Yobu 17 - Baibuli I Leb Kumam 2013

¹ “Cunya otieko kwanyere, ceng na otieko tuno, ates tie cuto kura.

² Ateteni jo atie nywara oluka aluka, wangango tie neno gero kame kitie kede i koma.

³ In cung na imia awoki; kara ngai ace kame twero cungo na?

⁴ Bala kame in itieko cego kede niang gi, kamanono da kur iyei negi kibwona.

⁵ Ngat kame rupao jowote pi mito udo gimoro aber idwe mege wang gi bino to.

⁶ “In imia adoko gi me ayama but jo, ango do en ngat me jo bino di kiko ngulo lau i wange.

⁷ Par omio wanga odoko mwadamwada, doko bada kede tiena dedede ojony bala oweco.

⁸ Jo kopoore ouro manoni, jo ali kede raco moro cuny gi owang i kom jo kalikame paro pi Rubanga.

⁹ Do ngat kopoore meede ameda kede ekite mere, doko da ngat araco moro li i cinge medo doko tek ameda i cunye.

¹⁰ Dokunu cen inyogaunu bobo gikame iwacunu, di likame ako bino udo dano awie tio i diere wu.

¹¹ Ceng na otieko tuno, iik na me gikame cunya mito otieko poto.

¹² Do jowota loko iwor doko iceng; kiwaco be lero otieko noko colo kame ango atie iye.

¹³ Ka ango ageno kabedo me jo oto pi bedo oda, ka ango apeto kabuto na i kabedo acol,

¹⁴ ka ango awaco ne ates be, ‘In en papa na,’ arabo ka awaco ne kudilinge be, ‘Wun ibedunu toto na kede amiegu na,’

¹⁵ gen na do udo tie tuai? Ngai twero neno gikame apoore geno?

¹⁶ Benyo, gen nono bino ot kabedo me jo oto? Ebino upere keda donyo i apua?”