Yeremia 12 - Baibuli I Leb Kumam 2013

Yeremia Opepenyo Rwot

¹ Kame ango apido kedi, in Rwot, in ibino lona; do pwodi ango amito kelo pido na buti kamanono. Kara pinyo komio jo areco bedo i mulem? Pinyo komio gi dedede cobere kiber ne jo kalikame genere?

² In isipakino gi bala yat kame kopito, di kiko cweno aliasin; gin kidongo di kiko nyako anyakini. Gin nakanaka kiyamo kop aber i komi, do cuny gi bor kibuti.

³ Do Rwot, in ingeo ango; in itieko ngingico ango di iko pimo ka cunya tie i komi. Ware kede jo nogo bala romini kame kotie ot neko, pok gi ken gi kikur ceng me neko gi.

⁴ Kara pi kare arom kamene en kame lobo wa bino bedo kede di otuo, kede di lum da oner? Leini kede winy tie totoun pi dub me jo kame bedo iye, jo kame waco be, “Rubanga likame neno gikame wan otie timo.”

⁵ Rwot oko waco be, “Yeremia, ka ber iol rom kano pi ringo kede jo, do benyo benyo kame itwero piem kede asigiran? Ka ber in igete iko poto i kakaler, do benyo benyo kame in ibino twero ringo kede i kakoswapo me dog ecilet me Yorodan?

⁶ Akadi joawade ni, kiton jo me diakal ni obedo jo kame tie cati; gin kiwaco kope areco i komi. Kur iyei kope gi, bed bala kiyamo ni kope abeco.”

Cwercuny Rwot pi Jo mege

⁷ Rwot waco be, “Ango atieko weko oda Isirael, atieko dagi jo na kame ayero pi bedo mega. Atieko mino jo na kame cunya maro i cing jokwor gi.

⁸ Jo na kame ayero pi bedo mega olokere i koma bala engu atie i abum; gin kidorano nango; pi manono ango atieko dagi gi.

⁹ Jo na cal bala winyo kame ikengia olukaro suro ki bad dedede. Oti icok leini dedede me obar iko kelo gi kibin camo ringo.

¹⁰ Jopug atot me kumbor odudubo poto na me olok, gin kinyonyono poto na, kimio poto na koudo ber odoko bala wi tim.

¹¹ Gin kitieko mine edoko bala wi tim; etie do lobo akony mere li i nyima. Lobo nono dedede odoko wi tim, do likame tie ngatamoro aparo da.

¹² Joyak obino pi yako kabedere dedede atie i wi imukuran me wi tim; pien ango acwao yi pi dudubo lobo nono dedede, likame tie ngatamoro kame bino bedo kede anapakin.

¹³ Gin oudo kicuwo engano do okuto en oko lunyo dongo. Gin kicane tic kede teko, do likame kiko udo gimoro. Pi gero agwai kame ango atie kede, lewic bino mako gi pi kac atitidi kame kiudo.”

Cikere ka Rwot but Jokio me Isirael

¹⁴ Rwot waco kop i kom jo atimo tim areco kame kio kede jo mege me Isirael, jo kame odudubo lobo kame en emio jo mege be, “Abino kwanyo jo nogo ki lobo gi bala puto yat, di ako lako Yuda ki cing gi.

¹⁵ Do ingei ango kwanyo gi tenge, kisa bobo bino maka kede gi, di ako bino dwoko atekerin nogo dedede acelacel i lobo mere amake.

¹⁶ Ka i cen mere gin kiko keto cuny gi lubo edini ka jo na, di kiko pwonyere lairo i nyinga, bala kame gida oudo kipwonyo kede jo na lairo i nying Baal, manono bino mino gi kidonyo i kom jo na di kiko bedo kede mulem.

¹⁷ Do ka ateker moroni odagi lubo kop na, ango abino pute atwal atwala bala yat, di ako muducaro en, ango Rwot en awaco.”