Yeremia 46 - Baibuli I Leb Kumam 2013

Kobwono Jo me Misiri i Karukemis

¹ Man en kop kame Rwot owaco na i kom atekerin icegun.

² I kom Misiri, en ewaco kop kame mako isirikalen ka Parao Neko, abaka me Misiri, kame bin Abaka Nebukadunesa me Babilon obwono i bomba me Karekemis kame oudo tie i nget ecilet me Eupurate, i mwaka me ongwon me apugan ka Yekoyakim bala abaka me Yuda. En ewaco be,

³ “Jotel me isirikalen me Misiri tie lelemo be, ‘Iikunu ibukui wu di ikounu yai ot yi!

⁴ Tweunu ne asigiran dele me kodo cabalan, di ikounu yito i yi gi! Ngapunu icoron wu atek di ikounu teere pi yi! Penunu tongini wu! Ngapunu ikotin wu kame kotimo kede lilime pi gwoko komu!’ ”

⁵ Rwot penyere be, “Nyo ine kame ango atie neno noni? Gin kitie lokere dok cen kede lworo adwong. Kotieko bwono jo yi gin atek; lworo obwono gi omio kitie ringo tenge kede teko abongo ngoloro cen.

⁶ Jo kame dwir kikom gin likame karuno lanyo, akadi jo atek i yi da likame karuno bwot. I bad tetu malo, i nget ecilet me Eupurate, gin kitie gegetun di kipopoto.

⁷ Ngai ine kame tie tingere bala pii me ecilet me Nail, ngat kame tie tingere bala ecilet kame pii mere opong olamar ooko?

⁸ Misiri inonono kame tie tingere bala pii me ecilet me Nail, en etie tingere bala ecilet kame pii mere opong olamar ooko. En ewaco be, ‘Ango abino tingere di ako umo lobo lung; ango abino muducaro bomban kede jo kame bedo i bomban nogo.

⁹ Miunu asigiran cak ot, di cabalan ko lor ringo kede teko! Jo atek i yi poore ot anyim: cuo me Abisinia kede Libiya kame tie mako ibukui, kede cuo me Lidia kame tie kede diru i gweno emal.’ ”

¹⁰ Ceng noni obedo ceng ka Rwot Rubanga me jo yi, ceng me timo onyanga i kom jokwor mege. Epima mere bino camo gi tuno tieko gi pitipit, di eko pwokere kede remo gi. Pien Rwot Rubanga me jo yi tie mino giayala mere i lobo kame tie i bad tetu malo, i nget ecilet me Eupurate.

¹¹ Wun jo me Misiri, otunu Gilead imounu yat me amuket ki kuno! Wun itiekunu tic kede yen me amuket atot do likame kikonyo wu; Likame tie gimoro kame karuno cango wu.

¹² Atekerin otieko winyo kop me lewic kame wun itienu kede; koko wu oromo lobo lung. Isirikalen wu twomere ken gi ken gi, di gin dedede kiko poto piny karacel.

Nebukadunesa Osuro Misiri

¹³ Man en kop kame Rwot owaco na i kom bino me Abaka Nebukadunesa me Babilon pi suro lobo me Misiri. En ewaco be,

¹⁴ “Tatamo kop noni i bomban me Misiri, Migidol, Mempi, kede Tapankes be, ‘Iikerenu yi pi gwoko kuo wu, pien yi bino mino komuducaro gi dedede kame itienu kede!

¹⁵ Pinyo bo komio Apis rubanga wu oringo tenge? Pinyo komio twon wu likame okaruno cungo? Manono otimere pien ango Rwot areto gin piny!’

¹⁶ Isirikalen wun otieko twotwomun di gin kiko popoto; ngat acelacel waco ne ngat ocelu be, ‘Susunyo yai! Mito odok paco but jo me tur wa i lobo kame konywalo wa iye, di oko bwot ki epima me jokwor!’

¹⁷ “Miunu Parao abaka me Misiri nying kame kolwongo be, ‘Ngawoo Kokei Winyo mere’.

¹⁸ Ango Rwot me jo yi, ango en abaka. Ango en Rubanga akuo. Ngat kame tie bino suro wu teko mere kalamo me jo icegun dedede, bala kame moru me Tabor wie bor kede malo kalamo mori icegun, arabo bala kame moru me Kamel cungo kede bor malo kalamo nam adwong.

¹⁹ Wun jo me Misiri, tweunu yec wu di ikounu bedo di iikerenu me ot bedo obukui bala mabus! Pien kobino mino bomba me Mempi dong nono, ebino doko ameje kame dano moro likame bedo iye.

²⁰ Misiri cal bala atakit aber, kame lwangini kowok ki tetu malo akakao dok otieko kakao.

²¹ Isirikalen kame en epango pi konye, kame en egwoko kiber bala roce kame kotie mino cwe; gida kitieko lokere di kiko ringo tenge dedede. Likame kicungo yi, pien ceng me keto can i kom gin otieko tuno, en kare me mino gi alola.

²² Misiri tie ringo tenge di enguroro bala twol; pien jokwor mege obino di kitek adikinicel. Gin kibino i kome pi sure di kimako lee, bala jo kame tie tongo yen.

²³ Gin kibino tongo abum mere, bed bala abum nono oduko kitek. Manono bino timere pien gin kitot kalamo obonyo; wel gin likame marere.

²⁴ Kobino mino lewic mako jo me Misiri; kobino mino gin i cing jo me bad tetu malo. Ango Rwot en awaco.”

²⁵ Rwot me jo yi, Rubanga me jo me Isirael waco be, “Neningo, ango ayaro mino Amon, rubanga me bomba me Tebes alola, en kede Misiri kede rubangan mege kede abakai mege. Ango abino kwanyo abaka me Misiri kede jo dedede kame keto gen gi i kome

²⁶ di ako mino gi i cing Abaka Nebukadunesa me Babilon kede jotel me isirikalen mege, gin jo kame mito neko gi. Do i cen mere jo bobo bino donyo bedo Misiri bala bin i kare kasek. Ango Rwot en awaco.”

Rwot bino Lako Jo mege

²⁷ Rwot waco be, “Do wun jotic na ikwae ka Yakobo, kur ibedunu kede lworo moro; doko kur cuny wu poti, Okwe wun jo me Isirael. Ango ayaro lako wun ki lobo kame tie kakabor nono, ango ayaro lako ikwae wu ki lobo kame gin kitie iye bala mabus. Wun ibinunu dwogo paco di ikounu bedo mot kede mulem, doko likame tie ngatamoro kame bino mino wu lworo.

²⁸ Kur ibedunu kede lworo moro, wun jotic na ikwae ka Yakobo, pien ango atie kede wu. Ango abino muducaro atekerin dedede kame ango asasaro wu i diere gi, do ango likame abino muducaro wun. Ango abino mino wu alola kame poore kede wu, likame abino weko wu aweka abongo mino wu alola moro.”