Yeremia 48 - Baibuli I Leb Kumam 2013

Jokwor bino Muducaro Lobo me Moab

¹ Man en kop kame Rwot me jo yi, Rubanga me jo me Isirael owaco i kom lobo me Moab: “Itienu i can wun jo me Nebo, pien kotieko muducaro bomba wu! Kotieko mino lewic omako jo me bomba me Kiriataim, kotieko mane da; kotieko reto apama atek koluke piny di oko mino lewic omako jo mege;

² pak kame lem opako kede Moab ojik do. Jokwor poro kop i Kesibon pi timo ne Moab gikarac. Gin kiwaco be, ‘Bia ootunu omiunu ateker me jo Moab jiki ki wi lobo!’ Ida, bomba me Madumen, kobino mini iling titi; jokwor oyaro bino ni.

³ Winy koko kame wok ki Koronaim, ‘Piny odong nono! Jo oto otiek!’

⁴ “Kotieko muducaro Moab; idwe mege tie koko.

⁵ Gin kioto malo i bomba me Lukit, kioto di kikok; i yongayo kame lor Koronaim koko atek pi can kotimere tie winyere.

⁶ Gin kiwaco be, ‘Ringunu tenge pi lako kuo wu! Ringunu bala punda me obar abedo i wi tim!’

⁷ “Moab, in oudo iketo gen nin i kom teko ni kede abar ni, do nataman oyaro maki di oko teri bala mabus; Kemos rubanga wu kobino tero i piny apat, en karacel kede josaseredoti mege kede jotic mege.

⁸ Ngadudubo bino ot i bomban dedede, likame tie bomba moro akadi acel kame bino bwot. En ebino dudubo aditoto, kede ebar da en ebino dudubo. Ango Rwot en awaco.

⁹ Cib engaro anyuto wi ailet i lobo me Moab, piento kobino muducaro en; bomban mege bino dong nono, abongo jo kame bedo i yi gi.”

¹⁰ (Ilam mak dano kalikame timo tic ka Rwot kede cunye lung! Doko ilam mak dano kame dagi timo nek kede epima mere.)

Komuducaro Bomban me Moab

¹¹ Rwot waco be, “Moab lem tie bedo mot cako sek, doko en pwodi likame kotere i piny apat bala mabus. Moab cal bala bwini kame oweko obedo mot abongo gimoro lole, doko likame kobedo lokoloko en i cupan. Likame kodudubo mito mere, doko ngwece mere likame olokere.

¹² “Pi manono, ateteni kare tie bino kame ango abino cwano ne kede jo kame bino onye bala bwini. Gin kibino weko cupan mege dong nono di kiko neneko gi.

¹³ Di do cuny jo Moab ko bino kwanyere ki kom Kemos rubanga gi, bala kame bin cuny jo me Isirael okwanyere kede ki kom Betel, kabedo kame gin oudo kiketo gen gi i kome.” Rwot waco be,

¹⁴ “Wun cuo me Moab, benyo benyo kame wun iwacunu kede be wun ibedunu jo me aura, jo kame tek i yi?

¹⁵ Kotieko muducaro Moab kede bomban mege dedede, doko awobe mege abeco twatwal kotieko neko. Ango abaka Rwot me jo yi en awaco.

¹⁶ Can kame tie bino poto i kom jo Moab otieko doko iyapiyapi; kare me muducaro en tie tuno awakawaka.

¹⁷ “Kokenu, wun dedede jokio mere, wun jo dedede kame ingeunu en kiber. Wacunu be, ‘Kotieko bwono apugan mere; deyo mere kede teko mere otiek.’

¹⁸ Wun jo kame ibedunu i bomba me Dibon, wokunu piny ki kabedo me wor, di ikounu bedo piny i apua. Pien ngadudubo Moab otieko bino ne wu; en etieko tuturo apama wu atek me cel.

¹⁹ Wun jo kame ibedunu i bomba me Aroer, cungunu i nget yongayo di ikounu daro; penyunu cuo kede mon kame tie lwi ringo, penyunu gin gikame otimere.

²⁰ Gin kibino waco ne wu be, ‘Kotieko mino Moab lewic, kokunu pire! Tatamunu kop noni i nget ecilet me Arunon be kotieko muducaro Moab!’

²¹ “Ngolo kop otieko tuno i bomban kame tie i lobo kopetere bala emesa, gin en bomban me Kolon, Yasa, Mepat,

²² Dibon, Nebo, Bet Dibilataim,

²³ Kiriataim, Betegamul, Betemeon,

²⁴ Keriot, kede Bosira, bomban dedede me Moab, kame tie kakabor kede kakiyapi.

²⁵ Kotieko teko me jo Moab, doko likame kikaruno yi. Ango Rwot en awaco.”

Rwot bino mino Moab Mwolere

²⁶ Rwot waco be, “Mi Moab mer kede bwini, piento en etieko tingere na. Wek ebebelo i ngok mere di eko doko gi me anyera.

²⁷ Moab, yutuno kong kite kame in oudo icao kede jo me Isirael! Bed bala gin likame oudo omako gi di kitie karacel kede jokuwo, in oudo iyayango wi kede acae ka itie yamo kop moro i kom gin.

²⁸ “Wun jo kame ibedunu Moab, yaunu tenge ki bomban wu di ikounu ot bedo i wi lela. Bedunu bala awele kame gero ode i dog abo.

²⁹ Moab wakere twatwal! Ango atieko winyo kop i kom ewaka me jo mege, tingere gi kede woo kame tie i cuny gi.

³⁰ Ango Rwot angeo ewaka gi, do ewaka gi nono tie gi me nono. Likame tie gikame ewaka gi nono bino timo.

³¹ Pi mano, ango akok pi jo dedede kame tie Moab kede pi jo me Kir Keres.

³² Ango abino kok pi jo me Sibima kalamo kite kame oudo akok kede pi jo me Yaser. Bomba me Sibima, in ical bala olok kame jange mege boco ngolo loka tetuca me Nam Oto naka tuno Yaser. Do nataman ngadudubo otieko dudubo anyakini nin me iporo kiton olok.

³³ Yomcuny kede kilel otieko doko li i lobo amio me Moab. Ango atieko mino jo ojiko timo bwini; likame tie ngatamoro kame bio olok di elelemo kede kilel. Ilelem kame tie likame obedo me kilel.

³⁴ “Jo me Kesibon kede Eleale tie koko kitek; kikok dwan gi winyere ki Yakas. Jo me Soar da tie winyo dwan gi nono, kiton jo me Koronaim kede Egelat Selisiya. Pien akadi pii me Nimirim da otieko tuo.

³⁵ Ango abino mino jo me Moab jiko mino giayala awanga i kabedere gi me woro rubangan, kede kiko jiko mino giayala but rubangan gin. Ango Rwot en awaco.

³⁶ “Pi mano, cunya cwer pi Moab kede pi jo me Kir Keres, bala dano kame tie kuto wer me koko me to kede bilo, pien gi dedede kame gin oudo kitie kede otieko doko li.

³⁷ Jo dedede otieko lielo wi gi kede yer me tik gi. Gin dedede kitieko teteo cing gi, doko jo dedede tie ngapo ipukoi pi nyuto iturur gi.

³⁸ Koko tie kabedere dedede me Moab, i wi ude kede kabedere dedede kame jo cokere iye iudo koko kenekene, pien ango atieko ngingido Moab bala agulu kalikame komito.

³⁹ Okwe, tin kongingido en benyo! Winyunu koko mere! Lewic tin omake benyo! Moab otieko doko gi me anyera but jokio mege, kede gikame jo neno di lworo ko mako gi.”

Moab Likame bino Bwot

⁴⁰ Rwot waco be, “Nenunu, jokwor bino ngeso ringini suro Moab bala ekokom kame ringini piny di eyaro bwome.

⁴¹ Bomban mege kede kabedere kame kocelo kede apama atek kobino mako. I ceng nono cuny jo yi me Moab bino bedo kede lworo bala dako atie ramere me nywal.

⁴² Kobino muducaro Moab di likame bobo eko bedo ateker, piento en etingere na.

⁴³ Okwe wun jo me Moab, gikame kelo lworo, bur kame ibinunu popoto iye, kede obek me mako wu tie kuro wu. Ango Rwot en awaco.

⁴⁴ Ngat kame bino ringo tenge pi bwot ki gikame kelo lworo, bino poto i bur, doko ngat kame bino wok ki bur bino moko i obek. Ango abino mino gi nogi timere i kom Moab ka mwaka me mine alola otuno. Ango Rwot en awaco.

⁴⁵ Jo aringo ayela kame ool teko gi otiek tamo pi mito gwokere Kesibon, bomba kame oudo Abaka Sikon pugo, do en etie liel, doko paco me abaka da tie wang. Mac otieko wango gi dedede, cako ki ikor tuno i wi moru me jo Moab, jo kame maro yi.

⁴⁶ Itienu i can tin benyo, Okwe wun jo me Moab! Kotieko muducaro jo kame woro rubanga Kemos, di oko mako awobe kede anyira wu da kotero bala mabus.

⁴⁷ “Do i kare me anyim ango abino dwoko mulem me Moab. Ango Rwot en awaco. Man en kop kame angolo i kom Moab.”