Yakobo 2 - Baibuli I Leb Kumam 2013

Ikwenyar i kom Bedo kede Apokapoka

¹ Imiegu kede amiegu na, bala kame itiekunu yei kede Rwot wa Yesu Kirisito, en Rwot me deyo, kur doko ibedunu kede apokapoka moro but jo.

² Pien ka dano moro kame ongapo mwola kame meny me saabu, kede igoen abeco obino i kacokere wu, di ngacan da kongapo igoen arecoreco da oko bino,

³ di do wun ikounu paro pi won igoen abeco nono, di ikounu waco ne be, “Bia ibed kan,” do di ikounu waco ne ngacan be, “Cung kuno,” arabo be, “Bed piny katiena,”

⁴ mam mano udo ikelunu apokapoka i diere wu kenu, di ikounu doko jongolkop kame tie kede tam areco?

⁵ Winyunu, imiegu kede amiegu na kame amaro, mam Rubanga oyero jo kame jocan i piny kan pi bedo jo kame obaro i kop me yei kede jo kame bino donyo i Ajakanut kame en ecikere pi mino jo kame mare?

⁶ Do wun likame imiunu jocan wor. Mam jo kobaro en kame tie timo ne wu adiadia? Mam gin en kame kitero wu tetek ot pido wu?

⁷ Mam gin en kame kicao nying me awora kame oudo komio wu?

⁸ Ka ilubunu iswilia me Ajakanut ka Rubanga kame kowandiko i iwandik kacil be, “Mar ngakio ni bala kame imarere kede keni”, udo itimunu gikaber.

⁹ Do ka inyutunu apokapoka udo itimunu dub, doko iswil ngolo ne wu kop be wun jotur iswil.

¹⁰ Pien ngat kame gwoko iswilia dedede di eko turo acel, udo etieko turo gin dedede.

¹¹ Pien ngat kowaco be, “Kur itimo adote,” en kame doko owaco da be, “Kur ineko.” Aso ka in likame itimo adote do di ineko, udo ituro iswilia dedede.

¹² Aso yamunu, doko tiunu bala jo kame kobino ngolo ne gi kop di lubere kede iswil kame gonyo jo.

¹³ Pien Rubanga bino ngolo kop abongo cuny me kisa ne ngat kalikame nyuto ne jo apat cuny me kisa; do cuny me kisa dwong kalamo ngolo kop.

Yei abongo Tice udo Oto

¹⁴ Imiegu kede amiegu na, kony mere nyo ka dano waco be etie kede yei, do di likame etie kede tice kame nyuto yei nono? Iparunu be yei nono twero lake?

¹⁵ Ka omin wa amoto amin wa moro li kede egoe, doko di eli kede cam ceng dedede,

¹⁶ di do ngat acel kibutu ko waco ne be, “Ot kede mulem, kur koyo neki, kede cami iyengi,” abongo mine gikame mitere i kuo mere, udo kony mere nyo?

¹⁷ Pi mano, ka yei tie kene abongo tice mege, udo eto.

¹⁸ Do ngatamoro bino waco be, “In itie kede yei, do ango atie kede tice.” Aso nyut na yei ni abongo tice ni, di ada tice na ko bino nyuto ni yei na.

¹⁹ In iyei be Rubanga tie acel; mano itimo ber. Akadi jwogi da yei kamanono, doko di kom gi miel amiela.

²⁰ In ngamingo ni, imito nyut ni be yei abongo tice kony mere li?

²¹ Mam bin Rubanga otero Aburaam kwaru wa be ngat opoore pi tice mege, kakame bin eyalo kede wode Isaka i wi alutari?

²² Aso mam ineno be yei mere bin oupere karacel kede tice mege, doko tice mege en kame bin omio yei mere ocobere.

²³ Man oko mino iwandik kacil ocobere, kame waco be, “Aburaam oyei Rubanga di oko tero be epoore.” Manoni oko mino kolwonge be adieru me Rubanga.

²⁴ Aso, mam ineno be kotero dano be epoore pi tice mege, do likame pi yei kenekene.

²⁵ Iepone acel nono da, mam bin kotero Rakab, dako kame bin obedo malaya bala ngat kopoore pi tice mege, kakame egamo kede jo kame bin ooro di eko mino gi kilwi kilubo yongayo ace apat?

²⁶ Pien bala kame kom dano kame tie abongo tipo udo oto, kamanono da yei abongo tice udo oto.