Yobu 11 - Baibuli I Leb Kumam 2013

Kop me Agege kame Sopar Odwoko ne Yobu

¹ Di Sopar dano me Naama oko dwoko be,

² “Benyo, twon kop arom kano twero kato akata di likame koyamo iye gimoro? Doko da ka dano oduro kop adura, iparo be kotwero waco be eli kede raco moro?

³ Iparo be reberebe me dogi poore mino jo apat lingi? Ka in iyamo anywar anywar, mam kur do ngatamoro mi lewic maki?

⁴ Pien in isidiko be tam nin tie me ateni, doko ibedo dano acil i nyim Rubanga.

⁵ Do koto Rubanga yei yamo, di eko yamo kedi,

⁶ koto ewaco ni mung amakere kede rieko. Pien rieko kotwero neno i yote atot. Pi mano, miero ingei be Rubanga tie mini alola anonok kalamo kame oudo in ipoore udo.

⁷ “Iparo be in itwero mono di iko udo gikame niang iye tek i kom Rubanga? Iparo be in itwero udo ajikini ka Won Twer?

⁸ Ebor kalamo malo, nyo kame in itwero timo iye? Etut kalamo kabedo me jo oto, nyo kame in itwero ngeno iye?

⁹ Epimere eko bedo bor kalamo wi lobo, doko elac kalamo nam adwong.

¹⁰ Ka Rubanga obino di eko maki di eko pidi, ngai kame karuno genge?

¹¹ Pien Rubanga ngeo jo kame kony gi li; ka en eneno gikarac, mam eketo tam mere iye?

¹² Do dano aming bino doko riek kame punda me obar onywalo dano.

¹³ “Do in, Yobu, temuno cunyi, cwai ilega but Rubanga.

¹⁴ Ka lem ibedo dubo, uce do kakabor, doko kur iyei ne tim moro arac bedo i odi.

¹⁵ Di do iko bino tingo wi malo abongo lewic moro; iko bino udo tekcuny di iko bedo abongo lworo.

¹⁶ Di wii ko bino wil kede peko ni bala pii kotieko mol.

¹⁷ Kuo ni ko bino rieny bala ceng arieny i dier iceng; colo mere bino bedo ler bala obai.

¹⁸ Ibino giri bedo abongo lworo, pien udo itie kede gen; kobino gwoki di iko wei mot.

¹⁹ In ibino ot buto di likame ngatamoro ko mini lworo; jo atot bino mito bero moro kibuti.

²⁰ Do jo areco wang gi likame bino twero neno gikame ber, kibino rwenyo yote dedede me bwot, gen kame gin kidong kede kenekene en to.”