Yai 7 - Baibuli I Leb Kumam 2013

¹ Rwot oko waco ne Musa be, “Neningo, ango abino mini idoko bala Rubanga i but Parao, do omini Aaron ko bino bedo bala enabi nin.

² In ibino waco ne Aaron gi dedede kame ango aciki iye, di en eko bino waco ne Parao pi weko jo me Isirael yai tenge ki lobo mere.

^3-4 Do ango abino mino Parao bedo ngaekanya, di eko dagi winyo kope wu, akadi di ango atim gianena kede giaura atot i lobo me Misiri. Ingei manono ango ako bino kelo alola alit twatwal i kom jo me Misiri di ako telo jo na wok ki Misiri, jo me ekeko acelacel me anywali me Isirael di lubere aluba.

⁵ Jo me Misiri ko bino ngeno be, ango en Rwot, kakame ango abino tic kede twer na pi kelo can i kom jo me Misiri di ako kwanyo jo me Isirael ki lobo gi.”

⁶ Musa kede Aaron oko timo gikame Rwot ociko negi.

⁷ I kare kame kiyamo kede Parao, Musa oudo tie kede mwakini me dongo ot kanyauni, do Aaron oudo tie kede mwakini ot kanyauni kiwie adek.

Ebela ka Aaron

⁸ Rwot oko waco ne Musa kede Aaron be,

⁹ “Ka Parao owaco be, ‘Timunu giaura,’ in Musa ibino waco ne Aaron be, ‘Kwany ebela ni di iko uce piny i nyim Parao, di eko bino lokere edoko twol.’ ”

¹⁰ Aso, Musa kede Aaron oko ot but Parao di kiko timo bala kame Rwot oudo ociko negi; Aaron ouco ebela mere piny i nyim Parao kede jotic mege adongo, di eko lokere edoko twol.

¹¹ Parao oko lwongo jo mege angengeo piny kede imuroko; di jo atimo tangu nogi da oko timo kamanono kede diru gi.

¹² Ngat acelacel kibut gi ouco ebela mere piny di kiko lokere kidoko twole; do ebela ka Aaron oko mwonyo mergi.

¹³ Do Parao pwodi oko meede kanyo kop, eko dagi yei winyo kop gi, bala kame oudo Rwot otieko waco.

Can me Agege: Pii Odoko Remo

¹⁴ Di Rwot oko waco ne Musa be, “Parao ngaepali; en edagi weko jo oti.

¹⁵ Aso, otunu pi riamo kede en diki odiko, esawa kame en etie ot kede i ecilet me Nail; wun otunu ikounu cungo i dog ecilet kure di imako i cingi ebela kame oudo olokere odoko twol ca.

¹⁶ Di in iko bino waco ne be, ‘Rwot, Rubanga me Iburanian ocwaa buti pi waco ni be poore iwek jo mege yai oti, tetekeny kioti iwore i wi tim. Do tuno esawa noni in pwodi idagi yei.

¹⁷ Pi mano, Rwot owaco be gikame en eyaro timo bino mini ingeo be ateteni en ebedo Rwot. Neningo, ango abino juto pii me ecilet me Nail kede ebela kame tie i cinga ni, di pii ko bino lokere doko remo.

¹⁸ Aporogon kame tie i ecilet noni bino totoun, pii da bino doko ngwe, di jo me Misiri likame ko twero bino mato pii me ecilet noni.’ ”

¹⁹ Rwot oko waco ne Musa be, “Wace Aaron mak ebela mere di eko rieno bade i wi pie dedede me Misiri: i wi icileta, isamai kede ataparin mege, tetekeny pie nogo lokere dok remo; di remo ko bino romo lobo me Misiri dedede, kiton i yi yen kame kopao amoto ingaroi kame koroko me coko pii.”

²⁰ Di Musa kede Aaron oko timo bala kame Rwot ociko negi. I nyim Parao kede jotic mege adongo, Aaron oko tingo ebela mere malo di eko juto wi pii me ecilet, di pii dedede me ecilet oko lokere odoko remo.

²¹ Aporogon kame oudo tie i pii oko totoun di pii oko doko ngwe rac, omio jo me Misiri oudo likame twero mate. Remo oudo oromo lobo me Misiri dedede.

²² Do jotim tangu me Misiri oko gida timo jwok gi di gida kiko timo gi acel nono. Aso, Parao oko dong adonga kanyo kop kamanono, bala kame Rwot oudo otieko waco.

²³ Parao gire oko lokere eoto i ode, likame eko keto tam mere i kom gikame oudo otimere.

²⁴ Jo me Misiri oko donyo kukunyo dog ecilet me Nail pi mono pii me amata, pien oudo likame kitwero mato pii me ecilet.

²⁵ Ceng kanyaare oko kato ingei Rwot juto wi pii me ecilet me Nail.