Yeremia 45 - Baibuli I Leb Kumam 2013

Cikere ka Rwot but Baruk

¹ Mwaka me ongwon me apugan ka Yekoyakim wot ka Yosia bala abaka me Yuda, en kame Baruk wot ka Neria owandiko kede i yi itabu adola kope nogi kame oudo ango awaco di en ewandiko. Ango oudo owaco ne Baruk be

² Rwot Rubanga me jo me Isirael owaco be,

³ “Baruk, in itie waco be, ‘Ango atie i can twatwal! Rwot otieko medo cwercuny i wi peko na; cur otieko oola, ali kede kare me wei akadi katitidi.’

⁴ “Do ango Rwot abino tuturo gikame atieko gero, doko abino puputo gikame atieko pito. Ango abino timo manoni ne lobo lung.

⁵ Benyo, in itie mito be par pirin kalamo? Kur itim kamanono; pien ango ayaro kelo can i kom jo dedede, do ango abino gwoko kuo nin i kabedere dedede kame in ioto iye. Ango Rwot en awaco.”