Yeremia 13 - Baibuli I Leb Kumam 2013

Egoe Ameny kame Korwao i Pier

¹ Rwot oko waco na be, “Oti iwil egoe ameny kame korwao i pier di iko rwane i pieri, do kur irwake i pii.”

² Aso ango ako wilo egoe kame korwao i pier bala kame oudo Rwot owaco na, di ako rwane i piera.

³ Rwot bobo oko waco na tien me are be,

⁴ “Kwanyi egoe me pier kame nataman itie rwano no, di iko ot i ecilet me Eupurate di iko kane kakobarere me lela.”

⁵ Aso, ango ako ot di ako kane i nget ecilet me Eupurate bala kame oudo Rwot ociko na.

⁶ Ingei kare moro Rwot oko waco na be, “Nan oti i ecilet me Eupurate di iko omo egoe kame oudo ango aciki be ioti ikan kunono.”

⁷ Aso, ango ako dok kunono ako kunyo egoe nono di ako kwanye ki kakame oudo akane iye. Do ako udo be egoe nono oudo otieko dubere, kony mere oudo otieko doko li.

⁸ Di Rwot oko bobo yamo keda.

⁹ En ewaco na be, “Epone noni en kame ango abino tieko kede ewaka me jo me Yuda kede ewaka adwong me jo me Yerusalem.

¹⁰ Jo areco nogi odagi lubo kop nango. Gin kibedo kede epali di kiko donyo timo gikame cuny gi mito, di kiko donyo woro kede tic ne rubangan ace. Aso gida kibino doko cal bala egoe kame korwao i pier noni, egeo kame kony mere otieko doko li.

¹¹ Pien bala kame egoe kame korwao i pier lidere kede i pier dano, kamanono da ango oudo amio jo dedede me Isirael kede Yuda olidere i koma, tetekeny kibed jo na, di kiko kelo pak kede dwongo i nyinga. Do gin kiko dagi winyo kop na.”

Agune me Bwini

¹² Rwot oko waco na be, “Yeremia, oti iwac ne jo me Isirael be, ‘Rwot Rubanga me Isirael owaco be poore ipongunu agune wu me bwini dedede lubulub kede bwini.’ Gin kibino waco ni be, ‘Iparo be likame wan ongeo be opoore pongo agune me bwini dedede kede bwini?’

¹³ Di do in iko bino waco negi be ango Rwot ayapuno pongo wi jo dedede kame bedo i lobo noni kede bwini tuno gin mer: wi abakai ikwae ka Daudi, josaseredoti, inabin kede jo dedede kame bedo Yerusalem.

¹⁴ Di do ango ako bino mwomwoco gi bala agune, ngat acelacel i kom ngawote; jonywal kede idwe karacel, ango Rwot en awaco. Likame abino bedo kede cuny me kisa di ako weko neko gi.”

Yeremia Omio Ikwenyar i kom Ewaka

¹⁵ Jo me Isirael, Rwot oyamo. Cikunu yitu iwinyunu kop mere; kur ibedunu kede ewaka.

¹⁶ Miunu Rwot Rubanga wu dwongo di likame pwodi ekelo colo, di tienu ko gete i kom mori di piny warawara; di pwodi likame eloko lero kame nan wun igenunu odoko col acucucuc.

¹⁷ Do ka wun idagunu winyo kop, ango abino koko i mung pi ewaka wu; ango abino koko kitek di pigewanga ko mol, pien jokwor otieko tero jo ka Rwot bala mabus.

¹⁸ Rwot owaco na be, “Wace abaka kede toto mere kiwok piny ki komini gi me ajakanut, pien icoron gi acil me pug otieko popoto piny ki wi gi.

¹⁹ Jokwor otieko lukaro bomban kame tie i bad tetu piny me Yuda; likame tie ngatamoro kame twero donyo i yi gi. Kotieko mamako jo dedede me Yuda kotero gi obukui bala ipasoi.”

²⁰ Yerusalem, kong ting wangi di iko neno jo atie bino ki tetu malo. Ani bo romini kame oudo kogeni kede gwoko, gin en jo kame oudo in iwakere pirgi?

²¹ Ibino waco benyo ka jo kame oudo in itero be obedo jowoti obwoni di kiko donyo pugi? Mam ibino bedo kede aramo i cunyi bala dako atie ramere me nywal?

²² Ka in iko penyere be, “Kara pinyo komio gigi dedede tie timere nango?” Etimere kamanono pien dub ni do dwong adikinicel, en oko mino oelaro egoe ni di oko buto kedi tetek.

²³ Benyo, dano twero loko cal me del me kome, arabo erisa twero kwanyo kakolingulingun me kome? Likame twerere. Kamanono wuda likame itwerunu lokere weko timo gikarac di ikounu donyo timo gikaber.

²⁴ Rwot bino sasaro wu bala cucung kame yamo me wi tim buko.

²⁵ En ewaco be manoni obedo iner nin kame en etieko iiko piri, pien in wi owil kede en di iko keto gen ni i kom rubanga me abe.

²⁶ Rwot kikome en kame bino elaro egoe ni eumo kede wi di komi me lewic ko bino neno kakaler.

²⁷ En etieko neno tim wu aneno rac, tim wu me donyo woro rubangan apat bala kame dano timo kede adote, amoto bala kame asigira icuo dwilao kede pi mito dako; tim wu me malaya kame itimunu i wi imukuran abongo lewic. Okwe Yerusalem, can i wii! Ibino tero kare arom kamene di pwodi likame iloko tim ni odoko cil?