dwoko be,

² “Iyarunu tidilo ango pi kare arom amene, di icocobunu ango kede kope wu?

³ Itiekunu yeyeto ango tien kede tien, doko da lewic likame mako wu timo na raco.

⁴ Bed bala akadi ka ango atimo raco, raco nango dong keda.

⁵ Wun itingerenu na twatwal, di iwacunu be can kame ango atie iye nyuto raco na.

⁶ Ngeunu be Rubanga en otimo nango raco, di eko luka kede bwoi mere.

⁷ Akadi ka akok be, ‘Kotie neka,’ likame ngatamoro gamo doga; alwongere kitek, do ngolo kop i ateni likame tie.

⁸ Rubanga otieko cego yongayo na tetekeny kur akati, en etieko mino yote kame apoore pi lubo odoko col cucucuc.

⁹ En etieko kwanyo deyo na, eko kwanyo wor da kibuta.

¹⁰ En etuturo ango ki bad dedede di do kop nango tiek; en etieko puto gen na bala yat.

¹¹ En etieko calaro gero mere i koma, etera do bala ngakwor mere.

¹² Isirikalen mege ocokere karacel pi bino sura; kiroko yote pi tuno i koma, di kiko gero kimere gi oluko eema na.

¹³ “Rubanga otieko mino joe na oweka, doko da jo alem onao keda otieko kwina;

¹⁴ joawade kede joawotino na otieko rwenyo ki wanga.

¹⁵ Jo koudo maro welao oda wi gi otieko wil keda; anyira jotic na nena bala kikwia, adoko do bala ngakumbor i wang gi.

¹⁶ Ka alwongo awobi ngatic na, en eling alinga, akadi di abako ne doga benyo.

¹⁷ Dako na likame twero kanyakino ngwece me wei na, imiegu na da likame twero noka.

¹⁸ Akadi idwe da tie kede acae i koma; ka acatakino yai, gin kidonyo yamo kope areco i koma.

¹⁹ Jo adiereson na dedede alem ageno otieko daga, doko da jo alem ango amaro kitek otieko lokere i koma.

²⁰ Ringo koma kede del me koma otieko makakin i cogere na, gi atitidi en pwodi omaka ogenga to.

²¹ “Wun jowota, Okwe bedunu kede kisa i koma, pien cing Rubanga otieko toja.

²² Pinyo komio wuda itienu wapo yora bala kame Rubanga tie timo? Benyo, alola kame imianu pwodi likame oromo wu?

²³ “Okwe koto di oudo kowandiko kope na nogi! Okwe koto di oudo kowandiko gi i itabu da!

²⁴ Okwe koto kogiro kope nogi kede lilim i kom kidi, tetekeny iwandik nogi mok iye atwal nakanaka!

²⁵ Pien ango angeo be Ngakonya tie kuo, doko da i ajikini en ebino pido pira.

²⁶ Akadi bed bala tuwo otieko dudubo del me koma, do ango abino neno Rubanga di pwodi koma noni tie.

²⁷ Ango abino nene kede wanga, wanga bino nene en kikome, likame bobo ngat apat. “Cunya oudo okwanyere pien oudo iwacunu be,

²⁸ ‘Otidilunu en benyo?’ kede be, ‘En nono kame ekelo kop i kome kene.’

²⁹ Do nan miero ilworunu epima, pien gero ka Rubanga mio can kame epima kelo poto, me wek ingeunu be ngolo kop tie.”