Yeremia 22 - Baibuli I Leb Kumam 2013

Kop ka Yeremia but Jo me Paco ka Abaka me Yuda

^1-2 Rwot owaco na pi ot lor piny i paco me abaka me Yuda, en ngaluny kom me pug ka Daudi, di ako waco ne abaka, jotic mege adongo, kede ne jo kame donyo di wok ki irutei me paco me abaka kope mege be,

³ “Ango Rwot atie waco ne wu be timunu gi me ateni kede kopoore. Lakunu ki cing ngat kame timo adiadia dano kame en etie timo ne kuwo. Doko da kur itimunu gimoro arac arabo ibedunu kede tim me gero but jokumbor, idwe kic kede apuserun, arabo neko dano moro ali kede kop i kabedo noni.

⁴ Ka ateteni wun ilubunu kop kame ango awaco ne wu, manono bino mino abakai kame lunyo kom ka Daudi me pug bedo tie nakanaka; gin karacel kede jotice gi adongo kede jo kame kipugo bino beo ki irutei me paco noni me abaka, di kiringo kede cabalan kede asigiran.

⁵ Do ka idagunu winyo kop na, ateteni ango akwongere be paco noni me abaka bino doko ameje; ango Rwot en awaco.

⁶ “Kibuta, paco me abaka me Yuda cil bala lobo me Gilead kede bala wi mori me Lebanon; do ango abino mine edoko bala wi tim, bomba kalikame ngatamoro bedo iye.

⁷ Ango atie iiko jo pi ot dudubo en; ngat acelacel bino mako le mere, di gin kiko tongotongo piny ipirin me yen seda abeco, di kiko uco gi i mac.

⁸ “Jo atot me atekerin apat bino beo kanono di kiko donyo penyere ken gi ken gi be, ‘Pinyo komio Rwot otimo gikame cal kamanoni ne twon bomba noni?’

⁹ Gin kiko bino dwoko be, ‘Piento gin likame kigwoko isikan kame Rwot Rubanga gi otimo kede gi, di kiko donyo woro kede tic ne rubangan ace.’ ”

Kop kame Yeremia Owaco i kom Yoakas

¹⁰ Wun jo me Yuda, kur ikokunu Abaka Yosia; kur ikokunu pi to mere. Do kokunu abaka kame komako kotero tenge, pien likame doko ebino dwogo, likame doko ebino neno lobo kame konywale iye.

¹¹ Rwot waco kop i kom Yoakas wot ka Yosia abaka me Yuda, en ngat kame elunyo kom ka papa mere Yosia, di nan eko yai atwal ki lobo noni, Rwot waco kop i kome be, “En likame bobo ebino dwogo kan,

¹² do en ebino to i piny kame komake kotere iye, likame bobo en ebino neno lobo noni.”

Kop kame Yeremia Owaco i kom Yekoyakim

¹³ Etie i can ngat kame timo ne jo tim kalikame poore pi gero ode, di eko timo gi kalikame tie kakare pi ropo goropa i wi ode nono; ngat kame mio dano bungo tic nono di eko dagi mine egelit.

¹⁴ Dano nono tie i can piento en ewaco be, “Ango abino gero ot adwong, di isengena mege me goropa lac.” Aso, en eko keto ne ot nono dirisan, di eko peto ebao me yat seda i kor apama i yi ot, di do eko cilo ot kede erangi akwar.

¹⁵ Benyo, in itie abaka be pien ude kame igero kede seda beco kalamo ude me jo apat? Papa nin bin camo kiber doko di emato da. En oudo etimo ne jo gikame tie kakare kede kopoore, di gi dedede oko bedo nen kiber.

¹⁶ En oudo engolo kop kiber ne jocan kede jo kame piny oloo, di gi dedede oko bedo nen kiber. Mam manono en ngeno Rwot?

¹⁷ Do gikame in itie neno kede kame cunyi tie iye en kenekene bedo kede ud piri keni; in ineko jo kame li kede kop, doko itero jo ni i yore karac kede gero.

¹⁸ Pi manono, Rwot owaco kop i kom Yekoyakim wot ka Yosia, abaka me Yuda kaman, “Ka eto, likame ngatamoro bino koke di ewaco be, ‘Okwe can omina! Okwe can!’ Ka eto likame ngatamoro bino koke di ewaco be, ‘Okwe rwot na! Okwe adwong na!’

¹⁹ Kobino yike bala ogwok; kobino wane tenge, di oko uce ooko me erute me Yerusalem.”

Yeremia Owaco kop me Can abino Poto Yerusalem

²⁰ Wun jo me Yerusalem, otunu ikokunu i wi mori me Lebanon, otunu iwololunu dwanu i lobo me Basan; otunu iboroborunu koko i wi mori me Abarim, pien kotieko bwono lobere kame konyo wu.

²¹ Rwot oyamo kede wu i kare kame oudo itienu kede i mulem, do wun ikounu dagi winyo kop mere. Manono obedo gikame wun ibedunu timo cako tino wu; likame wun pwodi itiekunu yei lubo kop ka Rwot.

²² Yamo bino buko jotel wu etero gi tenge; kobino tero jo akonyo wu bala mabus kame komako ki yi; di do lewic ko bino mako wu pi tim areco kame itimunu.

²³ Okwe in abaka kame kogero turi kede yen seda me Lebanon, ibino cur tin benyo kame lito opoto i komi, lito acal bala me dako atie ramere me nywal!

Kop kame Rubanga Ongolo ne Yekoyakin

²⁴ Rwot owaco ne Abaka Yekoyakin, wot ka Abaka Yekoyakim abaka me Yuda be, “Ateteni bala kame ango Rubanga akuo kede, akadi ka koto in oudo ibedo alung kame ango angapo i cinga tetu cam, kame nyuto be ango ngapug, oudo koto aboloco in

²⁵ di ako mini but jo apat kame in ilworo, gin jo kame mito neki. Koto ami i cing Abaka Nebukadunesa me Babilon kede i cing jo mege.

²⁶ Ango abino kwiti karacel kede toto ni i lobo me obukui; i lobo kalikame konywalo wu iye, di wun dedede ikounu bino to kunono.

²⁷ Likame ibinunu bobo dwogo i lobo noni bed bala ibinunu bedo kede mit me dwogo iye.”

²⁸ Ango ako penyere be, “Benyo, Abaka Yekoyakin otieko doko cal bala agulu oto kame kouco tenge, kalikame doko ngatamoro mito? Pinyo komio kokwite kede idwe mege i lobo me obukui, lobo kalikame gin oudo kingeo?”

²⁹ Okwe lobo, lobo, lobo! Winy gikame Rwot tie waco be,

³⁰ “Wandiko nying loni bala ngat kame li kede atin, dano kalikame gi dedede bino cobere ne kiber i kare me kuo mere; pien likame tie akware moro kame bino twero lunyo kom ka Daudi me pug di eko pugo lobo me Yuda; ango Rwot en awaco.”