Yobu 18 - Baibuli I Leb Kumam 2013

Yamo ka Bildad me Are

¹ Di Bildad dano me Sua oko dwoko be,

² “Yobu, iyaro meede yamo paka awene? Mi wada ber kare me yamo.

³ Pinyo komio itero be wan ocal bala doke? Pinyo komio ineno wan bala jomingo?

⁴ In ngat kame itie wanakino komi keni kede gero nin, iparo be jo poore yai wek lobo pirin, arabo Rubanga remoro mori tenge ki kabedo gi pi cobo mit nin?

⁵ Ateteni koneko etala me ngat arac, mac kame ecwinyo likame rieny.

⁶ Ode bedo col pien mac li kiye, doko da koneko etala atie malo me ode i wie.

⁷ Tien aboco me elato ka etie ot doko cegocego, di iik mege en ako lokere rete.

⁸ Tiene tere ot moko i bwoi, en eoto eko poto i bur.

⁹ Obek mako atitinyo mere, en emoko i owic.

¹⁰ Korieo ne arama piny i lobo, kociko obek i yongayo mere.

¹¹ Lworo bino ne di wok ki bad dedede, di kiko donyo wapo yore di kiriamere kede.

¹² Teko mere tiek, doko da peko tie cuto kure pi rete piny.

¹³ Tuwo dudubo del kome, tuwo arac camo bade kede tiene.

¹⁴ Kobino wane ki ode kame egeno, di oko tere but abaka anyinge To.

¹⁵ Likame tie gimoro kabino dong i ode, kobino onyo mac salupa i paco mere.

¹⁶ En ecal bala yat kame aliasin mege otop, kede da di ajange mege otieko ner.

¹⁷ Likame tie ngat kame bino yutuno en i wi lobo lung, wi jo bino wil kede nyinge.

¹⁸ Kobino remoro en tenge ki kakaler di oko cwane kakacol, di oko riame ki lobo me jo akuo.

¹⁹ Likame ebino bedo tie kede atin amoto akware moro i diere me jo mege, likame tie ngatamoro abino dong kuo i paco mere.

²⁰ Gikame timere ne neko kom jo awok ki tetu tim, doko da emio lworo mako jo awok ki tetu kide.

²¹ Ateteni manono en gikame timere i kabedo me ngat kalikame paro pi Rubanga, i paco me ngat akwia Rubanga.”