Yobu 13 - Baibuli I Leb Kumam 2013

¹ “Neningo, wanga otieko neno mago dedede, yita otieko winyo mago dedede di ako niang iye da.

² Gikame wun ingeunu ango da angeo; likame iloanu.

³ Do ango amito be ayam kede Won Twer do weko wun; ango amito be apid kede Rubanga.

⁴ Do wun iumunu ateni kede kop me abe; wun dedede ibedunu imuroko akony gi li.

⁵ Ka koto oudo ilingunu alinga, koto jo oneno wu bala jo ariek.

⁶ “Winyunu kong pido na, cikunu yitu ber iwinyunu piem awok ki doga.

⁷ Iparunu be itwerunu yamo kop me abe pi timo ne Rubanga bero? Iparunu be angalo wu twero kelo ne en bero?

⁸ Mam iyarunu cungo ne en? Mam iyarunu pido pire?

⁹ Ka koto Rubanga ongingico kuo wun kiber, iparunu be koto eudo wun ibecunu? Arabo iparunu be itwerunu ngale bala kame dano ngalo kede ngat ocelu?

¹⁰ En eyaro bunano wu, akadi bed bala ikanunu apokapoka atie i cunyu.

¹¹ Mam dwongo mere bino mino wu lworo, di komu ko donyo miel amiela?

¹² Agole wu kony gi li bala buru, piem wu cal acala bala ebuku kame kotimo kede elupe.

¹³ Lingunu di ikounu mina kare me yamo, di do gikame mito timere na ko timere.

¹⁴ Ango atieko yei jalo koma, ayei pi cano kuo na.

¹⁵ Nenunu, en ebino neka; ango ali do kede gen moro; do ango ayaro pwodi pido pira kamanono.

¹⁶ Nwangcuny na bino mina abwot, pien likame tie dano moro arac kame yei piem kede Rubanga.

¹⁷ Cikunu yitu kiber iwinyunu kope na, miunu gikame atie waco dony i yitu.

¹⁸ Ango atieko iiko pido na; ango angeo kiber be kobino wuda abongo raco moro.

¹⁹ “Ngai kabino piem i kom pido na? Ka tie, ango ayei pi ling alinga, doko ayei to da.

²⁰ Rubanga, likame ango abino pwono ki wangi ka in imia jamini are gi:

²¹ wek mina neno can, doko da wek mina bedo kede lworo.

²² Di do in iko cako yamo, di ango ako dwoko, arabo ango en ayami, di in iko dwoko.

²³ Tien adi en kame ango adubo kede? Mia angei gikareco na.

²⁴ “Pinyo komio ikano na wangi, di iko donyo tera bala ngakwor ni?

²⁵ Mam ibino mina lworo, ango ngat arom aroma kede boke kame yamo tero? Kom itie riamere kede cucung acucung.

²⁶ Pien itieko wandiko twon kope areco i koma, itie culo kiton gikareco kame oudo atimo di pwodi atitidi.

²⁷ In itweo tiena kede eriko, itie ngina i kabedo dedede me abeo iye, doko da tic ni en ngino kakame tiena nyono.

²⁸ Imia atieko doko cal acala bala yat otop, acal do bala ekoti me ajekel otieko tutuco.