Yeremia 32 - Baibuli I Leb Kumam 2013

Yeremia Owilo Poto

¹ Rwot bin oko yamo keda i mwaka me tomon me apugan ka Abaka Esedekia me Yuda; mwaka nono da en kame oudo obedo mwaka me tomon kiwie kanyauni me apugan ka Abaka Nebukadunesa me Babilon.

² I kare nono oudo isirikalen me abaka me Babilon tie luko Yerusalem, di ango oudo atie mabus i diakal me paco me abaka me Yuda.

³ Abaka Esedekia oudo otwea kunono pien oudo ango atie waco ne jo kop kame Rwot owaco be, “Ango ayaro mino bomba noni i cing abaka me Babilon di en eko bino mane;

⁴ Abaka Esedekia likame bino bwot, do ateteni kobino mine i cing abaka me Babilon di en eko bino neno abaka nono wang ki wang, di eko yamo kede en kikome.

⁵ Kobino tero Esedekia Babilon di eko bino dong kunono tuno ango neno kop mere. Akadi en eyi kede jo Babilon benyo, likame en ebino twero bwono gi. Ango Rwot en awaco.”

⁶ Rwot oko waco na be

⁷ Kanamel wot ka neru na Salum oyaro bino buta di eko waco be, “Wil poto na kame tie Anatot, pien in en wad na kame tie kede twero me wile.”

⁸ Di Kanamel wot neru na oko bino buta i diakal kunono bala kame Rwot oudo owaco, di eko waco na be, “Wil poto na kame tie Anatot i lobo me jo Benjamin, pien in en itie kede twero me wile dwoke di eko doko meri; wile piri.” Manono oko mina angeo be manoni oudo obedo kop ka Rwot.

⁹ Ango ako wilo poto nono kibut Kanamel wot neru na, poto kame bin tie Anatot. Apimo ne sekel tomon kiwie kanyaare me siliba.

¹⁰ Ango ako keto cinga i papula kame nyuto wil wa di ako mwone kede emina di ako keto iye alama na; ako udo ijurak, di oko pimo sente kede misani.

¹¹ Di ango ako tero papula kame oudo omwono nono kede kalikame komwono mere, papulan kame nyuto wil wa nono;

¹² di ako mino gi but Baruk wot ka Neria, en akwar Maseya. Ango amio gi bute di Kanamel wot neru na tie, ijurak kame bin oketo cing gi i papula kame nyuto wil wa nono da oudo tie, karacel kede Iyudayan kame bin tie bedo i diakal kanono.

¹³ Ango ako waco ne Baruk di gin dedede kitie be,

¹⁴ “Rwot me jo yi, Rubanga me jo me Isirael owaco be iter papulan are nogi kame nyuto wil, papula kame komwono mere kede kalikame komwono, di iko keto gi i agulu, tetekeny kikaruno bedo tieko kare kalac.

¹⁵ Pien Rwot me jo yi, Rubanga me jo me Isirael owaco be ude, poti, kede poti me olok kame tie i lobo noni kobino bobo wilo.”

Ilega ka Yeremia

¹⁶ Ingei ango mino papulan me wil nogo but Baruk wot ka Neria, ango ako kwano Rwot be,

¹⁷ “Okwe Rwot Rubanga, in icweo malo kede piny kede twer nin adwong kede teko ni! Likame tie gimoro kalikame twerere kibuti.

¹⁸ In itieko nyuto amara nin kalikame lokere but jo tutumian kede tutumian, doko in imio alola da but jo pi dub kame jonywal gi otimo. In en Rwot Rubanga kame itie kede twer kede teko adwong; in en kame nyingi obedo Rwot me jo yi.

¹⁹ Iik kame in itimo obedo me aura twatwal, doko in itimo jamini adongodongo. In ineno gi dedede kame jo timo doko iculo dano acelacel di lubere kede ekite me kuo mere kede tice mege.

²⁰ In bin itimo gianena kede jamini me aura i lobo me Misiri, doko in pwodi itie timo gi tuno tin i Isirael kede i diere me jo dedede, manono omio in ingere i kabedere dedede tuno tin.

²¹ In bin ikwanyo jo ni me Isirael ki lobo me Misiri di itio kede gianena kede giaura, kede teko kede twer kame oudo kelo lworo.

²² In iko mino gi lobo noni, kame in bin ikwongere pire but joakwari gi be ibino mino gi, lobo alac di emio.

²³ Gin bin kiko donyo i lobo noni di kiko game edoko mergi. Do gin bin likame kiko lubo kop kame in iwaco negi arabo lubo iswilia ni; likame kitimo gimoro akadi acel kikom gi dedede kame bin in iciko negi. Pi mano, in itieko mino can nogi dedede opoto i kom gi.

²⁴ Neningo, jo me Babilon otieko luko bomba pi mane. Peko me yi, kec, kede tuwo kame bino bedo tie i bomba bino mino komio bomba i cing gi. Gikame in oudo iwaco otieko timere, bala kame ida kikomi itie neno.

²⁵ Aso di in, Okwe Rwot Rubanga, oudo iwaco na be awil poto kede sente di ako udo ijurak, bed bala jo Babilon oyapuno mako bomba.”

²⁶ Di Rwot oko waco na be,

²⁷ “Neningo, ango en Rwot, Rubanga me jo dedede. Likame tie gimoro kalikame twerere kibuta.

²⁸ Pi mano, ango ayaro mino bomba noni i cing Abaka Nebukadunesa me Babilon kede isirikalen mege di gin kiko mane,

²⁹ kiko wange kede mac. Gin kibino wange karacel kede ude kame jo oudo mio iye giayala but Baal i wi gi malo, kede giayala amata but rubangan apat, pi wango cunya.

³⁰ Pien jo me Isirael kede jo me Yuda obedo timo gikareco i nyima cako i kare me ageini gi; gin kibedo wango cunya kamanono kede tice gi.

³¹ Jo me bomba noni obedo wango cunya di kimio lilo maka kede gi cako i ceng kame kogere kede tuno tin, manono en komio ango abino muducaro en,

³² pi gikareco kame jo me Isirael kede me Yuda obedo timo, gin karacel kede abakai gi, jotel gi, josaseredoti gi kede inabin gi.

³³ Gin kitieko loko nango ngei gi; bed bala ango abedo pwonyo gi di likame adok cen kiye, gin likame kiko lubo pwony nono doko likame kiyei be riei gi.

³⁴ Gin kiketo jamini me kwer i ot kame kowora iye di kiko munao en.

³⁵ Gin kitieko gero ne Baal alutarin i aditot ka wot ka Kinom, me mino idwe awobe gi kede anyira but rubanga Molek. Ango likame oudo aciko gi be kitim kamanono, doko likame oudo gikacal kamanono obino i tam na be gin kibino timo gi me kwer kacal kamano di kiko mino jo me Yuda timo dub.”

Cikere ka Rubanga pi Jo bedo kede Gen

³⁶ Rwot Rubanga me jo me Isirael oko waco na be, “Yeremia, jo tie yamo i kom bomba noni be kec kede tuwo en koyaro mino abaka me Babilon mao bomba noni; do ango atie waco kaman:

³⁷ ango ateteni ayaro coko gin dedede ki lobere kame oudo ango asasaro gi iye pi wang cunya, lilo kede gero atek kame oudo atie kede; ango abino dwoko gin kabedo noni di ako mino gin kibedo iye kede anapakin.

³⁸ Gin kibino bedo jo na di ada ako bedo Rubanga gin.

³⁹ Abino mino gin kiketo cuny gi kede tam gi i gi acel kenekene, en gin bedo kede lworo buta pi kare dedede, tetekeny kiud bero pirgi kede pi idwe gi kede ikwae gi.

⁴⁰ Ango abino timo kede gin isikan kame bedo nakanaka, likame abino weko timo bero but gi; abino mino gin kibedo kede cuny me wor buta, tetekeny kur kilokere tenge kibuta.

⁴¹ Cunya bino bedo yom pi timo ne gin bero, doko ateteni abino keto gin i lobo noni kibedo iye atwal, abino timo kamanono kede cunya dedede.

⁴² “Bala kame ango akelo kede can adongodongo nogi i kom jo nogi, kamanono da ango abino kelo ne gin jamini dedede abeco kame ango atieko cikere iye.

⁴³ Jo bino bobo wilo poti i lobo noni kame nataman wun itienu yamo i kome be etieko doko ameje, kakame jo akadi leini da li iye, pien kotieko mine i cing jo Babilon.

⁴⁴ Jo bino bobo wilo poti kede sente, di gin kiko bino keto cing gi i papulan kame nyuto wil di kiko keto alama gi i papulan nogo di ijurak tie. Manoni bino timere i lobo me jo ka Benjamin, i calere koluko Yerusalem, i bomban me Yuda, i bomban me piny kobedo mori mori, i bomban kame tie piny i dud mori, kede i adul kame tie i bad tetu piny me Yuda; pien ango abino dwoko ne gin mulem gi. Ango Rwot en awaco.”