Yeremia 8 - Baibuli I Leb Kumam 2013

¹ “I kare nono cogere me abakai kede jopug me Yuda, kede cogere me josaseredoti, inabin kede jo apat dedede abedo Yerusalem kobino woto ooko ki atesin gi.

² Di do oko sasaro gi kimore i wang ceng, duwe kede acerin dedede atie malo, gikame gin oudo kibedo kede amara but gi di kitimo negi tic; gikame gin kibedo lubo kede mono di kiworo gi; likame kobino coko gi akadi yiko gi; gin kibino bedo bala woyo kame tie malo i wi lobo.

³ Jo apat kodong me ateker arac noni, jo kame bedo i kabedere kame ango asarakino gi iye, bino paro be koto kitoi girgi akaka bedo kuo, ango Rwot me jo yi en awaco.”

Dub kede Alola

⁴ Rwot owaco na pi yamo ne jo be, “Kame dano opoto mam doko eyai malo? Kame dano orwenyo yongayo, mam doko edok cen?

⁵ Do kara pinyo komio wun itienu meede ameda lokere tenge kibuta di iwekanu? Wun imokunu amoka i kom gi me abe, di idagunu dwogo buta.

⁶ Ango abedo ciko yita winyo kope wu, do wun likame iyamunu kope me ateni. Likame tie ngatamoro kame swilaro ki dub mege di koto epenyere be, ‘Nyo arac kame atimo?’ Do wun dedede ngat acelacel tie lubo yongayo mere bala asigira atie ringo aringa ot i yi.

⁷ Akadi etolut da ngeo kare mere me kobo; akadi aweleko, acilagwec kede owalu da lubo kare gi me bino; do jo na, wun likame ingeunu cik kame ango amio wu.

⁸ Benyo benyo kame itwerenu waco kede be wun iriekunu doko ingeunu iswilia na? Nenunu jo kame gonyo iswilia otieko lokoloko gi di kiko wandiko gi me abe.

⁹ Kobino mino lewic mako jo ariek; lworo bino mako gi di oko mamako gi; bala kame gin kitieko dagi kede kop ka Rwot, rieko nyo kame gin kitie kede?

¹⁰ Pi manono, ango abino mino jo apat mon gi, doko da abino mino poti gi but jo anyen. Pien jo dedede, cako kibut jo me ruom apiny tuno kede but jo me ruom amalo, owor mono lim i yore arac. Akadi inabin kiton josaseredoti da tie kede tim me kuwo.

¹¹ Gin kitero aporeso kame tie i kom jo na tukotuko di kiwaco be, ‘Mulem, mulem,’ do di mulem moro li.

¹² Gin oudo kibedo timo tim me lewic, kitimo gikame neno rac; do di likame lewic oko mako gi akadi acel, doko da likame kingeo mino nyim gi bedo luruluru. Pi manono gida kibino bedo i kom jo kame komuducaro; kame ango amio gi alola, manono bino bedo ajikini gi. Ango Rwot en awaco.

¹³ “Ango oudo amito coko jo na bala ngwedo anyakini me olok arabo anyakini me epigi, do gin kiko bedo bala yen ali kede anyakini; akadi pote gi da otieko tuo. Pi manono, ango atieko yei ne jo apat lunyo poto nono.”

¹⁴ Jo ka Rubanga penyere be, “Pinyo kara komio wan pwodi otienu bedo okweunu kom wa? Cokerenu ootunu i bomban kame kocelo kede apama atek, tetekeny ootunu otounu kugonogo. Pien Rwot Rubanga wa otieko ngolo ne wa kop me to; etieko mino wan pii atie kede poison iye pi wan mato, pien wan odubunu bute.

¹⁵ Wan oudo otienu kede gen me udo mulem, do likame gimoro aber oko timere. Oudo ogeno be kobino cango peko wa, do nenunu, olunyunu bedo kede lworo kenekene.

¹⁶ Unyo me asigiran me jokwor wa winyere wok ki Dan; ka asigiran gi odwilao, lobo me Yuda dedede yangere. Jokwor wa tie bino pi dudubo lobo wa lung kede gi dedede kame tie iye, kede pi dudubo bomba wa kede neko jo kame bedo iye.”

¹⁷ Rwot waco be, “Nenunu, ango atie cwano jokwor i diere wu bala twole kalikame gengere; gin kibino kakao wu.”

Cwercuny Yeremia pi Jo mege

¹⁸ Kilel na otiek, atie do kede cwercuny, cunya tie kede tuwo me par.

¹⁹ Winyunu! I kabedo dedede jo na tie koko di kiwaco be, “Benyo, Rwot otieko do weko Sion? Benyo, abaka me Sion do likame tie iye?” Rwot abaka gi oko dwoko be, “Pinyo komio wun iwangunu cunya i yore me woro calini kame kopao, di iworunu rubangan apat?”

²⁰ Jo tie koko be, “Kare me iporo otiek, kare me kac okato, do likame tie alako moro kame otieko udo.”

²¹ Cunya owanakin pi awanon kame jo na tie kede; ango atie kede iturur doko da koma oto.

²² Benyo, yen me amuket likame tie Gilead? Benyo, imuruko likame tie kuno? Do kara pinyo komio likame kocango tuwo kame jo na tie kede?