Yeremia 25 - Baibuli I Leb Kumam 2013

Jokwor me Bad tetu Malo

¹ I mwaka me ongwon me apugan ka Yekoyakim wot ka Yosia, di en oudo abaka me Yuda, Rwot oko waco na kop i kom jo me Yuda. (Manono oudo obedo mwaka me agege me apugan ka Abaka Nebukadunesa me Babilon.)

² Ango ako waco kop nono ne jo dedede me Yuda kede ne jo kame bedo Yerusalem be,

³ “Pi mwakini ot are kiwie adek, cako i mwaka me tomon kiwie adek di Abaka Yosia wot ka Amon en apugo Yuda, cako i kare nono tuno tin Rwot obedo yamo keda di ada ako bedo waco ne wu gikame en ewaco na abongo weko, do wun ikounu dagi winyo.

⁴ Bed bala Rwot obedo cwano ne wu jotic mege inabin kare kede kare, do wun ikounu dagi winyo kope gi akadi ciko iye yitu.

⁵ Gin kibedo waco ne wu be, ‘Nan ngat acelacel kibutu lokere tenge ki yote kede ki tice wu areco, tetekeny ikounu bino meede bedo i lobo kame Rwot omio butu kede joakwari wu pi bedo meru me atwal.

⁶ Kur iworunu amoto itiunu ne rubangan apat, doko da kur iwangunu cuny Rwot i yore me woro caljwogi kame itimunu. Manono bino mino likame etimo ne wu can moro.’

⁷ Do Rwot kikome waco be wun likame ikounu yei winyo kop mere, do akaka manono wun ikounu lokere wango cunye i yore me wun woro caljwogi kame itimunu, di manoni oko mino ikelunu peko i komu kenu.

⁸ “Pi manono, Rwot me jo yi waco be, ‘Pi kite kame idagunu lubo kede kop na,

⁹ ango abino lwongo jo me bad tetu malo, kiton ngatic na Abaka Nebukadunesa me Babilon, di ako kelo gi yi kede lobo noni me Yuda kede jo kame bedo iye, kede atekerin kame kio kede. Ango abino muducaro ateker noni kede jokio mege atwal atwala, di ako mino gi kidoko gikame jo neno di kiko bedo kede lworo, kede kame jo winyao pi uro; kibino doko bala gikame kotieko dudubo pi kare lung.

¹⁰ Ango abino jiko woo me kilel, kede da icelakin me yomcuny me ibagai me nyom. Kide me riego alos likame bobo bino winyere, doko da italan likame bino liel i ude otieno.

¹¹ Lobo noni dedede bino doko bala ameje kame neno kelo ne jo lworo, di atekerin nogi dedede ko bino tic ne abaka me Babilon pi mwakini ot kanyaare.

¹² Di do ingei mwakini ot kanyaare, ango ako bino mino jo me Babilon alola karacel kede abaka gi pi dub gi. Ango abino dudubo lobo nono di ako weke di etie gikame kony mere li pi kare lung.

¹³ Ango abino kelo i lobo noni can dedede kame ango awaco be bino poto iye; can dedede kame kowandiko i itabu noni, can kame Yeremia owaco be bino poto i kom ateker acelacel.

¹⁴ Do abino da culo i kom jo me Babilon raco pi gi dedede kame kitimo; atekerin atot kede abakai adongo bino tero gi kidoko ipasoi.’ ”

Kop kame Rubanga Ongolo ne Atekerin

¹⁵ Rwot Rubanga me Isirael oko waco na be, “Gami ki cinga i kopo noni. Bwini kame tie iye obedo gero na. Tere but atekerin dedede kame ango acwai but gi di iko mino gi kimati.

¹⁶ Gin kibino mate di kiko donyo gete di wi gi odubere pi nek kame ango abino cwano i kom gi.”

¹⁷ Aso ango ako gamo ikopo ki cing Rwot, di ako mino atekerin dedede kame en ecwa but gi omato gikame tie iye.

¹⁸ Ako mino Yerusalem kede bomban dedede me Yuda, karacel kede abakai mege kede jotel mege oko mate, tetekeny kidok amejeko, lobo kame kony mere li, gikame jo neno di kiko winyao pi uro, kede gikame jo tio kede nying gi me ilam, bala kame etie kede tuno tin.

¹⁹ Jo apat da kame oudo poore mato gikame tie i ikopo nono gin ige: Parao abaka me Misiri, jotic mege kede jotel adongo, kede jo mege dedede;

²⁰ jo konyalere; abakai dedede me lobo me Us; abakai dedede me bomban atie Pilistia, gin en bomban me Asikelon, Gasa, Ekuron, kakodong me Asidod;

²¹ jo dedede me Edom, Moab, kede Amon;

²² abakai dedede me Taya kede Sidon, kede abakai me lobere me dog nam adwong me Mediterania;

²³ bomban me Dedan, Tema, Bus kede jo dedede kame lielo yer wi gi bedo cego;

²⁴ abakai dedede me Arabia kede abakai dedede me atekerin abedo i wi tim;

²⁵ abakai dedede me Simiri, abakai dedede me Elam, kede abakai dedede me Media;

²⁶ kede abakai dedede me tetu malo. Atekerin dedede kame tie i wi lobo, kame tie kakabor kede kame tie kakiyapi, gin dedede kipoore mato gikame tie i ikopo nono di lubere aluba. Di do ingei gin mato abaka me Sesak da ko mato.

²⁷ Rwot oko waco na pi waco negi be Rwot me jo yi, Rubanga me Isirael waco be, “Matunu tuno mer di ikounu ngokere, di ikounu popoto di likame doko ikounu twero yai, pi nek kame ango abino cwano i komu.”

²⁸ En eko waco na be, “Ka gin kiko dagi yei gamo ikopo ki cingi pi mato gikame tie iye, in ibino waco negi be Rwot me jo yi owaco be, ‘Miero imatunu!’

²⁹ Neningo ango atie kelo can di acako kede bomba na amaka, do benyo kame gin kiparo kede be kibino bwot likame kiudo alola? Likame gin kibino bwot ki alola, pien ango atie cwano nek i kom jo dedede kame bedo i wi lobo; ango Rwot me jo yi en awaco.

³⁰ “Pi manono, Yeremia poore in iwac negi kope nogi dedede. In ibino waco negi be, “ ‘Rwot bino dorano ki malo, en ebino woto dwane i kabedo mere kacil. En ebino dorano ne jo mege; en ebino lelemo bala jo atie nyonyono anyakini me olok pi bine. Jo dedede me wi lobo bino winye.

³¹ Ilelem mere winyere tuno i ajikini me wi lobo, pien Rwot tie kede pido i kom atekerin. En ebino pido jo dedede di eko neneko jo areco; Rwot en owaco.’ ”

³² Rwot me jo yi waco be can bino poto cako ki ateker acel tuno i apat di nyai anyaa; doko da yamo ager tie cokere kakabor me wi lobo.

³³ I ceng nono liele me jo kame Rwot oneko bino rade cako ki ajikini me wi lobo tetucel tuno tetu ocelu. Likame kobino koko gi, akadi coko gi amoto yiko gi. Gin kibino more i wi lobo bala woyo.

³⁴ Kokunu, wun jokwat me romini ka Rwot, kokunu kitek. Bebelunu i apua wun jotel me jo mege, pien ceng me neko wu otuno; ibinunu popoto di ikounu ngingidun bala agune.

³⁵ Wun jokwat me romini mege likame ibinunu twero ringo tenge, wun jotel likame ibinunu bwot.

³⁶ Winyunu koko me jokwai romini mege, winyunu dwilao me jotel gi! Pien Rwot tie dudubo lobo gi,

³⁷ Rwot otieko dudubo lobo kame anapakin oudo tie iye pi twon gero kame etie kede.

³⁸ Rwot oyai bala engu aweko kapwono mere; lobo gi oko lokere odoko bala wi tim pi yi agwai kede pi twon gero ka Rwot.