Yeremia 51 - Baibuli I Leb Kumam 2013

Kope Ace kame Rwot Ongolo i kom Babilon

¹ Rwot waco be, “Ango ayaro mino yamo ager kame dudubo jamini buko i kom Babilon kede jo mege.

² Ango abino cwano jokumbor Babilon di gin kiko dudubo en bala cucung kame kopieto tenge. I ceng me timo can i kom Babilon, gin kibino sure ki bad tetu dedede di kiko weke edong nono.

³ Kur imiunu isirikalen me Babilon kare me gweno imalia gi, arabo me ngapo igoen me gano kom gi. Kur iwekunu awobe gi atino. Muducarunu isirikalen gi dedede.

⁴ Gin kobino wawano gi di kiko totoun i yote me bomban gi.

⁵ Ango Rubanga, Rwot me jo yi, likame atieko jalo Isirael kede Yuda, bed bala i kabedere dedede me lobo gi, gin kitie kede raco me dub i nyima, ango Ngat Kacil me Isirael.

⁶ Ringunu tenge ki Babilon! Ngat acelacel marao kuo mere! Kur nek wu pi dub me jo me Babilon. Kare otieko tuno me ango timo onyanga; ango atie mine alola kame poore kede.

⁷ Babilon oudo cal bala ikopo me saabu kame tie i cinga; en oudo emio jo me wi lobo lung omer. Atekerin omato bwini mere di wi gi oko dubere.

⁸ Babilon oyotoyot otieko poto di eko ngingidun; kokunu pire! Kelunu yat me muketo aporeso mege; cengemogo eromo cango.

⁹ Jokumbor kame oudo bedo kunono owaco be, ‘Wan otamo muketo Babilon, do likame eko karuno cango. Owekenu di okounu girwa dok i pinye me tur wa. Alola kame komio Babilon rac twatwal; rwonge mere oromo lobo lung, doko mor me poto mere otieko winyere i idoun.’ ”

¹⁰ Do jo me Isirael kede Yuda waco be, “Rwot otieko nyuto be wan oli kede kop moro arac; bianu ootunu otatamunu i Sion gikame Rwot Rubanga wa otieko timo.”

¹¹ Rwot otieko keto i cuny abakai me Mede mit me yi kede Babilon, piento iik mere tie pi muducaro en. Manono en kite kame en ebino nyango kede tempulo mere. Jotel me isirikalen kame tie sure mio isirikalen cik be, “Penunu imalia wu! Kwanyunu ibukui wu ikounu bedo di iikerenu!

¹² Sipunu imendera kame nyuto ne jo cako suro cel me Babilon! Medunu isirikalen jodar! Cwaunu isirikalen ot dar kabedere apapat me yote! Ketunu isirikalen but di kipwono pi suro gi!” Rwot otieko timo gikame en oudo ewaco be ebino timo ne jo me Babilon.

¹³ Wun jo kame ibedunu i nget icileta atot atota, di ibarunu, ajikini wu otieko tuno, kotieko coto atima me kuo wu.

¹⁴ Rwot me jo yi otieko kwongere be ateteni en ebino kelo isirikalen kame tot bala obonyo pi suro Babilon, di gin kiko bino ikuk i wi wu.

Wer me Pako Rubanga

¹⁵ Rwot en kotimo lobo kede twer mere; en esipo piny kede rieko mere, doko eyararo malo kede niang mere.

¹⁶ Ka en ewaco dwane, pii kame tie malo kururo; en ekelo idoun ki ajikini me wi lobo. En emio kot meny, di eko cwano yamo ki ude mege me kano gi.

¹⁷ Do jo dedede ming, doko kili kede ngec; jo kame timo caljwogi lewic mako gi; pien rubangan kobedo cal kame gin icweo obedo gi me abe, doko likame kikuo.

¹⁸ Kony gi li, kibedo gikame kopoore bedo kede acae i kom gi; kibino amuducar i kare kame Rwot bino kelo kede alola i kom gi.

¹⁹ Rubanga ka Yakobo likame cal bala gin; en ebedo ngat kocweo gi dedede, di eko yero ateker me Isirael pi bedo jo mege amake. Nyinge en Rwot me jo yi.

Enyondo ka Rwot

²⁰ Rwot waco be, “Babilon, in en enyondo nango, gi me yi na. Ango oudo atio kedi me nyonyoto atekerin kede ajakanuto,

²¹ doko atio kedi me neko asigiran kede jo kame oudo ringo kede gi; atio kedi da me dudubo cabalan kede me neko jo kame oudo ringo kede gi;

²² atio kedi me neko mon kede cuo; atio kedi me neko cuo oti kede ipongai; atio kedi me neko awobe kede anyira;

²³ atio kedi me neko jokwat kede romini gi; atio kedi me neko jopur kede twonin gi, atio kedi me neko jopug kede jotic adongo.”

Alola kame kobino Mino Babilon

²⁴ Rwot waco be, “Ibinunu neno di ango atimo onyanga i kom jo me Babilon pi gikareco dedede kame gin kitimo i Sion.

²⁵ Babilon, in ical bala moru amuducaro lobo lung, do ango ayaro maki di ako mini ibebelo lor piny ki wi moru, di ako weki di itieko doko buru.

²⁶ Likame tie kidi moro bobo kame kobino kwanyo kibuti kame koromo tic kede me gedo. In ibino bedo gikame do kony mere li nakanaka. Ango Rwot en awaco.

²⁷ “Sip imendera i lobo pi nyuto be yi tie. Kut agwara tetekeny atekerin winyi di kiko ngeno be yi tie. Mi atekerin iikere pi yi kede Babilon. Lwong jo me ajakanuto apapat pi bino yi kede; ajakanuto me Ararat, Mini, kede Asukenas. Yer dano kame bino telo isirikalen ot yi kede. Keli asigiran atot bala obonyo.

²⁸ Mi atekerin iikere pi yi kede Babilon. Lwong abakai me Mede, karacel kede jopug gi kede jotic adongo, kede isirikalen dedede me pinye kame gin kipugo.

²⁹ Lobo tie yangere doko jo mege tie winyo lito, pien Rwot tie cobo timo gikame oudo en eiko pi timo i kom Babilon; iik mere me mino Babilon doko ameje kalikame dano moro bedo iye.

³⁰ Isirikalen me Babilon otieko weko yi; gin kidong do bedo kabedo gi kame kocelo di tek. Teko gi otiek; kitieko do doko cal bala mon. Erute me bomba gi kotieko turo, doko ude gi da kocwicwinyo kede mac.

³¹ Jo kame tero kop ne abaka me Babilon ringo di kilubere aluba pi ot waco ne be kotieko turo bomba mere ki bad tetu dedede.

³² Jokwor otieko mako kakame jo ngolo kede ecilet, kitieko wango lum da, doko lworo otieko mako isirikalen omio kom gi tie miel.

³³ Babilon cal bala diakal me canyo kame kotie toro, pien udo kare me kac onoko; kidong kede kare katitidi di jokwor ngongolo gi. Ango Rwot me jo yi en awaco.”

³⁴ Abaka Nebukadunesa me Babilon otieko neko jo me Yerusalem. En etieko mino bomba odong nono bala agulu kame gimoro li i yie; en etieko mwonyaro bomba me Yerusalem bala le kiyiliyili. En etieko tero jamini kame cunye mito, di eko lwomo jamini ace tenge.

³⁵ Jo me Sion miero wac be, “Wan okwao be nyang gero kame kotimo i kom wa i wi Babilon!” Poore jo me Yerusalem wac be, “Wan okwao be nyang remo wa i wi jo me Babilon!”

Rwot bino Konyo Jo me Isirael

³⁶ Pi mano, Rwot waco be, “Ango abino pido piru di ako timo onyanga i kom jokwor wu. Ango abino mino kakame pii me Babilon wok kiye dwono di icileta mege ko tuo.

³⁷ Babilon bino doko atukit me ude kopopoto, kakame ikween bedo iye. Ebino doko gikame jo neno di lworo ko mako gi; likame tie dano moro kame bino bedo iye, doko jo kame nene bino yisiro en.

³⁸ Jo me Babilon dedede bino dorano bala inguon, di kingururo bala idwe me inguon.

³⁹ I kare kame gin do kiwor kede, ango abino tedo negi ebaga di ako mino gin kimer kiko donyo kilel. Gin kibino ot nino di likame kiko cei.

⁴⁰ Ango abino tero gi ot ngongolo gi bala romini kede diegi. Ango Rwot en awaco.”

Gikame bino Timere ne Babilon

⁴¹ Rwot waco be, “Bomba kame oudo wi lobo dedede pako kotieko mako! Babilon otieko doko gikame atekerin neno di lworo ko mako gi tin benyo!

⁴² Nam otieko mwonyo Babilon; ebuka mege amor otieko ume.

⁴³ Bomban mege otieko doko gikame jo neno di lworo ko mako gi, doko kical do bala wi tim, kabedo kame pii li iye, lobo kalikame dano moro bedo iye arabo beo iye da.

⁴⁴ Ango abino mino alola but Bel, rubanga me Babilon, di ako mine engoko gikame etieko mwonyo. Atekerin likame bobo bino mol ot bute. “Apama me bomba me Babilon otieko poto.

⁴⁵ Wun jo na yaunu tenge kibute! Dano acelacel poore lak kuo mere ki twon gero na.

⁴⁶ Kur idwonunu cuny wu arabo ibedunu kede lworo pi abe kame itienu winyo. Buli mwaka abe tie bino, abe kame mako tim me gero i lobo kede me yi me abakai ken gi ken gi.

⁴⁷ Ateteni kare tie bino kame ango abino mino kede caljwogi me Babilon alola. Lobo me Babilon lung kobino mino lewic mako; jo mege kame koneko bino rade kabedere mege dedede.

⁴⁸ Jamini dedede kame tie i wi lobo kede malo i edou bino lelemo kede kilel ka Babilon opoto; pien jo kame bino muducaro en bino wok ki bad tetu malo.

⁴⁹ Babilon omio jo oto i wi lobo dedede; eda nataman ebino poto pi kite kame eneko kede jo me Isirael. Ango Rwot en awaco.”

Kop ka Rubanga but Jo me Isirael i Babilon

⁵⁰ Rwot waco ne jo mege kame tie Babilon be, “Wun jo kame itiekunu bwot ki to, yaunu iotunu, kur igalunu kare! Bed bala itienu i lobo abor, miero iyutununu ango, doko parunu pi Yerusalem.

⁵¹ Wun iwacunu be, ‘Omio lewic omako wa, pien otieko winyo kite kame kocao wa kede; lewic opong i wi wa pien jokumbor otieko donyo i kabedere kacil me ot ka Rwot.’

⁵² Pi mano, ateteni kare tie bino kame ango abino mino kede caljwogi me Babilon alola, di i kabedere dedede me lobo mere jo kame kowawano bino cur pi lito me awanon.

⁵³ Akadi koto Babilon di oko yito malo i edou di eko gero apama atek me cele i kunono, ango pwodi koto acwao jo di gin kiko ot muducaro en. Ango Rwot en awaco.”

Medo Dudubo Babilon

⁵⁴ Rwot waco be, “Kong winyunu koko kame tie winyere wok ki Babilon, mor adwong kame kotie dudubo kede lobo me jo Kaludea.

⁵⁵ Ango ayaro muducaro Babilon di ako mine eling. Jokwor bino core kuno bala ebuka me nam, woo me dwan gi bino mor adikinicel.

⁵⁶ Jokwor otieko bino pi muducaro Babilon; kimako isirikalen mege, doko kitieko tuturo imalia gi. Pien ango Rwot Rubanga aketo can i kom jo pi dub gi, ango ayaro culo raco i kom Babilon pi dub kame jo mege otimo.

⁵⁷ Ango abino mino jotel mege, jorieko, jopug, jotic adongo, kede isirikalen mege mer. Gin kibino ot nino di likame kiko cei. Ango abaka atieko waco, ango Rwot me jo yi.

⁵⁸ Apama me cel atek me Babilon kobino reto piny, di oko wango irutei mege abocoboco nogo. Jo olo kom gi nono, doko atekerin timo teko i gikame mac bino wango. Ango Rwot me jo yi atieko waco.”

Yeremia Ocwao Kop mere Babilon

⁵⁹ Seraya wot ka Neria, en akwar Maseya oudo obedo ngat kame gwoko Abaka Esedekia. I mwaka me ongwon me apugan ka Esedekia bala abaka me Yuda, Seraya oudo tie ot Babilon kede abaka, di ango ako mine kop pi tero.

⁶⁰ Ango oudo awandiko i itabu adola kop i kom can dedede kame bino poto i kom Babilon. Ango awandiko kope nogi dedede kame mako Babilon.

⁶¹ Di ango ako waco ne Seraya be, “Ka ituno Babilon, nen be isomo kope nogi dedede but jo kede dwan amalo.

⁶² Di iko lego be, ‘Okwe Rwot, in kikomi ingato pi muducaro kabedo noni, tetekeny jo akadi leini kur bed tie iye, di en eko bedo ameje nakanaka.’

⁶³ Ka in itieko somo kop me itabu adola nono but jo, twei kidi i kom itabu nono di iko lwome i ecilet me Eupurate.

⁶⁴ Di do in iko waco be, ‘Babilon bino lwiny kamanono, di likame bobo eko woto wie ooko atwal, pi can kame Rwot tie kelo i kome.’ ” Kope kame Yeremia owaco jik kan.