Yeremia 37 - Baibuli I Leb Kumam 2013

Kwac ka Esedekia but Yeremia

¹ Abaka Nebukadunesa me Babilon oko keto Esedekia wot ka Yosia pi bedo abaka me Yuda akaka Yekoyakin wot ka Yekoyakim.

² Do Esedekia akadi jotic mege arabo jo me piny likame oko lubo kope ka Rwot kame oudo ewaco na.

³ Abaka Esedekia oko cwano Yekukal wot ka Selemia kede ngasaseredoti Sepania wot ka Maseya buta pi waco na be, “Okwai ileg but Rwot Rubanga wa pirwa.”

⁴ I kare nono ango oudo pwodi arimo i dier jo, pien oudo pwodi likame orwaka i otkol.

⁵ I kare nono da isirikalen me Babilon oudo oluko Yerusalem kitie sure, do kakame kiko winyo kede be isirikalen me Misiri oudo otieko ngolo ikor me Misiri, gin kiko yai kidok cen.

⁶ Di Rwot oko waco na

⁷ pi waco ne cuo are nogo pi ot waco ne Esedekia be Rwot Rubanga me Isirael owaco be, “Isirikalen me Misiri kame oudo tie bino pi konyi oyaro dok i lobo gi Misiri.

⁸ Di jo me Babilon ko bino dwogo suro bomba noni; gin kibino mane di kiko wange dopodop.

⁹ Ango Rwot atie waco ne wu be kur ingalerenu kenu di iwacunu be jo me Babilon likame bino dwogo, pien gin kiyaro dwogo.

¹⁰ Akadi koto di wun ikounu bwono isirikalen me Babilon kame tie yi kede wu dedede, di do jo kame owawano kenekene en kame ko dong i iemai gin, do jo kame kowawano nogo pwodi bino yai di gin kiko wango bomba noni dopodop.”

Komako Yeremia di oko Twene i Otkol

¹¹ Aso, i kare kame isirikalen me Babilon bin oyai kede di kiko weko suro Yerusalem pien oudo isirikalen me Misiri tie bino,

¹² ango ako yai ki Yerusalem pi ot i lobo me Benjamin pi gamo iner na me jamini kibut jo me kunono.

¹³ Kakame ango atuno kede i Erute ka Benjamin, sirikale ngadar erute, kame oudo nyinge Irija ngat kobedo wot ka Selemia kede Kanania, oko maka di eko waco na be, “In itie lwi ot but jo me Babilon.”

¹⁴ Di ango ako waco ne be, “Mano likame kop me ateni; ango likame atie lwi ot but jo me Babilon.” Do Irija likame oko yei winyo kop na, di eko maka eko tera but jodongo.

¹⁵ Cuny jodongo oko wang i koma, di gin kiko bunga di kiko twena bedo mabus i ot ka Jonasan kalani, pien oudo otieko loko ot nono odoko otkol.

¹⁶ Ango bin oko keta i bur me tweno jo di ako dong bedo iye tieko kare kalac.

¹⁷ Di do Abaka Esedekia oko mino otera bute. Abaka oko pepenyo ango i mung i ode be, “Benyo, tie kop moro kowok kibut Rwot?” Ango ako gamo be, “Tie!” Di ako meede be, “In kobino mini i cing abaka me Babilon.”

¹⁸ Di Ango ako penyo Abaka Esedekia be, “Raco nyo kame ango atimo nin, arabo ne jotic ni, amoto but jo nogi, en komio in iketa i otkol?

¹⁹ Inabin nin kame oudo murao di kiwaco ni be abaka me Babilon likame bino suri akadi suro piny nin, nataman do tie tuai?

²⁰ Nataman ango akwai abaka na, tim ber iwiny koko na, di likame iko dwoka ot to i ot ka Jonasan kalani.”

²¹ Aso, Abaka Esedekia oko mino cik di oko gona i diakal me paco me abaka. Ango ako bedo kunono di oudo komia mugati acel buli ceng kame oudo kokelo ki kakame kotimo iye mugati, tuno mugati tiek i bomba lung. Aso ango ako dong bedo i diakal me paco me abaka.