Yeremia 17 - Baibuli I Leb Kumam 2013

Dub kede Alola me Yuda

¹ Rwot waco be, “Jo me Yuda, kowandiko dub wu kede kalamu kame kocweo kede ayon; kogiro gi i cunyu kede i kom iswongen me alutarin wu kede lilim abit kame kocweo kede nyonyo dayamon.

² Wun iworunu rubangan apat i alutarin, kede i ipirin kame kosipo pi bedo rubanga adako anyinge Asera i nget yen dedede koduko, i wi imukuran,

³ kede i wi mori atie obar. Abar wu kede jamini wu apirgi tek ango abino mino koyako pi dub kame itimunu i lobo wu dedede.

⁴ Pi tim wu, ibinunu kei lobo kame ango amio wu, di ako bino mino wu tic ne jokwor wu i lobo kalikame wun ingeunu; pien gero nango cal bala mac kame kocwinyo, en ebino liel nakanaka.”

Jo kame Rwot bino Mino Winyo kede Ilam

⁵ Rwot waco be, “Abino lamo jo kame lokere tenge kibuta, di kiko keto gen gi i kom jo ajoa, di kigengere i kom teko kame jo tie kede.

⁶ Jo nogo bino bedo bala yen atie i wi tim, yen kame dongo kakotuo gangagang, i lobo amunyomunyo kakame jo likame bedo iye. Likame tie gimoro aber kame bino timere ne jo nogo.

⁷ “Abino mino winyo but jo kame keto gen gi i koma.

⁸ Gin kical bala yen kame kopito i dog osamai; aliasin gi tuno i pii. Gin likame kitie kede lworo ka lieto obino, pien pote gin dong di numu; ka ceng orieny cutucutu gin likame kiparo, pien gin kimeede ameda nyako anyakini.

⁹ “Ngai kame karuno niang cuny dano? En ebedo gikame tie kede angalo kalamo gi dedede; ebedo gikame otapar.

¹⁰ Ango Rwot angingico tam me dano, doko atamo cuny dano; ako mino ngat acelacel gikame poore ne di lubere kede ekite me kuo mere, kede di lubere kede gikame etimo.”

¹¹ Dano audo sente i yore arac cal bala winyo abeko abeon kalikame obedo mege, di idwe nogo ko ringo weke. I diere me kare me kuo mere dano nono bino kei abar mere, di i ajikini en eko doko ngamingo.

¹² Abila wa kacil cal bala kabedo me pug kopong kede dwongo ka Rwot; en ebedo cungo i wi moru cako i agege.

¹³ Rwot, in en ibedo gen me Isirael. Jo dedede koweki kobino mino lewic mako gi. Jo dedede kame lokere tenge kibuti kobino wandiko nying gi i kabedo me jo oto, pien gin kiweki in Rwot ngat kame ibedo atan me pii amio kuo.

Yeremia Okwao Rwot pi Konye

¹⁴ Canga, Okwe Rwot, di ako cango; laka di ako bedo dano kame kotieko lako; pien in en ngat kame ango apako.

¹⁵ Jo waco na be, “Ani bo can kame Rwot owaco be bino poto ne wa? Kong ebin!”

¹⁶ Rwot, do ango gira likame abedo supi pi kelo can i kom gi; likame aparo i cunya be koto cengemoro peko opoto negi. Rwot, in ingeo gikame doga owaco; in itie kede niang iye.

¹⁷ Kur ibed ngat kame kelo na lworo; in en karingo nango i esawa me peko.

¹⁸ Mi lewic mak jo atidilo ango, do kur imi lewic maka. Mi cuny gin poti, do kur imi cunyango poti. Mi can poti i kom gi ceng moro di iko muducaro gi atwal atwala.

Kop i kom Gwoko Ceng Sabato

¹⁹ Rwot owaco na be, “Yeremia, oti icungi i Erute ka Jo, en erute kame abakai me Yuda beo kiye me donyo i bomba kede me wok ki bomba; di bobo iko ot i irutei dedede me Yerusalem

²⁰ di iko waco ne abakai, kede jo dedede me Yuda, kede ngat acelacel kame beo ki irutei nogi pi winyo kop kame ango atie waco.

²¹ Wace gi be pi gwoko kuo gi, miero kigwokere kur ngatamoro yei mugugu i ceng Sabato; doko da likame kipoore yeno gimoro donyo kede ki irutei me Yerusalem.

²² Doko da likame kipoore yeno gimoro wok kede ki ude gi i ceng Sabato, arabo timo tic moroni; do kipoore gwoko ceng Sabato bed cil bala kame bin ango aciko ne joakwari gi.

²³ Do joakwari gi bin likame oko yei winyo kop na amoto ciko iye yit gi; do gin kiko pongo na ngut gi di kiko dagi winyo amoto gamo pwony na.

²⁴ “Wace gi be ka gin kiwinyo kop na, di likame kiko yeno mugugu moro donyo kede ki irutei me bomba noni i ceng Sabato, do di kiko gwoko ceng Sabato obedo cil di likame kitimo iye tic moro,

²⁵ manono bino mino abakai kame lunyo kom ka Daudi me pug, karacel kede jotel ace kame donyo ki irutei me Yerusalem bedo tie nakanaka. Gin karacel kede jo me Yuda kede Yerusalem kibino ringo kede cabalan kede asigiran. Bomba me Yerusalem bino bedo culucul kede jo nakanaka.

²⁶ Jo bino wok ki bomban me Yuda, kede kabedere ace atie i nget Yerusalem; kibino wok ki adul me Benjamin, ki dud mori me bad tetu tim, ki lobo kobedo imukuran imukuran, kede ki bad tetu piny me Yuda. Kibino kelo i ot ka Rwot giamia kede giayala awanga, giamia me alos, odok angwe kur kede giamia me pwoc.

²⁷ Do ka gin likame kiyei lubo kop na, me gin gwoko ceng Sabato bedo di cil, kede me weko yeno mugugu moro beo kede ki irutei me Yerusalem i ceng Sabato, manono bino mino acwinyo mac i irutei me Yerusalem. Mac nono bino wango bomba kede apama atek kame kocele kede, doko likame kobino neke.”