Yeremia 35 - Baibuli I Leb Kumam 2013

Yeremia kede Jo Rekab

¹ I kare kame Yekoyakim wot ka Yosia oudo en abaka me Yuda, Rwot oko waco na be,

² “Oti but jo Rekab, di iko yamo kede gi iko kelo gi i tempulo i agola acel, di iko mino gi bwini pi mato.”

³ Manono oko mino ango ako kwanyo Yasania (wot ka Yeremia apat kobedo wot ka Kabasinia) kede imiegu mege, kede awobe mege dedede, kede jo Rekab dedede.

⁴ Ango ako tero gi i ot ka Rwot i agola me josiao ka Aanan wot ka Igidalia, dano ka Rubanga. Agola nono oudo tie malo i wi agola ka Maseya wot ka Salum, ngat kame bin daro ekeko kalac me ot ka Rwot, doko oudo etie i iyapiyapi kede agolai me jodongo apat.

⁵ Di ango ako cibo cupan kopong kede bwini, kede ikopon i nyim jo Rekab, di ako waco negi be, “Matunu bwini.”

⁶ Do gin kiko gamo be, “Wan likame omato bwini, pien kwaru wa Yonadab wot ka Rekab ociko wa be kur omat bwini, wan kede ikwae wa.

⁷ En eciko wa da be kur oger ude arabo opur cam, akadi pito olok, arabo bedo tie kede poto moro me olok, do miero obed i kimere pi kare me kuo wa lung, tetekeny obed i lobo kame otie iye tieko kare kalac.

⁸ Wan olubo cik dedede kame kwaru wa Yonadab wot ka Rekab omio wa. Wan karacel kede mon wa, awobe wa kede anyira wa, likame omato bwini,

⁹ doko likame ogero ude kame obedo iye. Wan oli kede poti me olok arabo poto moro amoto kodere mogo;

¹⁰ do wan obedo i kimere, doko obedo lubo gi dedede kame kwaru wa Yonadab oudo ociko ne wa.

¹¹ Do i kare kame Abaka Nebukadunesa me Babilon osuro kede piny wa, wan oudo oko waco be, ‘Bia ootunu Yerusalem tetekeny obwotunu ki cing isirikalen me Babilon kede me Siria.’ Manono en omio wan otie bedo Yerusalem.”

^12-13 Di Rwot me jo yi, Rubanga me Isirael oko waco na be aoti di ako waco ne jo me Yuda kede jo me Yerusalem be, “Ango Rwot apenyo wu pinyo komio wun likame ikarununu pwonyere di ikounu lubo kope na.

¹⁴ Yonadab wot ka Rekab bin omio awobe mege cik be kur kimat bwini di gin kiko lubo cik mere nono. Tuno tin gin likame kimato bwini pi lubo cik kame kwaru gi bin omio. Do ango abedo yamo kede wu nakanaka, do wun likame ilubunu kop na.

¹⁵ Ango abedo cwano inabin jotic na dedede but wu pi gin waco ne wu kop me lokere di ikounu weko yote me kuo wu areco di ikounu donyo timo gikame poore. Gin kibedo kwenyaro wu pi weko woro rubangan ace akadi timo negi tic tetekeny imeedenu kede bedo i lobo kame bin ango amio wu kede joakwari wu. Do wun likame ikounu winyo kop na arabo timo gikame ango awaco.

¹⁶ Ikwae ka Yonadab wot ka Rekab obedo lubo cik kame kwaru gi bin omio, do wun likame ilubunu kop na.

¹⁷ Pi mano, ango Rwot me jo yi, Rubanga me jo me Isirael abino kelo i kom jo me Yuda kede jo kame bedo Yerusalem can me epone dedede kame ango atieko waco i kom gi. Ango abino timo manoni pien ango abedo yamo kede gi do gin likame kiwinyo kop na, ango alwongere but gi do gin likame kigamo doga.”

¹⁸ Di ango ako waco ne jo Rekab be Rwot me jo yi, Rubanga me jo me Isirael owaco be, “Wun ibedunu lubo cik kame kwaru wu Yonadab omio wu; igwokunu kope kame en ewaco dedede di ikounu timo gi dedede kame en oudo eciko ne wu,

¹⁹ pi mano, ango Rwot me jo yi, Rubanga me jo me Isirael awaco be, i kare dedede Yonadab wot ka Rekab bino bedo kede akware moro kame timo na tic.”