Yeremia 49 - Baibuli I Leb Kumam 2013

Kop kame Rwot Ongolo i kom Amon

¹ Man en kop kame Rwot owaco i kom lobo me Amon. En epenyere be, “Benyo, Isirael li kede awobe? Benyo, likame tie jo kodong kame karuno lunyo lobo gin? Pinyo komio gin kiweko jo kame woro rubanga Molek omao lobo me jo me ekeko ka Gad di kiko donyo bedo i bomban mege?

² Do kare tie bino kame ango abino mino kede jo kame bedo i bomba adwong me Raba winyo woo me jo kame tie bino sure, di oko bino dudubo bomba gi nono dong di en ameje, doko calere gi kobino wango dopodop. Di do jo me Isirael ko bino dwoko lobo gi kibut jo kame oudo omao gi. Ango Rwot en awaco.

³ Okwe wun jo me Kesibon, kokunu pien kotieko muducaro Ai! Kokunu, wun mon me Raba! Ngapunu ipukoi di ikounu donyo iturur. Teteunu komu pi nyuto iturur, pien kobino tero rubanga wu Molek i lobo apat bala mabus, en karacel kede josaseredoti mege, kede jotic mege.

⁴ Wun jo kalikame igenerenu, pinyo kara kame mio iwakerenu pi teko wu? Teko wu nono tie tiek. Wun iketunu gen wu i kom abar wu di iwacunu be likame tie ngatamoro kame bino suro wu.

⁵ Ango ayaro mino ibedunu kede lworo i kom jokio wu dedede. Ngat acelacel kikom wu bino ringo kare kene, di likame tie ngatamoro kame ko bino bobo coko wu karacel.

⁶ “Do i cen mere, ango bobo abino dwoko mulem me jo Amon. Ango Rwot en awaco.”

Kop kame Rwot Ongolo i kom Jo Edom

⁷ Rwot me jo yi penyere be, “Benyo, likame do tie dano moro kame riek i Edom? Benyo, jo kame mio gi tam likame tie do mino gi tam? Benyo, rieko gin do mam otiek?

⁸ Wun jo me Dedan, lokerenu cen di ikounu ringo! Pwonunu! Ango ayaro kelo can i kom ikwae ka Esau, pien kare me ango mino gin alola otieko tuno.

⁹ Benyo, ka jongwed olok obino buti, mam kingwedo olok di kiko weko mogo dong? Akadi jokuwo da ka obino iwor, gida kiyako jamini kame gin oudo kimito kenekene.

¹⁰ Do ango atieko ikwae ka Esau pitipit. Atieko da delelo kapwono gi. Manono omio nataman gin likame kikaruno pwono. Kotieko muducaro ikwae ka Esau dedede, joawade mege kiton jokio. Likame tie moro kodong.

¹¹ Wekunu idwe kic wu buta, di ango ako bino gwoko kuo gi, doko apuserun wu da karuno keto gen gi i koma.

¹² “Ka do ber jo kalikame oudo kopoore mino alola oko mato gikame tie i kopo me can, pinyo bo kame mio likame kopoore mino wun alola? Wun likame poore ibwotunu ki alola; miero imatunu gikame tie i ikopo me can nono.

¹³ Ango atieko kwongere be bomba me Bosira bino doko gikame jo neno ko bedo kede lworo, kede gi me anyera, ameje, kede gikame jo tio kede nyinge me lamo jo. Bomban atino me kio mege dedede bino dong di gin kitie amejeko nakanaka.”

¹⁴ Ango atieko winyo kop kame owok kibut Rwot, kop kame mako Edom. En etieko cwano ngaor but atekerin pi waco negi be, “Cokerenu karacel pi ot yi kede Edom, di ikounu yai yi.”

¹⁵ Rwot oyaro mino wu idokunu jo agoro i diere me atekerin, di jo likame ko bino mino wu wor.

¹⁶ Ewaka me cunyu tie mino wun itamunu be jo lworo wu twatwal. Wun ibedunu kakobabarun me moru, kede malo i wi moru; do akadi wun ibedunu malo kakabor bala ekokom, Rwot bino dwoko wu piny ki kunono. Manono Rwot en owaco.

¹⁷ Rwot owaco be, “Edom bino doko gikame jo neno di lworo ko mako gi; jo dedede kame bino beo i ngete bino bedo kede twon lworo di kiko yisiro en pi can kopoto i kome.

¹⁸ Bala kame bin komuducaro kede Sodoma kede Gomora karacel kede jokio gi, likame tie dano moro kame bobo bino bedo Edom. Ango Rwot en awaco.

¹⁹ Ango ayaro bino ne jo me Edom bala engu kame wok ki abum me Yorodan di ebino i elet me kwat, ayaro ngole riamo gin tenge ki lobo gi, di ako keto ngatel kame ango en ayero pi pugo lobo nono. Ngai kame kokaruno poro keda? Ngai kame karuno piem keda? Ngatel mene kalikame karuno yei kede kop na?

²⁰ Pi mano, winyunu iik kame ango atieko timo i kom jo me Edom, kede gikame ango amito timo i kom jo me bomba me Teman. Ateteni kobino pere kede idwe gi kotero di gin dedede kiko bedo kede lworo atek pi gi kotimere nono.

²¹ Edom bino poto poto kame yayango piny; dwane me koko bino winyere i Nam Akwar.

²² Ngakwor bino ngeso suro Bomba me Bosira bala ekokom kame ringini piny di eyaro bwome. I ceng nono cuny jo yi me Edom bino bedo lwor bala cuny dako atie ramere me nywal.”

Kop kame Rwot Ongolo i kom Damasiko

²³ Man en kop kame Rwot owaco i kom Damasiko. En ewaco be, “Wi jo kame tie i bomban me Kamat kede Arapad otieko totolun piento gin kitieko winyo rwonge arac. Cuny gi onyote, kirubere bala nam kalikame karuno kwei.

²⁴ Jo me Damasiko otieko doko goro, doko lworo atek otieko mako gi omio kilokere ringo tenge di kom gi miel. Kitie winyo lito kede cwercuny arom kede me dako atie ramere me nywal.

²⁵ Bomba kame bin nyinge winyere twatwal, bomba kame bin yomcuny dwong iye, kotieko weko.

²⁶ Pi mano, kobino neko awobe mege i yote me bomba, kede isirikalen mege da dedede i ceng nono.

²⁷ Ango abino cwinyo mac i apama me cel me Damasiko, di mac nono ko wango paco me Abaka Benekadad. Ango Rwot me jo yi en awaco.”

Kop kame Kongolo i kom Kader kede Kasor

²⁸ Man en kop kame Rwot owaco i kom jo me ekeko ka Kader kede adulion kame Kasor pugo. Adulion nogo en kame bin Abaka Nebukadunesa me Babilon oyi di eko mako. Rwot bin owaco ne be, “Yai iko ot suro Kedar di iko neko jo kame bedo i bad tetu kide!

²⁹ Maunu iemai kede diegi kede romini gi, isukan me iemai, kede jamini gi dedede atie i yi iemai di ikounu tero. Terunu aguraguran gi di ikounu waco ne jo be, ‘Lworo tie i bad dedede!’

³⁰ “Wun jo me Kasor, ringunu kakabor di ikounu pwono. Abaka Nebukadunesa me Babilon otieko timo iik i komu, doko en etieko iiko gikame en emito timo i komu.

³¹ Yaunu di ikounu ot yi kede ateker kame tie i mulem, ateker kame tie bedo abongo gimoro kame en elworo. Ateker kalikame kocego erute me bomba mere, doko en ebedo kene.

³² “Maunu aguraguran kede doke gi dedede di ikounu tero. Jo kame lielo wi gi nogo ango abino sasaro i bad tetu dedede, doko abino kelo can i kom gi ki bad tetu dedede. Ango Rwot en awaco.

³³ Kasor bino doko ameje, kabedo kame ikween bedo iye. Likame bobo tie dano moro kame bino bedo kuno.”

Kop kame Rwot Ongolo i kom Jo me Elam

³⁴ I kare kame Abaka Esedekia me Yuda pwodi cako kede pug acaka, Rwot oko waco na kop i kom Elam.

³⁵ Rwot me jo yi owaco na be, “Yeremia, ango ayaro neko jo me Elam kame gweo emal, gin en jo kame kimio Elam teko.

³⁶ Ango abino mino yamo buko i kom Elam ki bad dedede, di ango ako sasaro jo mege kabedere dedede, di likame tie ateker moro i wi lobo kame ko dong abongo jo me Elam kame oringo ot gwokere but gi.

³⁷ Ango abino mino jo me Elam bedo kede lworo i nyim jokwor gi amito neko gi. Abino kelo can i kom gi kede gero atek. Abino lubo gi kede yi tuno ango tieko gi.

³⁸ Ango abino neko abaka gi kede jotel gi di ango ako donyo pugo kunono.

³⁹ Do i kare me anyim ango abino dwoko mulem me Elam. Ango Rwot en awaco.”