Yeremia 15 - Baibuli I Leb Kumam 2013

Can bino Poto i kom Jo me Yuda

¹ Rwot oko waco na be, “Akadi koto di oudo Musa kede Samuel obino kan cungo i nyima kwana, koto likame ango abedo kede kisa i kom jogi. Cwai gi tenge ki nyima, mi gi kioti.

² Ka gin kipenyi tuai kame gin kibino ot iye, in ibino waco negi be ango awaco kaman: “Jo mogo koiko negi to me aumpuli, manono en kabeo gi! Jo mogo koiko negi to i yi, manono en kabeo gi! Jo mogo koiko negi to kec, manono en kabeo gi! Jo ace koiko be kobino tero gi bala mabus, manono en kabeo gi!

³ “Ango atieko moko be abino cwano ne jogi jamini areco ongwon: kobino neneko gi kede epima; igwogin bino ware kede kom gi; winy bino camo gi, kede da leini me obar bino camo gi.

⁴ Gikame ango abino timo negi bino mino jo me wi lobo neno gi di kiko bedo kede lworo; abino timo kamanono pi gikame Abaka Manase wot ka Esekia otimo Yerusalem i kare kame en oudo etie kede abaka me Yuda.”

⁵ Rwot waco be, “Ngai kame bino bedo kede kisa i komi, Okwe Yerusalem? Arabo ngai kame bino tururo piri? Ngai kame bino cungo kong pi penyo kite kame itie kede?

⁶ Wun itiekunu daga, ilokunu na ngei wu itienu ot tenge; manono en komio ango arieo cinga i komu di ako muducaro wu, pien atieko ol kede didio gero na.

⁷ I bomban dedede me lobo wu, ango asasaro wu bala cucung me kal kame kokwororo. Aneneko idwe wu, amuducaro wun jo na, pien likame iwekunu yote wu areco.

⁸ Apuserun tie i lobo wu atot kalamo asinge me dog nam. Aneko awobe wu apwodi tek di ako mino toti gi oneno can. Amio lworo kede cwercuny ongoole angola poto negi.

⁹ Dako konywalo idwe kanyaare owile; engamo doge omo wei. Kibute esawa me i dier iceng cal ne bala ceng otieko donyo; komio lewic omake kitek. Doko da abino mino jokwor neko jo apat kodong kibutu, ango Rwot en awaco.”

Yeremia obedo kede Ingungur but Rwot

¹⁰ Ango tin atie i can benyo! Pinyo komio toto na onywala i piny kan? Jo tie lok kede piem keda i lobo wa noni dedede. Ango likame akopao gira moro but ngatamoro, doko da likame tie ngatamoro kame ango akopao gire moro, do di jo dedede tie lama.

¹¹ Rwot, mi ilam kame gin kilama kede cobere kakare ka likame ango atio ni kiber, ka likame ango abako doga buti i kare kame jokwor na tie kede i peko kede cwercuny.

¹² (Likame tie ngatamoro kame twero turo lilim me ayon me bad tetu malo, ka konyale kede nyonyo buronsi.)

¹³ Rwot oko waco be, “Ango abino mino jokwor wu bino tero abar kede jamini wu apirgi tek, pi dub kame wun itimunu i lobo wu dedede.

¹⁴ Abino mino idonyunu timo ne jokwor wu tic i lobo kalikame ingeunu, pien gero nango cal bala mac kame kocwinyo, en ebino liel nakanaka.”

¹⁵ Ango ako waco be, “Okwe Rwot, in ingea kiber. Yutuno ango iko konya. Cul kwor i kom jo kame tie tidilo ango. Kur imeede kanyakino kede gi pien manono bino mino kineka; ngei kiber be ango atie kanyo ayet piri.

¹⁶ Ka kope nin otuno i yita, kidoko nango bala cam, di kiko kelo na kilel kede yomcuny; pien jo lwonga kede nyingi, Okwe Rwot, Rubanga me jo yi.

¹⁷ Ango likame atero kare na kede jo kame tie i bedo aber kede kilel. Pi kite kame kuo nango tie kede i akarunikin nin, ango ako bedo kena di ako bedo kede wangcuny i kom jo.

¹⁸ Pinyo komio aramo na likame jik? Pinyo komio bur na likame muketikin, pinyo komio edagi cango? Benyo imito bedo nango bala atan angalo jo angala, bala pii kame tuo i kare me oro?”

¹⁹ Rwot oko dwoko be, “Ka ilokere idwogo buta, ango abino gami bobo, di in iko bedo ngatic na. Ka in iyamo kope abeco kame tie kede kony, do weko yamo kope kame kony gi li, in ibino bedo ngat kame yamo akaka ango. Jo en kame bino dwogo buti, do weko in dok but gi.

²⁰ Ka kisuri, ango abino mini ibedo tek bala apama me cel kame kotimo kede nyonyo buronsi. Gin kibino yi kedi do likame kibino bwoni, pien ango abino bedo tie kedi pi gwoki kede pi konyi.

²¹ Ango abino laki ki cing jo atimo tim areco; abino mini ibwot kibut jo ager, ango Rwot en awaco.”