Yeremia 18 - Baibuli I Leb Kumam 2013

Yeremia i Ot ka Ngacwei Agune

¹ Rwot oko waco na be,

² “Oti ilor piny i ot me ngacwei agune, kakame ango abino mini kiye kop na.”

³ Ango ako ot i ot me ngacwei agune di ako ude etie tic kede itatany mege me cwec.

⁴ Tek kame agulu kame oudo etie cweno odubere, en oudo enyongo lobo me cwec nono di eko lokere time kede gi apat, bala kame cunye opwoyo.

⁵ Di Rwot oko waco na be,

⁶ “Mam ango atwero timo ne wun jo me Isirael gikame ngacwei agune otimo ne lobo me cwec? Bala kame lobo me cwec tie kede i akarunikin me ngacwec, kamanono da, wuda jo me Isirael itienu i akarunikin na.

⁷ I kare moroni atwero waco kop i kom ateker moroni arabo ajakanut moroni be, abino pute, arabo tuturo en piny, arabo muducaro en;

⁸ do ka ateker kame ango awaco kop i kome nono oko weko tim mege areco, ango abino loko tam na di ako weko timo can kame oudo aikere timo i kom gi.

⁹ Doko i kare moro ango atwero waco kop i kom ateker arabo ajakanut moro be abino gere arabo pite bala yat,

¹⁰ do ka eko timo gikarac i wanga i yore me dagi lubo kop na, ango abino loko tam na di ako weko timo gikaber kame oudo amito timo negi.

¹¹ Pi manono, nan wace jo me Yuda kede jo kame bedo Yerusalem be, ango atie cweno iik arac i kom gi, atie iikere me kelo can i kom gi. Wace gi kiwek tice gi areco di kiko temuno kuo gi kede tice gi.

¹² Ango angeo be gin kibino waco be, ‘Mano kony mere li! Wan girwa obino lubo gikame otieko iiko; ngat acelacel bino timo epali di eko timo gikarac bala kame cunye mito.’ ”

Jo Odagi Rwot

¹³ Rwot waco be, “Kong pepenyunu atekerin apat ka ngatamoro otieko winyo akodi gi noni. Jo me Isirael kame amaro otimo gikame jo neno di lworo ko mako gi.

¹⁴ Benyo, tie kare moro kame pii korumakin twero rwenyo kede ki lela me wi moru me Lebanon? Benyo, pii angic kame mol ki wi moru twero tuo?

¹⁵ Do jo nango wi gi otieko wil keda, kidonyo dunyo bubani ne rubangan me abe. Gin kigete i yongayo kame kipoore lubo, likame doko kitie lubo ekite me kuo gi ariki sek; gin kitie do lubo isokot mogo atitino, do weko yongayo alac.

¹⁶ Gin kitieko mino lobo gi odoko gikame neno mio jo lworo, gikame jo bino yisiro i kare dedede. Jo dedede abeo iye bedo kede lworo pi gikame kineno, kiko uro di kiyayango wi gi.

¹⁷ Abino sarakino gi i nyim jokwor gi, bala yamo me bad tetu kide kame buko asinge. I kare kame peko poto negi kede ango abino loko negi ngea do weko nyima.”

Iik Arac i kom Yeremia

¹⁸ Di jo oko waco be, “Bianu oporunu kop arac i kom Yeremia! Josaseredoti bino bedo tie nakanaka kame pwonyo wan, jo ariek da bino bedo tie kame mio wan tam, kede inabin kame rabo ne wa kop ka Rubanga da bino bedo tie. Bianu oretenu kop moro apek, di okounu dagi winyo kope mege da.”

¹⁹ Aso, ango ako lego be, “Okwe Rwot, winy gikame atie yamo, doko da winy gikame jokwor na tie yamo i koma.

²⁰ Benyo, gikaber koculo kede gikarac? Aso di gin kitieko kunyo na bur be apot iye. Kong yutuno kite kame ango abako kede doga i nyimi pirgi, tetekeny ikwany lilo ni tenge kibut gi.

²¹ Pi manono, nan in mi idwe gi toi kec; mi konek gi kede epima. Mi mon gi kei idwe gi, kede kiko doko apuserun; mi aumpuli nek cuo gi, kede oko neko awobe gi i yi.

²² Ngole angola cwano negi joyak, di dwilao me lworo ko winyere ki ude gi. Gin kitieko kunyo nango bur be apot iye, doko da kitieko ciko na obek pi maka.

²³ Rwot, aso di in ingeo iik gi me neka. Kur isasiro gikareco gi amoto weno tenge dub gi ki nyimi. Bwon gi iret gi piny di iko tic i kom gi i esawa kame itie kede gero.”