Yeremia 6 - Baibuli I Leb Kumam 2013

Jokwor Oluko Yerusalem

¹ Wun jo me ekeko ka Benjamin, ringunu pi laro kuo wu! Ringunu tenge ki Yerusalem! Kutunu agwara i Tekoa. Mokunu mac Bet Kakerem pi dunyo yiro pi bedo gianyuta me peko; pien can adwong tie wok ki tetu malo kame bino kelo twon amuducar.

² Bomba me Sion cil kotwero poore kede lum kolibano me kwano leini.

³ Jokwat, magonogo en jokwor mege, bino ot kwano leini gi iye. Gin kibino gero kimere gi lukaro en, di kiko donyo kwat iye, ngat acelacel kakame cunye mito.

⁴ Gin kibino waco be, “Iikerenu ootunu osurunu Sion; yaunu ootunu osurenu i dier iceng!” Do doko di gin kiko bino waco be, “Otienu kede winyo arac, esawa otieko kato, piny otieko yuto, pien tipere me jame otieko doko bocoboco.

⁵ Obinunu sure nat iwor di okounu tuturo apama atek kame kocele kede.”

⁶ Rwot me jo yi ociko jokwor nogo be poore kitotongo yen piny di kiko kumemo kayito i wi apama pi mako bomba. En ewaco be, “Man en bomba kame apoore mino alola. Pien likame tie gimoro apat kame tie iye kwanyo tim me tero jo kirac.

⁷ Bala kame atan lelepo kede pii, kamanono da Yerusalem lelepo tim mege areco. Gikame dano winyo kiye en kop amako tim me gero kede me muducaro. Gikame ango aneno iye nakanaka en aramo kede aporeso.

⁸ Okwe, wun jo me Yerusalem yeunu winyo ikwenyar noni, aso ka li ango abino dagi wu ako weko wu; abino loko bomba wu doko bala ameje, lobo kame jo likame bedo iye.”

Isirael Ngajemo

⁹ Rwot me jo yi owaco na be, “Bala kame ngat kame ngwedo anyakini me olok moo kede jange mege odocon, kamanono ida nyogao mono donge mogo me jo me Isirael tetekeny ilak gi.”

¹⁰ Ango ako dwoko be, “Ngai kame bino yei winyo dwana ka ango ayamo kede gi di akwenyaro gi? Neningo, yit gin otore, likame kiwinyo kop. Kope nin gin kicao acaa, likame cuny gi tie iye.

¹¹ Rwot, gero kame in itie kede i kom gin nono ada atie kede i kom gi, doko da likame atwero meede didio en.” Di Rwot oko waco na be, “Bwot gero nono i kom idwe kame tie i yote me bomba kede i kom ipongai kocokere da; kobino tero cuo kede mon tenge, kiton jo oti da likame bino bwot.

¹² Abino mino jo apat en alunyo ude gi, kiton poti kede mon gi; ango abino mino jo kame bedo i lobo noni alola.

¹³ Jo dedede, cako kibut jo me ruom apiny tuno but jo me ruom amalo tie kede eranga me mito ud i yore arac; akadi kiton inabin kede josaseredoti da tie kwalo jo.

¹⁴ Gin kitero aporeso kame tie i kom jo na tukotuko di kiwaco be, ‘Mulem, mulem,’ do di mulem moro li.

¹⁵ Kibedo timo tim me lewic, kitimo gikame neno rac; do di likame lewic mako gi akadi acel, doko da likame kingeo mino nyim gi bedo luruluru. Pi manono, gida kibino bedo i kom jo kame komuducaro; ka ango amio gi alola, manono bino bedo ajikini gi. Ango Rwot en awaco.”

Isirael Dagi Lubo Gikame Rubanga Mito

¹⁶ Rwot waco ne wun jo mege be, “Cungunu i akarakaran me yote di ikounu ngingio. Penyunu kop i kom yote kasek kede kakame yongayo aber tie iye. Lubunu yongayo nono di ikounu bino udo wei i kuo wu.” Do gin kiko waco be, “Wan likame obino lube.”

¹⁷ Di Rwot oko cwano ne wu jodar piny di eko waco be, “Cikunu yitu kiber i kom koko me agwara bala ikwenyar butu.” Do wun ikounu dwoko be, “Wan likame obino ciko yit wa.”

¹⁸ Pi manono, Rwot waco be, “Winyunu wun atekerin apat, di ikounu ngeno gikame bino timere negi.

¹⁹ Okwe in wi lobo, winyi, ango atie kelo can i kom jogi pi iik gi areco; pien gin kitieko dagi lubo kop na; gin kidagi winyo pwony na.

²⁰ Kony mere nyo kibuta, odok adunya angwe kur kame kokelo ki lobo me Seba, arabo lagara kame kokelo ki lobo abor kame tie kede mo angwe mit me wir? Likame ango abino gamo giamia gin, doko da likame cunya bino bedo yom pi giayala gin.

²¹ Pi manono, neningo, ango abino cibo ne jo nogi kidi i nyim gi, kidi kame bino getaro gi; jonywal kede idwe, awotino karacel kede jokio bino muducar.”

Yi bino Wok ki tetu Malo

²² Rwot waco be, “Neningo, tie jo atie wok ki lobo atie tetu malo; ateker me aura atie kakabor tie iikere pi bino yi.

²³ Gin kimako imalia kede tongini; gin kiger kili kede kisa; buruburu gi winyere bala gunyao me nam, di kiringo kede asigiran. Gin kitieko iikere me cako yi i kom Yerusalem!”

²⁴ Jo me Yerusalem waco be, “Wan otieko winyo rwonge i kom gi, doko cing wa otieko doko lojolojo; otie kede aramo i cuny wa bala dako atie ramere me nywal.

²⁵ Likame wan otwero bobo ot tenge kugo kugo arabo donyo lubo yote, pien jokwor wa otieko mako ipimai me yi; otie do kede lworo i bad dedede.”

²⁶ Rwot waco be, “Okwe wun jo na, ngapunu ipukoi di ikounu bebelo i buru pi iturur. Kokunu kede cwercuny bala dano atie koko wode acel kenekene oto; pien jo kame bino muducaro wu bino suro wu i esawa moroni kenekene.

²⁷ In Yeremia, tam jo na bala kame kotwako kede nyonyo pi tame ka etek, di iko ngingico gi pi niang iponeso gi.

²⁸ Gin kitie kede epali doko da gin jojemo; wi gi tek bala nyonyo buronsi kede ayon. Gin dedede kitie kede tim kalikame poore, doko da tic gi en dubo nying jo.

²⁹ Jo na cal bala nyonyo siliba atie kede cete kame kotie twako pi jililo; akadi bed bala acukut buk yamo kitek di mac ko dop, cete areco likame twero pokere. Kamanono da, raco kame jo na tie kede likame twero kwanyere kibut gi.

³⁰ Kobino donyo lwongo gi be ‘siliba akony mere li,’ pien ango Rwot atieko dagi gi.”