Yeremia 14 - Baibuli I Leb Kumam 2013

Ceng Orieny pi Kare Alac

¹ Rwot oko waco na kop i kom rieny me ceng pi kare alac be,

² “Yuda tie tururo, bomban mege tie totoun; jo mege buto piny kede cwercuny, doko da Yerusalem tie koko be konye.

³ Jo atie iye kobaro cwao jotic gi omo pii; gin kioto i akong do likame kiko twero udo pii; gin kidwogo kede agune gi abongo pii. Gin kiko umo wang gi pien udo wi gi odubere, doko lewic udo omako gi.

⁴ Kite kalikame kot ocwei kede di lobo oko tuo, lewic mako jopur di kiko donyo umo wang gi.

⁵ Akadi atil adako da weko atin mere apwodi titidi pien udo lum li.

⁶ Pundan me obar cungo i wi imukuran aler di kiko donyo titingo um gi supo piny bala ikween; wang gi doko mwadamwada pien udo lum kame kicamo li.

⁷ Jo na kok buta be, ‘Bed bala dub wa nyuto raco wa, kony wa, Okwe Rwot, pi nyingi. Wan otieko lokere tenge kibuti tien atot, wan odubo buti.

⁸ Okwe in ngat kame ibedo gen me Isirael, ngat kame lake i kare me peko, pinyo komio itie i lobo wa bala ngakumbor, bala dano atie i sapali kobeo pi buto iwor acel kenekene?

⁹ Pinyo komio itie bala dano moro kame wie ototolun, bala ngayi atek kalikame twero konyo dano? Do di in, Okwe Rwot, itie i diere wa, doko da kolwongo wan be jo nin; kur iwek wa!’ ”

¹⁰ Rwot owaco kop i kom jo nogi be, “Ateteni cuny gin obedo yom pi yai tenge kibuta, doko da likame kitweo asisa. Pi manono, ango abino yutuno gikarac kame gin kitimo di ako mino gi alola pi dub gi.”

¹¹ Rwot owaco na be, “Kur ileg buta pi ango konyo jogi.

¹² Akadi bed bala kilegi ilega me kanyo kec, likame ango abino winyo koko gi; akadi di gin kimia giayala awanga kede giayala me alos, likame ango abino gamo gi; do ango abino muducaro gi kede epima, kede kec, kede aumpuli.”

¹³ Di ango ako waco be, “Okwe Rwot! Inabin nogo ige kame oudo waco ne jo be, ‘Wun likame kobino neko wu, doko da likame kec moro bino bedo tie, do Rwot bino mino wu anapakin i lobo noni.’ ”

¹⁴ Di Rwot oko waco na be, “Inabin tie murao kop me abe i nyinga; likame ango acwao gi, doko da likame ango ayamo kede gi amoto ciko gi. Gin kitie waco ne wu gianyuta kobedo kop me abe; kope kame gin kiwaco be bino timere i kare me anyim obedo gikame kony gi li, gikame gin kiteto kede wi gi ken gi.

¹⁵ Pi manono, ango atie waco kop i kom inabin nogo, jo kame yamo i nyinga di likame ango acwao gi, di kiwaco ne jo be yi amoto kec likame bino poto i lobo noni, inabin nogo ango abino neko gi kede epima kede kec.

¹⁶ Jo kame gin kiwaco negi kope nogi da bino to iepone acel nono. Kobino lwolwomo kom gi i dier yote me Yerusalem, doko da likame tie ngatamoro kame bino yiko gi. Manoni bino timere i kom gin dedede, kiton i kom mon gi, awobe gi, kede anyira gi. Ango abino mino gi alola pi culo dub gi.”

¹⁷ Rwot oko waco na pi ot waco ne jo cwercuny kame atie kede be, “Poore pigewanga cweri iceng kede iwor, miero kur ajik koko; pien jo na kame amaro oudo twon apore, gin kiwanere kirac.

¹⁸ Ka aoto obar, aneno kom jo kame koneko kede epima. Ka adonyo i bomba, aneno jo kame kec odio. Inabin kede josaseredoti wire girgi timo tice gi, do likame kingeo gikame kitie timo.”

Jo Obako ne Rwot Dog gi

¹⁹ Rwot, benyo, itieko dagi Yuda atwal atwala? Benyo, cunyi dagi Sion? Pinyo komio iwanakino wa kitek ateka, awanon kalikame sobolo cango? Wan oudo otie geno pi udo mulem, do likame oko udo bero moro; oudo otie geno kare me cango peko wa, do oko lokere bedo kede lworo.

²⁰ Okwe Rwot, wan oyei be odubo, doko da joakwari wa odubo; wan odubo buti.

²¹ Pi gwoko nyingi, kur ibed kede acae i kom wa; kur ikel lewic i kabedo me dwongo, kakame in ipugo kiye, kur itur isikan kame itimo kede wa.

²² Likame tie caljwogi me atekerin apat kame twero cwano kot; doko da likame malo twero mino kot cwei en kene. Rwot mam in en Rubanga wa? Wan oketo gen wa buti, piento in en kame itimo gi nogi dedede.