Yeremia 26 - Baibuli I Leb Kumam 2013

Kopido Yeremia i Ekiko

¹ I kare me agege me apugan ka Abaka Yekoyakim wot ka Yosia bala abaka me Yuda,

² Rwot oko waco na be, “Cungi i diakal me tempulo di iko waco ne jo me bomban dedede me Yuda kame bino kuno pi wora, kop kame ango aciko ni waco. Kur iwek kop moro.

³ Pien cengemogo jo bino winyo di kiko weko yote gi areco, di ango ako bino loko tam na aweko iik me kelo can i kom gi pi tice gi areco.”

⁴ Rwot owaco na pi waco ne jo be en ewaco be, “Ka wun likame iyeunu winyo kop na di ikounu lubo iswilia kame ango atieko mino wu,

⁵ kede ka likame iyeunu winyo kope me jotic na inabin kame ango abedo cwano butu kare i kare, bed bala wun itiekunu dagi winyo kope gi,

⁶ manono bino mino atimo ne tempulo noni gikame atimo Silo, di ako bino mino atekerin dedede me wi lobo tio kede nying bomba noni me timo ilam.”

⁷ Josaseredoti, inabin kede jo dedede owinyo di ango awaco kope nogi i tempulo.

⁸ Cucuto di ango atieko waco gikame Rwot oudo ociko na pi yamo, gin kiko maka di kilelemo be, “Ibino to pi kop noni!

⁹ Pinyo komio in iwaco i nying Rwot be tempulo noni bino doko bala Silo, kede be bomba noni bino doko ameje abongo ngatamoro abedo iye?” Jo dedede oko cokere oluka i tempulo.

¹⁰ Kakame jotel me Yuda owinyo kede gikame otimere, gin kiko yai ki ot me abaka di kiko ot i tempulo, kiko bedo i kabedo gi i Erute Anyen pi ekiko.

¹¹ Di do josaseredoti kede inabin oko waco ne jotel kede jo dedede be, “Icuo ni kopoore ngolo ne kop me to, piento en etieko waco kop arac i kom bomba wa, bala kame wuda itiekunu winyo kede yitu.”

¹² Ango ako waco ne jotel nogo kede ne jo dedede be, “Rwot en kocwa waco kope dedede kame wun itiekunu winyo di ango awaco i kom tempulo noni kede i kom bomba noni.

¹³ Pi manono, nan lokunu ekite me kuo wu kede tice wu, di ikounu lubo gikame Rwot Rubanga wu waco ne wu, di Rwot ko bino loko tam mere eweko kelo ne wu can kame oudo ewaco be ebino kelo i komu.

¹⁴ Do i kom kop amaka, ango gira atie i cingu. Wun timunu nango gikame inenunu be ber kede kopoore.

¹⁵ Do kenekene ngeunu kiber be, ka inekanu udo wun karacel kede jo me bomba noni itienu kede raco me neko dano ali kede raco moro. Pien i ateteni, Rwot en kocwa butu pi waco ne wu kope nogi.”

¹⁶ Di jotel kede jo dedede oko waco ne josaseredoti kede inabin be, “Icuo ni owaco ne wa kop i nying Rwot Rubanga wa; likame kopoore neke.”

¹⁷ Di do joadongo mogo oko cungo di kiko waco ne jo koudo ocokere be,

¹⁸ “I kare kame Esekia en oudo obedo abaka me Yuda, enabi Mikaa me Moreset oko waco ne jo dedede me Yuda be Rwot me jo yi oudo owaco be, “ ‘Kobino boko Sion bala poto; Yerusalem bino doko atukit me ude kame kodudubo, di emukura kame tempulo tie iye ko doko abum.’

¹⁹ “Abaka Esekia kede jo me Yuda likame oko neko Mikaa. Do akaka manono Esekia oko bedo kede lworo but Rwot di eko tamakino pi mino cuny Rwot bedo yom i kome. Rwot oko loko tam mere i kom can kame oudo ewaco be bino poto negi. Do nan wan oyapununu kelo can adwong i kom wa kenwa.”

²⁰ (Oudo tie bobo icuo ace, Uria wot ka Semaya me Kiriat Yearim, kame bin owaco kop me can kame oudo poore poto i bomba noni kede i lobo noni, di cal acala kede kop kame Yeremia owaco.

²¹ Kakame Abaka Yekoyakim kede isirikalen mege kede jotic mege dedede owinyo kede kop kame Uria owaco, abaka oko mito neke. Do Uria oko winyo kop nono di lworo oko make di eko ringo eoto Misiri.

²² Abaka Yekoyakim oko cwano Elinatan wot ka Acibor karacel kede cuo mogo i lobo me Misiri pi omo Uria.

²³ Gin kiko kele kidwoke but Abaka Yekoyakim, di abaka oko neke kede epima di oko uco kome kakame koyiko iye jo raya.)

²⁴ Do Akikam wot ka Sapan oko bedo gwoka, di likame eko yei pi mina i cing jo pi neka.