Yobu 1 - Baibuli I Leb Kumam 2013

Sitani Otamo Yobu

¹ Bin tie icuo moro anyinge Yobu, kame oudo bedo i lobo me Us. En oudo ebedo dano kame li kede raco moro doko oudo epoore. Oudo elworo Rubanga doko di egwokere likame etimo gimoro arac.

² En bin eko nywalo awobe kanyaare kede anyira adek.

³ Oudo etie kede romini tutumia kanyaare (7,000), aguraguran tutumia adek (3,000), twonin me tic tutumia acel (1,000), pundan tol kany (500), kede jotic atot twatwal. Manoni oko mino Yobu oudo obedo dano kobaro kalamo jo dedede me tetu kide me kunono.

⁴ Awobe ka Yobu oudo maro tedo ibagai i ot me ngat acelacel kare i kare di kilere alea; nakanaka oudo kilwongo amiegu gi adek pi ot cam kede amata kede gi.

⁵ Ingei ebaga acelacel, Yobu oudo lwongo idwe mege di eko timo pwola me lonyo gi. En oudo eyai odiko di eko mino giayala awanga di lubere kede wel gin dedede; pien oudo en ewaco be, “Cengemogo idwe nango odubo di kiko yamo kop moro arac i kom Rubanga i cuny gi.” Manoni oudo obedo gikame Yobu timo nakanaka.

⁶ Ceng moro acel imalaikan oko ot i nyim Rwot, Sitani da oko ot karacel kede gi.

⁷ Rwot oko penyo Sitani be, “In iwok ki tuai?” Sitani oko dwoko ne Rwot be, “Ango oudo abedo wire i wi lobo, di aririmo piny tuni tuni.”

⁸ Rwot oko penye be, “Ibedo tie kede tam moro i kom ngatic na Yobu? Likame tie ngatamoro i wi lobo kame cal bala en, dano ali kede raco moro doko di epoore, dano alwora di egwokere likame etimo gimoro arac.”

⁹ Di Sitani oko waco ne Rwot be, “In iparo be Yobu lwori me nono?

¹⁰ Mam in ibedo gwoke i bad dedede, en karacel kede jo me ode kede jamini dedede kame en etie kede? In imio winyo i kom tice me cinge, di leini mege oko nyai.

¹¹ Do ka nan in icwao cingi di iko kwanyo gi dedede kame en etie kede, en ebino waco kope areco i komi i wangi.”

¹² Rwot oko waco ne Sitani be, “Mano ber, aso nan gi dedede kame en etie kede tie i twer ni, kenekene kur itim nen gimoro arac.” Aso, Sitani oko yai kibut Rwot eoto.

Yobu Okei Idwe kede Abar mege

¹³ Ceng moro acel di idwe ka Yobu oudo tie camo ebaga i ot me awobi adwong,

¹⁴ aor oko bino but Yobu di oko waco ne be, “Twonin oudo tie pur, di pundan camo i nget gi kanono,

¹⁵ jo Seba oko ngoole di kiko yako gin dedede, doko da kiko neneko jotic ni kede epima; ango kena en abwot ine abino waco ni.”

¹⁶ Di pwodi oudo etie yamo, ngatic ace oko bobo bino eko waco be, “Mac ka Rubanga owok ki malo di eko wangaro romini kede jotic ni; ango kena en abwot ine abino waco ni.”

¹⁷ Di pwodi oudo etie yamo, ngatic ace bobo oko bino di eko waco be, “Jo Kaldea opokere i ikodeta adek di kiko bino kiyako aguraguran kitero, di kiko neneko jotic kede epima; ango kena en abwot ine abino waco ni.”

¹⁸ Di pwodi oudo etie yamo, ngatic ace bobo oko bino di eko waco be, “Idwe ni oudo tie camo ebaga i ot me awobi adwong,

¹⁹ di yamo atek oko ngoole bino wok ki wi tim, di eko tuturo isondana ongwon dedede me ot, di ot oko poto i kom gi oneko gi; ango kena en abwot ine abino waco ni.”

²⁰ Yobu oko yai malo di eko nyinyilo ekanso mere. En eko lielo wie di eko riebere piny eko woro Rubanga.

²¹ En ewaco be, “Ango konywala abongo gimoro, doko da kuo na bino yai ki wi lobo abongo gimoro; Rwot en komia, doko da nataman en kame ekwanyo. Poore pak nyinge!”

²² Bed bala gi nogi dedede otimere ne Yobu, do en likame eko timo dub me bunano Rubanga.