Yeremia 33 - Baibuli I Leb Kumam 2013

Cikere Ace kame Mio Jo bedo kede Gen

¹ Rwot bobo oko yamo keda di pwodi oudo ango atie bala mabus i diakal me paco me abaka.

² Rwot ngat kocweo lobo, ngat kotime di eko kete kare oyamo keda. En ngat kame nyinge obedo Rwot owaco be,

³ “Lwongere buta di ango ako bino gamo dogi, di ako bino tatamo ni kope adongodongo komungere, kalikame in pwodi ingeo.

⁴ Ango Rwot, Rubanga me jo me Isirael ayamo i kom ude me bomba noni kede i kom ude me abakai me Yuda kame korereto piny pi gengo jo koluko bomba yito ki wi apama me cel.

⁵ Jo Babilon tie bino yi di kiko pongo ude nogo kede liele me jo kame ango abino neko pi lilo na atek, pien ango atieko weko bomba noni pi tim dedede areco me jo mege.

⁶ Akadi kamanono da, ango abino kelo yotkom kede cango i bomba noni; abino cango jo mege ki peko gi di ako mino gi kibedo kede mulem adwong kede anapakin.

⁷ Ango abino dwoko winyo me Yuda kede winyo me Isirael, di ako gero gi adwoko gi i kite kame oudo kitie kede sek.

⁸ Abino lwoko tenge dub gi kame oudo kitimo buta, di ako sasiro dub gi dedede kiton jemo gi.

⁹ Di bomba noni ko bino bedo gikame kelo nango kilel, pak kede dwongo i nyim atekerin me wi lobo ka gin kiwinyo kop i kom jamini abeco dedede kame ango atimo ne jo mege; gin kibino winyo di lworo ko mako gi pi jamini dedede abeco kede mulem kame ango amie.”

¹⁰ Rwot waco be, “Jo tie waco be kabedo noni odoko ameje kame jo akadi leini da li iye. Do i bomban me Yuda kede i yote me Yerusalem kame nataman odong nono nogo, kame jo akadi leini da li iye,

¹¹ bino winyere iye dwan jo kame lelemo kede kilel, dwan jo kame tie i ebaga me nyom, kede dwan jo kame tero giamia gi i ot ka Rwot di kiwero be, “‘Pwounu Rwot me jo yi, pien Rwot ber, doko amara mere kalikame lokere bedo nakanaka.’ “Pien ango ayaro dwoko mulem me lobo noni i kite kame oudo etie kede sek, ango Rwot en awaco.”

¹² Rwot me jo yi waco be, “I kabedo noni kame nataman tie ameje, kame jo akadi leini da li iye, amel kame romini urako iye bino bedo tie iye kede i bomban mege dedede.

¹³ Jokwai romini bino bobo maro wel me romini gi i bomban me piny kobedo mori mori, i bomban kame tie piny i dud mori, i bomban kame tie i bad tetu piny me Yuda, i adul me jo ka Benjamin, i calere koluko Yerusalem, kede i bomban me Yuda. Ango Rwot en awaco.”

¹⁴ Rwot waco be, “Kare bino tuno kame ango abino cobo kede cikere na but jo me Isirael kede jo me Yuda.

¹⁵ I kare nono ango abino yero akwar Daudi acel kopoore di en eko bino tero jo kiber i yore kopoore i lobo dedede me jo me Isirael.

¹⁶ Kobino lako jo me Yuda, doko Yerusalem bino bedo kede anapakin. Nying kame kobino lwongo kede Yerusalem en ine be, ‘Rwot timo ne wa gi kopoore’.

¹⁷ Pien Rwot waco be likame tie kare moro kame Daudi bino bedo kede abongo akware moro kame lunyo ajakanut mere i Isirael,

¹⁸ doko i kare dedede josaseredoti Jolebi bino bedo tie pi timo tic buta kede pi mino giayala awanga, giayala me alos, kede giayala angola.”

¹⁹ Rwot oko waco na be,

²⁰ “Ka ngatamoro kikom wu karuno turo isikan kame ango atimo kede iceng arabo isikan kame ango atimo kede iwor di eko gengo gin bedo tie i esawa kame poore negi,

²¹ manono udo nyuto be isikan nango kede ngatic na Daudi da romo tur, di Daudi likame ko bino bedo tie kede akware moro kame lunyo ajakanut mere, doko isikan nango kede jotic na Jolebi da romo tur.

²² Ango abino medo wel me ikwae ka ngatic na Daudi kede wel me josaseredoti Jolebi, di maro wel gi likame ko twerere bala kalikame kokaruno maro kede acerin kame tie i edou kede pimo rom me asinge kame tie i dog nam.”

²³ Rwot oko waco na be,

²⁴ “Benyo, mam in itieko winyo kop kame jo tie waco be ango atieko dagi jo me Yuda kede Isirael, jo me ikekon are kame oudo ango ayero, kede kite kame gin kineno kede jo na kede acae di likame bobo kitero gi bala ateker?

²⁵ Do ango Rwot, bala kame atieko timo isikan kede iceng kede iwor, kede atieko timo iswilia amako malo kede lobo,

²⁶ kamanono da ango likame abino dagi ikwae ka Yakobo kede me ka ngatic na Daudi. Ango abino yero ngat acel kikom ikwae ka Daudi pi bedo ngapug me ikwae ka Aburaam, Isaka, kede Yakobo. Pien ango abino dwoko mulem gi, di ako bedo kede kisa but gi.”