Yeremia 47 - Baibuli I Leb Kumam 2013

Kop kame Rwot Owaco i kom Pilistia

¹ Man en kop kame Rwot owaco na i kom Pilistia di pwodi Parao likame osuro Gasa.

² En ewaco be, “Neningo, jokwor tie cokere i bad tetu malo bala pii me ecilet kame tingere gin kibino dipere bino bala pii atot amol; gin kibino romo lobo me Pilistia lung kiton jamini dedede kame tie iye, bomban kede jo kame bedo i bomban nogo. Jo bino kok pi mito be kony gi; jo dedede kame bedo i lobo nono bino kok kitek

³ ka gin kiwinyo mor me tien asigiran, mor me cabalan, karacel kede kukukuku me tien gi. Jonywal likame bino lokere dok cen ot konyo idwe gi; bad gi bino lolojun.

⁴ Pien udo ceng me muducaro jo me Pilistia otieko tuno, ceng me tieko jo dedede kame pwodi odong, jo kame konyo Taya kede Sidon. Pien ango Rwot atie muducaro jo me Pilistia, jo kame oudo obino ki dog nam me Kurete.

⁵ Jo me Gasa otieko lielo wi gi pi nyuto cwercuny gi, jo me Asikelon oling titi. Okwe wun jo me Pilistia apwodi odong, ibinunu bedo teteo komu pi nyuto cwercuny tuno awene?

⁶ Wun ikokunu be, ‘Okwe epima ka Rwot! Iyaro tero kare kame rom amene en amio iko do ling? Dok i ekularu ni, bed mot di iko wei!’

⁷ Do benyo benyo kame en eromo wei kede, di ango atieko mine cik? Ango atieko mine cik me suro bomba me Asikelon kede jo kame bedo i dog nam.”