Yeremia 36 - Baibuli I Leb Kumam 2013

Baruk Osomo Itabu Adola i Tempulo

¹ I mwaka me ongwon me apugan ka Abaka Yekoyakim wot ka Yosia me Yuda, Rwot oko waco na be,

² “Yeremia, kwany itabu adola di iko wandiko iye kope dedede kame ango atieko waco ni i kom Isirael kede Yuda kede atekerin dedede, cako i ceng kame ango ayamo kedi i kare ka Yosia tuno tin.

³ Cengemogo ka jo me Yuda owinyo kop i kom can kame ango atie mito timo negi, gin dedede kibino lokere di kiko weko yote areco me kuo gi, tetekeny ango asasiro gi ki gikareco gi kede ki dub gi.”

⁴ Di ango ako lwongo Baruk wot ka Neria, di ako waco ne kope dedede kame oudo Rwot owaco na, di Baruk oko wandiko gi i itabu adola.

⁵ Di do ango ako ciko Baruk di awaco ne be, “Ogenga donyo i ot ka Rwot;

⁶ aso, ango amito in kikomi i ot kunono i ceng kame jo tie kanyo kede kec, di in iko somo kope ka Rwot kame oudo ango awaco ni di iko wandiko i itabu adola. In miero isome i ot ka Rwot di jo dedede winyo, kiton jo dedede me Yuda kowok ki bomban gi dedede.

⁷ Cengemogo kibino kwano Rwot, di gin dedede kiko lokere kiweko yote areco me kuo gi, pien Rwot otieko waco kop atek me gero kede me lilo mere i kom jo nogi.”

⁸ Baruk wot ka Neria oko timo gi dedede kame oudo ango awaco ne i kom kop amako somo kop ka Rwot ki itabu adola i ot ka Rwot.

⁹ I duwe me kanyangon i mwaka me kany me apugan ka Abaka Yekoyakim wot ka Yosia me Yuda, jo dedede me Yerusalem kede jo dedede kobino Yerusalem di kiwok ki bomban me Yuda oko bedo kanyo kec i nyim Rwot.

¹⁰ Di Baruk oko somo ki itabu adola nono kope kame oudo ango awaco di jo dedede winyo. En esomo kope nogo i ot ka Rwot, i agola ka Gemaria wot ka Sapan, kame oudo obedo kalani. Agola nono oudo tie i diakal kame bin tie malo, i nget Erute Kanyen me tempulo.

Baruk Osomo Itabu Adola but Jodongo

¹¹ Kakame Mikaya wot ka Gemaria, en akwar Sapan, oko winyo kede kope ka Rwot dedede kame Baruk oudo osomo ki itabu adola,

¹² en eko ot i ot ka abaka, i agola me kalani, kakame oudo jodongo dedede oudo tie bedo iye. Elisama kalani, Delaya wot ka Semaya, Elinatan wot ka Acibor, Gemaria wot ka Sapan, Esedekia wot ka Kanania, kede jodongo apat dedede oudo tie kunono.

¹³ Di Mikaya oko waco ne gin kope dedede kame en oudo ewinyo, kakame Baruk oudo somo kede itabu adola di jo dedede winyo.

¹⁴ Di do jodongo oko ooro Yekudi (wot ka Netania, akwar Selemia, doko en akwar me are ka Kusi) pi ot waco ne Baruk kelo itabu adola kame oudo en esomo ne jo. Aso, Baruk wot ka Neria oko kwanyo itabu adola nono di eko tere but gi.

¹⁵ Gin kiko waco ne be, “Bed piny di iko somo ne wan itabu adola nono.” Aso, Baruk di oko timo bala kame gin kiwaco.

¹⁶ Kakame gin kiwinyo kede kope dedede, lworo oko mako gi di kiko donyo nenere ken gi ken gi, di gin kiko waco ne Baruk be, “Wan miero owac ne abaka kope nogi dedede.”

¹⁷ Di do gin kiko penyo Baruk be, “Wace wan, in ituno wandiko kope nogi dedede benyo benyo? Yeremia en kowaco ni di in iwandiko gi, arabo benyo?”

¹⁸ Baruk oko gamo be, “Yeremia en owaco nango kope nogi dedede, di ango ako wandiko gi kede bwino i itabu adola noni.”

¹⁹ Di do jodongo oko waco ne Baruk be, “Oti iko pwono, in kede Yeremia, doko kur imiunu ngatamoro ngei kakame itienu iye.”

Abaka Owango Itabu Adola

²⁰ Jodongo oko keto itabu adola nono i agola ka Elisama kalani, di gin kiko ot i diakal me abaka, di kiko waco ne abaka kope nogo dedede.

²¹ Di do abaka oko ooro Yekudi pi ot kelo itabu adola nono. Yekudi oko kwanyo itabu nono ki agola ka Elisama kalani di eko some ne abaka kede jodongo dedede kame oudo tie cungo i nget abaka.

²² Kare nono oudo obedo kare me ngico me piny (oudo manono obedo duwe me kanyangon); abaka oudo tie bedo paco mere me kare me ngico me piny, di mac kodop tie i nyime.

²³ Kikano, ka Yekudi oudo otieko somo adulion adek arabo ongwon, abaka oudo ko ngolo gi tenge kede pala katitidi di eko uco gi i mac. En ebedo timo kamanono tuno tieko wango itabu adola nono dedede.

²⁴ Abaka karacel kede jotic mege kame oudo oko winyo kope nogi dedede likame oko bedo kede lworo moro arabo nyinyilo igoen ki kom gi pi nyuto cwercuny.

²⁵ Bed bala Elinatan, Delaya, kede Gemaria oudo oko ngangao abaka be kur koto ewango itabu adola nono, do en eko dagi winyo kop gin.

²⁶ Di abaka oko mino cik but wode Yeramel kede Seraya wot ka Asiriel kede Selemia wot ka Abidel pi gin mako Baruk kalani kede ango. Do Rwot oudo okano wan.

Yeremia Owandiko Itabu Adola Ace

²⁷ Ingei Abaka Yekoyakim wango itabu adola kame oudo ango awaco kope mege di Baruk wandiko, Rwot oko waco na

²⁸ be akwany itabu adola ace di ako wandiko iye kope dedede kame oudo tie i itabu me agege, kame abaka Yekoyakim me Yuda oudo owango.

²⁹ Rwot owaco na be awac ne Abaka Yekoyakim me Yuda be, “In iwango itabu adola nono di ipenyo pinyo komio Yeremia owandiko iye be abaka me Babilon ateteni bino bino di eko muducaro lobo noni, di eko neneko jo mege kede leini da.

³⁰ Pi mano, ango Rwot awaco ne in Abaka Yekoyakim me Yuda be, likame tie akwari moro kame bino lunyo kom me ajakanut ka Daudi, doko liel nin kobino uco obar ceng ko donyo wange i iceng, di ngico me piny ko donyo rumakino en iwor.

³¹ Ango abino mini alola, in kede ikwae ni, kede jotic ni pi dub wu. Abino kelo i komu, kede i kom jo kame bedo Yerusalem, kede jo me Yuda, can dedede kame oudo awaco be abino keto i komu, pien wun idagunu winyo kope na.”

³² Di ango bobo ako kwanyo itabu adola ace di ako mino but kalani Baruk wot ka Neria, di en eko wandiko kope dedede kame oudo ango awaco. En ewandiko kope dedede kame oudo tie i itabu adola me agege kame oudo Abaka Yekoyakim owango, di oko medo kope ace kame oudo cal bala me agege.