Yeremia 38 - Baibuli I Leb Kumam 2013

Kouco Yeremia i Kulo Kotuo

¹ Sepatia wot ka Matan, Gedalia wot ka Pasikur, Yukal wot ka Selemia, kede Pasikur wot ka Malakia oko winyo be ango oudo atie waco ne jo be

² Rwot owaco be, “Jo kame bino dong bedo i bomba noni kobino neko gi i yi, ka likame kito i yi, kibino to kec amoto tuwo. Do jo kame bino ot rieno cing gi but jo me Babilon bino dong kuo; kuo gi bino bwot.”

³ Doko da oudo ango atie waco negi be Rwot oudo owaco be, “Ateteni ango abino mino bomba noni i cing isirikalen me abaka me Babilon di gin kiko mane.”

⁴ Di do jodongo oko ot but abaka di gin kiko waco ne be, “Icuo noni miero koneke, piento en etie yamo kope akelo lworo i cuny isirikalen kame odong i bomba noni, karacel kede jo dedede. Icuo noni likame tie paro pi konyo jo, do en emito timo ne gin raco kenekene.”

⁵ Abaka Esedekia oko waco negi be, “En ino; en etie i cingu; ango likame akaruno gengo wun timo gikame imitunu.”

⁶ Aso, gin kiko tera di kiko yololo ango piny kede aunoi i bur atut me pii kame oudo tie i diakal me paco me abaka. Bur nono oudo me ka Malakia wot ka abaka. Pii oudo li i bur nono, kenekene cwoto, di ango ako moko i cwoto nono.

⁷ Ebedemelek dano me Abisinia, ngat kame oudo obedo ngatic me paco me abaka, oko winyo be oudo korwaka i bur atut me pii. Esawa nono abaka oudo tie bedo kakame kolwongo be Erute ka Benjamin.

⁸ Aso, Ebedemelek oko ot kunono di eko waco ne abaka be,

⁹ “Adwong na abaka, gikame cuo gi otimo ne enabi Yeremia tie gikarac. Gin kiuce i bur atut me pii, en ebino to kec kunono, pien cam likame do tie i bomba.”

¹⁰ Di abaka oko mino cik but Ebedemelek pi en ot kede cuo adek di gin kiko wota ki bur di pwodi likame oudo ato kec.

¹¹ Aso, Ebedemelek oko ot kede cuo nogo kakame okano iye jamini i paco me abaka di en eko kwanyo idukun mogo me igoen oti, di eko yololo gi piny i bur kede auno buta.

¹² En eko waco na pi keto idukun nogo i akirididi na tetekeny aunoi kur yua. Ango ako timo kamanono.

¹³ Di gin kiko wana kede aunoi kiwota ooko ki bur nono. Di do ango ako dong i diakal kunono.

Esedekia Openyo Tam kibut Yeremia

¹⁴ I ceng moro ace abaka Esedekia oko mino kotera bute i ekeko me adek kame donyo i tempulo. Abaka oko waco na be, “Ango atie kede kop kame amito penyi iye, do kur imung na gimoro.”

¹⁵ Ango ako waco ne Esedekia be, “Ka ango awaco nin kop me ateni, in ibino neka; doko ka ami tam, in likame ibino winyo kop na.”

¹⁶ Aso, Abaka Esedekia oko kwongere buta i mung be, “Ango alairo i nying Rwot kakuo, ngat komio wan kuo be, ango likame abino neki arabo mini i cing cuo nogi kame mito neki.”

¹⁷ Di do ango ako waco ne Esedekia be Rwot me jo yi, Rubanga me jo me Isirael oudo owaco be, “Ka in irieo cingi but jotic adongo me abaka me Babilon, kobino weko kuo ni, doko bomba noni likame kobino wango dopodop; ida kede jo me odi kobino weko wu ibedunu kuo.

¹⁸ Do ka in likame irieo cingi but jodongo ka abaka me Babilon, kobino mino bomba noni but jo me Babilon, di gin kiko wange dopodop; ida kikomi likame ibino bwot ki cing gi.”

¹⁹ Abaka Esedekia oko waco na be, “Ango atie lworo jo me piny wa kame otieko lwi nataman do kitie but jo me Babilon, pien cengemogo kobino mina i cing gin di gin kiko tidilo ango.”

²⁰ Ango ako waco ne be, “Manono likame bino timere. In kenekene lub kop kame Rwot owaco ni, di gi dedede ko bino bedo ni kiber, doko kuo ni di oko bino weko.

²¹ Do ka in idagi ot rieno cingi, man en gianyuta kame Rwot onyuto nango:

²² ango aneno mon dedede kame oko dong i paco me abaka me Yuda, di otie tero gi but jotic adongo me abaka me Babilon. Gin oudo kioto di kiyamo kop i komi be, “‘Jowot abaka orwenye, gin kibwono tam mere. Nataman do tiene otieko moko i cwoto, di jowote oko weke.’

²³ “Aso, jo me Babilon bino kwanyo mon wu dedede kede idwe wu di gin kiko tero gi, doko ida kikomi likame ibino bwot ki cing gi. Abaka me Babilon bino maki di eko teri bedo mabus, di oko bino wango bomba noni dopodop.”

²⁴ Di do Esedekia oko waco na be, “Kur imi ngatamoro ngei kop kame wan onyimao noni, ka dano moro ongeo, in ibino to.

²⁵ Ka jotic adongo owinyo be ango ayamo kedi, gin kiyaro bino di kiko penyi be iwac negi kop kame wan oudo oyamo. Gin kibino waco ni be kibino neki kalikame iwaco negi.

²⁶ Kenekene in wac negi be in oudo itie ngangao ango be kur adwoki i ot ka Jonasan bala Mabus pi ot to kunono.”

²⁷ Jotic adongo dedede oko bino buta di gin kiko pepenyo ango; di ango ako dwoko negi kop bala kame abaka oudo ocika be awaci. Di do gin kiko weko pepenyo ango, pien likame tie ngatamoro kame oudo owinyo inyimai nono.

²⁸ Di ango ako dong i diakal me paco me abaka tuno i ceng kame komao kede Yerusalem.