Yobu 16 - Baibuli I Leb Kumam 2013

Yobu Omedo Moko be Raco mere li

¹ Yobu oko dwoko be,

² “Ango atieko winyo kope atot acal kamago; wun jokweicuny amedo ameda kelo peko.

³ Benyo, kope ni kame iraco akony gi li nogo likame jik? Arabo nyo atie rami komio itie meede ameda yamo?

⁴ Koto di komu inononi, koto di itienu i ekite kame ango atie kede, koto ayamo kope atot i komu. Koto ayayango ne wu wia kede kisa.

⁵ Koto kope awok ki doga omio wu nwangcuny, koto kope na okwanyo aramo wu.

⁶ Akadi ka ayamo, aramo na likame kwei, doko da akadi aling alinga, iparunu be aramo noni weka?

⁷ Ateteni Rubanga otieko teko na, etieko joe na dedede.

⁸ En etieko ridakino ango, manoni tie bala ijura anyuto raco na; emia ajony adong cogere kenekene, manoni da nyuto raco na.

⁹ “Cunye daga; enyinyilo ango pi gero mere; emwodo lake i koma pi nyuto gero mere; epedo wange me adagadaga i koma.

¹⁰ Jo junye na, kibabapo lema anywar anywar; kicokere cako yi i koma.

¹¹ Rubanga ojala but jo kalikame paro pire, emia i cing jo areco.

¹² Ango gira oudo atie bedo i mulem, do Rubanga oko nyinyito ango; en emako nguta eko reta di ako ngingidun. Eloka adoko gi mere me alata di epwonyere lato tong;

¹³ ebedo lato na tongini ki bad dedede. Ecobo engalur na paka belo di likame kisa oko make keda da; etuco epiu na oko ony piny.

¹⁴ En eruruco wanakino ango; eringini i koma bala sirikale atie yi.

¹⁵ “Akuo ipukoi atie ngapo di atururo, nan abedo i apua kop obwona atwal atwala.

¹⁶ Nan akok do paka wanga bokere, di del wanga oko doko col,

¹⁷ bed bala ango ali kede tim moro me gero, doko da ilega na cil.

¹⁸ “Okwe lobo, kur imung remo kame ango aonyo; kur iwek koko na kei akea.

¹⁹ Akadi nan da, mujura na tie malo, ngat kame pido pira tie kuno.

²⁰ Ngat kame cungo pira obedo ngawota; ango aonyo pigewanga but Rubanga.

²¹ En ebino pido pira but Rubanga, bala kame dano timo ne kede ngawote.

²² Pien ango adong kede kare acecek, di ako bino yai lubo yongayo atera kakalikame bobo atwero dwogo kiye.