Yeremia 28 - Baibuli I Leb Kumam 2013

Yeremia kede Enabi Kanania

¹ I duwe me kany me mwaka me ongwon me apugan ka Abaka Esedekia me Yuda, manono en kare me acakini me apugan mere, enabi Kanania wot ka Asur kame bin wok ki Gibeon oko yamo na kop i ot ka Rwot. En ewaco na di josaseredoti kede jo dedede da tie be

² Rwot me jo yi, Rubanga me Isirael owaco be, “Ango atieko tuturo twer kame abaka me Babilon tie kede i komu bala ayoko.

³ I kare me mwakini are ango abino dwoko kanoni jamini dedede me tempulo, kame Abaka Nebukadunesa okwanyo ki kanoni di eko tero gi Babilon.

⁴ Doko da abino dwoko kanoni Abaka Yekoyakin wot ka Yekoyakim, en abaka me Yuda; abino dwoke en karacel kede jo dedede kame bin komako ki Yuda di oko tero gi Babilon. Ango abino tuturo twer kame abaka me Babilon tie kede i komu bala ayoko.”

⁵ Di ango ako waco ne Kanania i nyim josaseredoti kede jo dedede kame oudo tie cungo i tempulo be,

⁶ “Okwe koto ya! Akwao be koto Rwot omio gikame iwaco ocobere, di eko dwoko kanoni jamini me tempulo ki Babilon, karacel kede jo dedede kame komako di oko tero obukui kunono.

⁷ Do kong winy gikame ango atie waco ni karacel kede ne jo.

⁸ Inabin kocako bino nin kede nango bin omurao be yi, kec, kede aumpuli bino poto ne atekerin atot kede ne ajakanuto atek.

⁹ Do enabi kame murao kop me anapakin kobino ngeno be Rwot en kocwae ka gikame en ewaco ocobere kakare.”

¹⁰ Di enabi Kanania oko kwanyo ayoko ki nguta di eko tuturo en,

¹¹ di eko waco i nyim jo dedede be, “Rwot owaco be epone noni en kame en ebino tuturo kede ayoko kame Abaka Nebukadunesa me Babilon oketo i ngut atekerin; en ebino timo manoni i kare me mwakini are.” Di ango ako gira yai aoto.

¹² I ngei kare moro Rwot oko waco nango

¹³ pi ot waco ne Kanania be, “Rwot owaco be in ituturo ayoko kame kotimo kede yat, do manono bino mino kolunyo wange kede ayoko kame kotimo kede nyonyo ayon.

¹⁴ Pien Rwot me jo yi, Rubanga me Isirael owaco be en ebino keto ayoko me nyonyo ayon i ngut atekerin nogi dedede, di gin kiko bino timo tic ne Abaka Nebukadunesa me Babilon, doko ateteni kibino timo ne tic. Rwot owaco be ebino mino kiton leini be obar da timo tic ne Nebukadunesa.”

¹⁵ Ango ako meede waco ne Kanania be, “Winyi, Kanania! Rwot likame ocwai, nan in itieko mino jogi oketo gen gi i kom kop me abe.

¹⁶ Pi manono, Rwot owaco be en ebino kwanyo kuo ni ki wi lobo. In ibino to di pwodi mwaka noni likame ongetakin, piento in isupo jo pi jemo ne Rwot.”

¹⁷ I mwaka nono i duwe me kanyaare, enabi Kanania oko to.