Yai 8 - Baibuli I Leb Kumam 2013

Can me Are: Igwalogwalon

¹ Di Rwot oko waco ne Musa be, “Ot but Parao iko waco ne be Rwot owaco be, ‘Wek jo na yai tetekeny kiko wora.

² Do ka in idagi negi yai, ayaro mino igwalogwalon pongo lobo nin dedede bala alola.

³ Igwalogwalon bino pongo ecilet me Nail di kiko alamar kioto kiton i paco nin me Parao, i agola nin me buto, kiton i dud itanda nin, kede i ude me jotic nin adongo, kede i ude ka jo ni, kede i kenere ni kede i bakulin nin me nyongo alos me timo mugati.

⁴ Igwalogwalon bino sosomo i komi, kede i kom jo ni, kede i kom jotic ni.’ ”

⁵ Rwot oko waco ne Musa be, “Wace Aaron mak ebela mere di eko rieno bade i wi ecilet, kede isamai, kede i wi ataparin di eko mino igwalogwalon wok kakatek i wi lobo me Misiri.”

⁶ Aso, Aaron oko rieno bade i wi pie me Misiri, di igwalogwalon oko bwote ooko i lobo me Misiri.

⁷ Do jotim tangu me Misiri oko gida timo jwok gi di gida kiko timo gi acel nono, kimio igwalogwalon obwote i lobo me Misiri.

⁸ Di Parao oko lwongo Musa kede Aaron, di eko waco negi be, “Legunu but Rwot ekwany tenge igwalogwalon gi kibuta kede kibut jo na, di ango ako bino yei ne jo yai ot mino Rwot giayala.”

⁹ Musa oko waco ne Parao be, “Mano ber, ango ami wor me ciko esawa kame ango abino lego ni kede, kede jotic ni adongo, karacel kede jo ni, me tetekeny kwany igwalogwalon kibutu kede ki ude wu, di kiko dong i ecilet me Nail kenekene.”

¹⁰ Parao oko waco be, “Leg na diki.” Musa oko waco be, “Ango abino timo bala kame in iwaco, di in iko bino ngeno be likame bobo tie rubanga moro ace kame cal bala Rwot Rubanga wan.

¹¹ Igwalogwalon bino weki, kede ude ni, kede jotic ni adongo, karacel kede jo ni da; kibino dong i ecilet me Nail kenekene.”

¹² Di Musa kede Aaron oko yai oweko Parao, di Musa oko lego but Rubanga pi kwanyo igwalogwalon kame oudo ecwao ne Parao.

¹³ Rwot oko timo bala kame Musa okwao. Igwalogwalon oko totoun i yi ude, idiakale kede i poti.

¹⁴ Gin kiko coko gi i atukito di ngwece gi oko romo lobo nono.

¹⁵ Do kakame Parao oneno kede be piny mere odoko beber pien igwalogwalon otieko totoun, en bobo eko doko ngaepali di eko dagi winyo kop gi, bala kame oudo Rwot otieko waco.

Can me Adek: Omelu

¹⁶ Di Rwot oko waco ne Musa be, “Wac ne Aaron riei bade di eko juto piny kede ebela mere, tetekeny apua lokere dok omelu i lobo me Misiri lung.”

¹⁷ Gin kiko timo kamanono; Aaron otingo bade di eko juto piny kede ebela mere, di apua oko lokere odoko omelu i kabedere dedede me Misiri, di kiko nur i kom jo kede i kom leini.

¹⁸ Jotim tangu da oko gida timo jwok gi pi koto kelo omelu, do likame kiko twero. Omelu oudo oromo kom jo kede leini dedede.

¹⁹ Aso, jotim tangu oko waco ne Parao be, “Man obedo twer ka Rubanga!” Do Parao oudo odoko ngaepali, omio likame eko yei winyo kop ka Musa kede Aaron, bala kame oudo Rubanga otieko waco.

Can me Ongwon: Lwangini

²⁰ Rwot oko waco ne Musa be, “Yai diki odiko di iko ot pi riamo kede Parao esawa kame en etie ot kede i ecilet odiko, di iko waco ne be Rwot owaco be, ‘Wek jo na yai tetekeny kioti kiwora.

²¹ Ka in idagi ne jo na yai, ango abino cwano ekodet me lwangini i komi, kede i kom jotic ni adongo kede i kom jo ni. Lwangini bino nur anura i ude me jo me Misiri, doko kibino umo pukupuk kabedere dedede me lobo gi da.

²² Do i ceng nono ango abino koono adul me Gosen, kakame jo na bedo iye, di ekodet me lwangini likame ko bino ot kuno, tetekeny in iko bino ngeno be ango Rwot atie tic i lobo noni.

²³ Abino nyuto apokapoka i diere me jo nango kede jo nin. Gianena noni bino timere diki.’ ”

²⁴ Rwot oko timo kamanono, di lwangini oko bwote i ot ka Parao kede i ude me jotic mege; lwangini oko dudubo lobo me Misiri dedede.

²⁵ Parao oko lwongo Musa kede Aaron di eko waco negi be, “Otunu imiunu Rubanga wu giayala, do timunu kamanono i lobo me Misiri kan.”

²⁶ Musa oko dwoko be, “Timo kamanono likame obedo gikame poore; pien giayala kame wan omio but Rwot Rubanga wa obedo gikame neno rac i wang jo me Misiri. Ka jo me Misiri oneno wan di otie mino giayala kobedo gikarac kibut gin, mam kibino didipo wa kede kide?

²⁷ Wan miero ooti sapali me ceng adek i wi tim di oko ot mino Rwot Rubanga wa giayala bala kame en etieko ciko ne wa.”

²⁸ Aso, Parao oko waco be, “Ango abino weko wu iotunu mino Rwot Rubanga wu giayala i wi tim kwanyo ka likame ibinunu ot kakabor. Leganu.”

²⁹ Musa oko dwoko be, “Cucuto di ango ayai kibuti abino kwano Rwot pi mino lwangini weki kede jotic ni, kede jo ni dedede; kur bobo ingal wa angala di iko gengo jo ot mino Rwot giayala.”

³⁰ Aso, Musa oko yai kibut Parao di eko lego but Rwot.

³¹ Rwot oko timo gikame Musa okwae; en ekwanyo tenge ekodet me lwangini kibut Parao kede jotic mege, kede kibut jo mege dedede, likame tie lwangini acel moro oko dong.

³² Do Parao oko bobo medere kede epali mere, eko dagi ne jo yai.