Yakobo 5 - Baibuli I Leb Kumam 2013

Ikwenyar but Jo Kobaro

¹ Winyunu kong ber wun jo kobaro. Boroborunu koko pi can kame tie bino poto i komu.

² Abar wu otieko top, doko ajekel da otieko camo igoen wu.

³ Nyal otieko mako saabu kede siliba wu. Nyal nono en kame bino bedo gikame nyuto raco wu, doko ebino camo komu bala mac. Wun itiekunu coko abar i kare kanataman me ajikini.

⁴ Winyunu, jo kame otimo tic i poti wu tie koko pi egelit gi kame ingalunu gi ikounu dagi mino gi, doko koko me jo kame otimo tic me kac otieko tuno i yit Rwot me yi.

⁵ Wun ibedunu i kuo ajabajaba kede yomcuny i lobo kan; itiekunu do pito komu ikounu cwe, itienu do daro ceng me ngolo wu.

⁶ Wun ingolunu raco i wi dano kopoore ikounu giru neke; en likame ecere ne wu da.

Dire kede Ilega

⁷ Imiegu kede amiegu na kame amaro, direnu tuno i dwogo ka Rwot. Nenunu epone kame ngapur daro kede kodi mere kame epito i lobo, kodi kame cunye maro. En edire tuno kede di kot me agege kede kot me cen ocwei iye.

⁸ Wuda miero idirenu. Jingunu cunyu, pien dwogo ka Rwot odoko do iyapiyapi.

⁹ Jo na kame amaro, kur ibedunu kede ingungur i kom jowot wu, tetekeny kur ngol ne wu kop. Nenunu ngangolkop do tie cungo i dog ekeko!

¹⁰ Jo na kame amaro, terunu inabin kame bin oyamo i nying Rwot bala anyut me neno can kede me dire.

¹¹ Ateteni wan olwongo jo kame bin onyuto ikanyakin gi be jowinyo. Wun itiekunu winyo epone kame bin Yobu okanyakino kede, doko itiekunu neno adwokini me gikame Rwot oko timo ne, epone me mwolo kede cuny me kisa ka Rwot.

¹² Do akalamo mere, imiegu kede amiegu na, kur ilaironu di ikwongunu kede nying malo amoto kede nying lobo, arabo iepone me ikwong moro ace. Do ka iyeunu be “Ebo” wek da ebed ebo i ateteni, arabo ka iyamunu be “Li” wek da ebed li i ateteni, tetekeny kur ngol raco i wi wu.

¹³ Benyo, tie ngatamoro i diere wu kame tie neno can? Miero en ekwai Rubanga. Benyo, tie ngatamoro kame cunye yom? Poore ewer wer me pako Rubanga.

¹⁴ Benyo, tie ngatamoro i diere wu kame tuwo? Poore elwong joadongo me ekodet me jokirisito, di gin kiko lego ne di kiwire kede mo i nying Rwot.

¹⁵ Ilega kame kolego kede yei cango ngatuwo di Rwot ko mine eyai; doko kame oudo edubo, Rubanga bino sasiro en.

¹⁶ Pi mano, tucunu dub wu ngat acelacel but ngawote, doko ngat acelacel poore lego ne ngawote, me wek icangunu. Ilega me ngat kopoore tie kede twer doko etio.

¹⁷ Elia oudo obedo dano adana bala wan. En bin elego kitek be kur kot cwei, da di kot likame oko cwei i wi lobo pi mwakini adek kede dwete kanyape.

¹⁸ Di doko en eko lego di kot oko disaun ki malo, kodere kame oudo tie i wi lobo di oko cek.

¹⁹ Imiegu kede amiegu na, kame ngatamoro kikom wu oparao tenge ki kop me ateni, di dano ace oko dwoke,

²⁰ miero ingeunu be dano kame dwoko ngadubo ki yongayo arac bino lako kuo me ngadubo nono ki to, doko ebino umo dub mege atutututu.