Yeremia 19 - Baibuli I Leb Kumam 2013

Jagi Kongingidun

¹ Rwot owaco na be, “Oti iwil jagi kame kotimo kede lobo, di iko tero joadongo mogo kede josaseredoti ori i tic.

² Upere kede gi idonyunu ki Erute me Abalatigo di ikounu ot i Aditot me Kinom, di iko rabo kope kame ango abino waco ni kunono.”

³ Rwot oko waco na pi waco be, “Abakai me Yuda kede jo kame bedo Yerusalem, winyunu kop kame ango Rwot me jo yi, Rubanga me Isirael atie waco. Ango abino mino peko poto i kabedo noni di ngat acelacel kame bino winyo kome ko bino to.

⁴ Abino timo manoni pien jo otieko weka di kiko munao kabedo noni i yore me yalo kiye giayala but rubangan kame gin akadi joakwari gi, akadi abakai me Yuda likame ngeo. Doko da pien gin kineko jo atot kalikame tie kede kop moro kanoni,

⁵ di kiko gero ne Baal alutarin me wango idwe gi i mac bala giayala. Ango likame aciko gi pi timo kamanoni, doko oudo eli i tam na da.

⁶ Pi manono, ateteni kare tie bino kalikame kobino bobo lwongo kede kabedo noni be Topet arabo Aditot me Kinom; do kobino lwonge be Aditot me Nek.

⁷ I kabedo noni ango abino totolo iik dedede me jo me Yuda kede Yerusalem. Abino mino jokwor gi neneko gi; abino mino gi i cing jo kame tie mono kuo gi. Abino mino liele gi but winy kede leini me obar bala giacama.

⁸ Ango abino mino bomba gi doko gikame neno mio jo lworo; jo dedede kame beo iye bino nene di kiko bedo kede lworo di kiko uro pi can kopoto ne.

⁹ Abino mino jokwor luko bomba di kiko bino kelo ne jo twon peko, di jo ko donyo camo idwe gi kede jokio gi.”

¹⁰ Rwot oko waco na pi neko jagi i nyim jo koudo tie upere keda ingei ango waco ne jo kope nogo,

¹¹ di awaco negi be Rwot me jo yi owaco be, “Ango abino muducaro jogi kede bomba noni bala jagi kame kocweo kede lobo kame koneko, kalikame doko twero mwonere. Kobino yiko jo Topet paka alamar.

¹² Ango acikere be abino mino bomba noni kede jo kame bedo iye doko bala Topet.

¹³ Ude me Yerusalem kede ude me abakai me Yuda, kede ude dedede kame jo dunyo ne acerin bubani ki wi gi, kede kame kionyo kiye bwini piny bala giayala but rubangan, bino munaun bala Topet.”

¹⁴ Ango ako yai ki Topet kakame Rwot oudo oora iye yamo kop noni, di ako cungo i diakal me tempulo di ako waco ne jo dedede be

¹⁵ Rwot me jo yi, Rubanga me Isirael owaco be, “Nan ango atie kelo i bomba noni kede i bomban atitino kaluke can dedede kame ango atieko waco be bino poto negi, pien gin kipongo ngut gi kidagi winyo kop na.”