Yeremia 9 - Baibuli I Leb Kumam 2013

¹ Okwe koto oudo wia obedo atan me pii, kede wanga oko bedo atan me pigewang, koto akok iceng kede iwor pi jo na kame koneko!

² Okwe koto di oudo atie kede karamoro i wi tim, kima kame jo atie i sapali buto iye, koto aweko jo na di ako gira ot bedo iye! Pien gin kidonyo woro rubangan apat, gin kibedo ekodet me jo acumakino jo.

³ Leb gi yamo kope me abe bala kame yat kame kokudo gweo kede tong me emal; teko gi omeede i lobo gi pi tim kalikame obedo me ateni, do weko pi tice me ateni. Rwot waco be, “Jo na timo tice areco kame lubere aluba, doko da likame kitera bala Rubanga gi.”

⁴ Poore ngat acelacel bed di egwokere i kom ngawote, doko da kur iket gen ni i kom wadu moro; pien wad acelacel mito mano kar ngawote bala bin Yakobo, doko da ngat acelacel tic mere ot dubo nying jowote.

⁵ Gin dedede tic gi ngalo jowot gi, doko likame tie dano ayamo kop me ateni. Gin kitieko pwonyo leb gi yamo kope me abe, doko likame kitwero weko dub.

⁶ Tim gi me tero jo kirac lubere aluba, doko da tim gi me ngalo jo da lubere aluba. Rwot owaco be jo mege otieko kwine.

⁷ Pi manoni, Rwot me jo yi waco be, “Bala kame kotwako kede nyonyo kede mac pi jililo en doko cil, kamanono ada abino keto can alit i kom jo na pi tamo gi kede lonyo gi. Jo na otieko timo dub, nyo apat kame doko ango akaruno timo negi?

⁸ Leb gi cal bala tong me emal me nek; gin tic gi en yamo kop me abe. Gin kiwaco ne jowot gi kope awinyo mit, do cuny gi udo tie kede iik me ngeso dano.

⁹ Mam ango apoore mino gi alola pi tim gi noni? Mam ango apoore culo kwor i kom ateker kacal kamanoni? Ango Rwot en awaco.”

¹⁰ Ango ako waco be, “Abino tururo pi mori, abino koko pi lum me wi tim kame leini camo, pien gin dedede kitieko tuo, doko likame ngatamoro beo kunono. Koko me dok likame winyere iye; winy kede leini otieko ringo tenge kiye.”

¹¹ Rwot waco be, “Abino mino Yerusalem doko atukit me gedo kopopoto, kabuto me ikween; doko abino mino bomban me Yuda doko amejeko, kakame jo li iye.”

¹² Ango ako penyere be, “Rwot, pinyo komio lobo odudubun di kony mere oko doko li bala wi tim, omio likame tie dano moro abeo iye? Ngai kame riek kitek kame twero niang i gi noni? Ngai kame in itieko waco ne kop noni tetekeny eda ewac ne jo apat?”

¹³ Rwot oko dwoko be, “Manoni otimere pien jo odagi lubo iswilia kame ango amio gi. Gin likame kilubo gikame ango awaco negi, akadi bedo i ekite kame ango amito negi.

¹⁴ Do akaka manono, gin kilunyo bedo kede epali di kiko donyo timo gikame cuny gi mito, di kiko donyo woro Baal, bala kame joakwari gi opwonyo gi kede.

¹⁵ Pi manono, ango atie waco be, ango abino mino jogi camo yat akec, abino mino gi kimato pii atie kede poison.

¹⁶ Abino sasaro gi i diere me atekerin kame gin akadi joakwari gi likame ngeo. Doko abino cwano negi yi tuno di aneko gi tieko gi atieka.”

Jo me Yerusalem Okok Kimito Kony

¹⁷ Rwot me jo yi waco be, “Kong tamunu i kom gikame tie timere, ikounu lwongo mon angeo koko; lwongunu mon atie kede diru me koko jo oto.”

¹⁸ Jo oko waco be, “Wacunu negi kisuny bino di kiko wero ne wa wer me koko jo oto, tetekeny pigewang wa moli, di abukewang wa ko diak pi koko.”

¹⁹ Koko tie winyere wok ki Sion be, “Kotieko muducaro wa! Lewic omako wa adikinicel, pien kotieko rereto ude wa, miero do oyai owek lobo wa.”

²⁰ Ango ako waco be, “Okwe wun mon, winyunu kop ka Rwot, cikunu yitu i kom kope kame wok ki doge. Pwonyunu anyira wu wer me koko jo oto, doko di ngat acelacel kibutu ko pwonyo ngawote koko nono.

²¹ To otieko bino i dirisan wa, etieko donyo i miere wa kame kocelo kede apama atek. En eneko idwe wa kame tie i yote me bomba, kede ipongai wa kame tie i atalen.

²² Rwot owaco na pi yamo be, ‘Kom jo oto bino sasarun kabedo dedede bala woyo orade obar, bala ijolong me nino apwodi tie i poto, doko da likame dano moro bino coko gi.’ ”

²³ Rwot waco be, “Jo ariek kur wakere pi rieko gi, akadi jo atek da kur wakere pi teko gi, akadi jo obaro da kur wakere pi abar gi.

²⁴ Ka ngatamoro mito wakere, en epoore wakere pi ngena be ango en Rwot; pien ango atie kede amara kalikame lokere, doko da atimo gi dedede i yore me ateni kede kopoore. Magonogi en gikame yomo cunya. Ango Rwot en awaco.”

²⁵ Rwot waco be, “Kare tie bino kame ango abino mino kede alola but jo kame kokepo;

²⁶ abino mino alola but jo me Misiri, jo me Yuda, jo me Edom, jo me Amon, jo me Moab, kede jo dedede alielo wi gi bedo ler. Pien bed bala jo nogi dedede, ribo kiton jo me Isirael, timo akepo bala gianyuta me isikan gi keda, do kuo gi cal bala jo kalikame kokepo.”