Yeremia 44 - Baibuli I Leb Kumam 2013

Kop ka Rwot but Jo me Isirael i Misiri

¹ Rwot oko waco na kop kame mako jo me Yuda dedede kame oudo tie bedo Misiri i bomban me Migidol, Tapankes, kede Mempi, kede i lobo me Paturos.

² Rwot me jo yi, Rubanga me jo me Isirael owaco be, “Wun kikomu itiekunu neno can kame ango akelo i kom Yerusalem karacel kede bomban dedede me Yuda. Nenunu kite kame kitie kede; nataman gin kitie amejeko, abongo dano moro kame bedo i yi gi,

³ pi gikareco kame jo kame oudo bedo i yi gi otimo di gin kiko wango cunya. Gin oudo kimio giayala gi but rubangan apat di kiko timo tic ne rubangan kame gin arabo wun amoto joakwari wu likame oworo akadi acel.

⁴ Aso di ango abedo ooro inabin jotic na but gi pi ngangao gi wek kur kitim gi me kwer kame ango cunya dagi.

⁵ Do gin kiko dagi winyo arabo lubo timo kop kame gin kiwaco negi. Gin likame kiko yei weko tim gi areco me mino giayala but rubangan apat.

⁶ Manono oko mina abwoto lilo na kede gero na i kom bomban me Yuda kede i dier yote me Yerusalem, di eko liel i kom gi bala mac. Gin nataman do kidong amejeko abongo jo, bala kame etie kede tuno tin.

⁷ “Pi mano, ango Rwot Rubanga me jo yi, Rubanga me Isirael atie penyo wu pinyo komio wun itienu timo gikarac kamano i komu kenu? Benyo, imitunu kelo to ne cuo kede mon, idwe kede imukerun, tetekeny ngatamoro kur dong kuo kikom wu?

⁸ Pinyo kame mio wun iwangunu cunya i yore me woro gikame cingu ocweo, di imiunu giayala but rubangan apat i lobo me Misiri kakame itienu bedo iye? Benyo, imitunu muducar di ikounu doko jo kame atekerin dedede me wi lobo tio kede nying gi me lamo jo, kede kame konyero kede acae?

⁹ Benyo, wi wu otieko wil kede gikareco kame joakwari wu bin otimo, karacel kede me abakai me Yuda kede mon gi, kede gikareco wuda kede mon wu, gikareco kame bin kotimo i lobo me Yuda kede i yote me Yerusalem.

¹⁰ Tuno tin wun likame pwodi inyutunu iswilar moro arabo lworo, doko likame ilubunu iswilia na kede pwony na kame oudo amio wu karacel kede joakwari wu.

¹¹ “Pi mano, ango Rwot me jo yi, Rubanga me Isirael atieko moko tam na pi kelo can i komu di ako muducaro Yuda dedede atwal.

¹² Ango abino neno be komuducaro jo dedede kodong me Yuda, jo kotieko keto cuny gi pi ot bedo i lobo me Misiri. Gin dedede kibino to i Misiri, jo me ruom amalo kede ruom apiny, kibino to i yi arabo kito kec. Gin kibino doko jo kame kotio kede nying gi me lamo jo, gikame neno mio jo lworo, kede jo kame jo nyero kede acae.

¹³ Ango abino mino jo kame bedo i lobo me Misiri alola bala kame bin atimo ne Yerusalem. Abino mino gi alola me yi, kec kede tuwo.

¹⁴ Likame tie dano moro me Yuda odong, kame oko ot bedo Misiri, kame bino bwot arabo dong kuo. Likame tie dano moro kikom gi kame bino dwogo Yuda, bed bala cuny gi paro pi gin dwogo bedo iye. Likame gin kibino dwogo Yuda, kwanyo kenekene jo oudo oringo kunono pi ringo ayela.”

¹⁵ Di do cuo dedede kame oudo ngeo be mon gi lem tie mino giayala but rubangan apat, karacel kede mon dedede kame oudo tie cungo kunono, kiton jo me Isirael kame oudo bedo Paturos i Misiri kunono, twon ekodet me jo, gin dedede kiko waco na be,

¹⁶ “Kop kame in iwaco ne wan i nying Rwot nono, wan likame omito lubo.

¹⁷ Wan obino timo gi dedede kame wan otieko kwongere iye. Wan obino mino giayala but abaka adako me i malo doko obino onyo ne giayala amata bala kame wan kede joakwari wa, abakai wa kede jotel wa, bin otimo i bomban me Yuda kede i yote me Yerusalem. I kare nono bin wan obedo tie kede cam kame tot, di olony doko oudo peko moro likame mako wa.

¹⁸ Do cako i kare kame wan oweko kede mino giayala but abaka adako me i malo, di oko weko da onyo ne giayala amata, wan oko bedo li kede gi dedede, doko oko donyo neko wa i yi, kede oko donyo to kec da.”

¹⁹ Di mon oko medo be, “Ateteni wan obino meede mino giayala but rubanga kobedo abaka adako me i malo, kede onyo ne giayala amata da. Benyo, in iparo be wan otedo mugati kame otimo cal mere iye, kede onyo ne giayala amata abongo cwog wa yei ne wa?”

²⁰ Di do ango ako waco ne jo dedede, cuo kede mon, gin jo koudo ogamo doge iepone noni be,

²¹ “Giayala kame wun oudo imiunu i bomban me Yuda kede i yote me Yerusalem, wun kede joakwari wu, abakai wu kede jotel wu, karacel kede jo dedede me lobo nono, iparunu be Rwot oudo likame ngeo arabo iparunu be wie oudo owil kede gi?

²² Rwot likame oudo twero meede kanyakino tim wu areco nogo, gi me kwer kame wun oudo itimunu. Manono en komio tuno tin lobo wu tie ameje abongo dano moro kame bedo iye. Etieko doko gikame do jo tio kede nyinge me ilam.

²³ Can noni opoto i komu, bala kame etie kede tuno tin, pien wun oudo imiunu giayala awanga but rubangan apat, di ikounu timo dub but Rwot, doko idagunu lubo kop mere arabo timo gikame iswil, pwony kede cik mere mito.”

²⁴ Ango ako waco kop but jo dedede, do twatwal mere but mon. Ango awaco negi be, “Winyunu kop kame Rwot owaco, wun jo me Yuda dedede kame itienu i lobo me Misiri.

²⁵ Rwot me jo yi Rubanga me jo me Isirael owaco be wun kede mon wu itiekunu cobo timo gikame oudo iwacunu kede dogu be, ‘Wan otieko moko tam wa pi cobo timo gikame oudo okwongere iye, en me mino giayala but rubanga adako me i malo kede onyo ne giayala amata.’ Manono ber, wun gwokunu kwongere wu kiber doko mienu giayala wu amata!

²⁶ Pi mano, winyunu kop kame Rwot tie waco, wun jo me Yuda dedede kame itienu bedo i lobo me Misiri. En ewaco be, ‘Nenunu ango atieko kwongere i nyinga adwong be, likame tie dano moro me Yuda kame tie bedo Misiri kame bino bobo kwongere di elwongo nyinga.

²⁷ Ango ayaro ciko wanga i kom gi pi timo negi can do likame pi bero. Jo dedede me Yuda kame nataman tie bedo i lobo me Misiri bino to i yi arabo to kec, tuno gin tiek pitipit.

²⁸ Do jo anonok kikom wu bino bwot likame koneko gi di gin kiko bino yai ki lobo me Misiri kiko dok i lobo me Yuda. Di do jo kame bino dong kuo nogo ko bino ngeno kop ka ngai en kame oko cobere, mera amoto mergi.

²⁹ Ango Rwot abino mino wu gianena kame bino nyuto ne wu be ango ayaro mino wu alola i kabedo noni, tetekeny wun ingeunu be kope kame ango awaco i komu ateteni bino timere.

³⁰ Ango abino mino Abaka Kopura me Misiri i cing jokwor mege kame mano neke, bala kame oudo amio kede Abaka Esedekia me Yuda i cing Abaka Nebukadunesa me Babilon, ngakwor mere kame oudo mano neke.’ ”