Yai 6 - Baibuli I Leb Kumam 2013

¹ Rwot oko waco ne Musa be, “Nan ibino neno gikame abino timo ne Parao, abino tic kede twer na di en eko weko jo na yai, kom ebino riamo gi ariama pi yai ki lobo mere.”

Rubanga Olwongo Musa

² Rubanga oko waco ne Musa be, “Ango en Rwot.

³ Ango aneeno but Aburaam, Isaka kede Yakobo bala Rubanga Won Twer, do likame ango ako mino gi kingea kede nyinga kacil be Rwot.

⁴ Doko da ango ako timo kede gi isikan, di acikere pi mino gi lobo me Kanan, lobo kame nan kibedo iye bala jokumbor.

⁵ Doko da ango atieko winyo cur me jo me Isirael, jo kame jo me Misiri omio obedo ipasoi, di do nan ango ako yutuno isikan na.

⁶ Pi manono, oti iwace jo me Isirael be, ‘Ango en Rwot, abino gonyo wu ki tice atek kame jo me Misiri dio wu timo, di ako lako wu ki bedo ipasoi gi. Abino lako wu kede twer na adwong kame bino timo tice me aura pi mino gi alola.

⁷ Abino mino wu ibedunu jo na di ango ako bino bedo Rubanga wu. Ibinunu ngeno be ango en Rwot Rubanga wu, ngat kogonyo wu ki tice atek kame jo me Misiri dio wu timo.

⁸ Abino tero wu i lobo kame bin ango akwongere pi mino Aburaam, Isaka kede Yakobo, di ako bino mino wu lobo nono pi doko meru. Ango en Rwot.’ ”

⁹ Musa oko waco ne jo me Isirael kope nogi, do gin kiko dagi winyo kope mege pien cuny gi oudo odubere pi tic atek kame kotie dino gi timo, pien gin kibedo ipasoi.

¹⁰ Di Rwot oko waco ne Musa be,

¹¹ “Oti iwace Parao me Misiri pi weko jo me Isirael yai tenge ki lobo mere.”

¹² Do Musa oko waco ne Rwot be, “Ka ber jo me Isirael da odagi winyo kop na, benyo benyo kame Parao bino yei winyo kede kop na, ango ngat kalikame atwero yamo kiber?”

¹³ Rwot oko yamo kede Musa kede Aaron di eciko gi i kom kop amako jo me Isirael kede Parao me Misiri; en eciko gi pi kwanyo jo me Isirael ki Misiri.

Ekeko me Anywali ka Musa kede Aaron

¹⁴ Ruben, awobi kao ka Yakobo oudo tie kede awobe ongwon: Kanok, Palu, Keseroni kede Karami, gin kibedo joakwari me ikekon kame kocako kede nying gi.

¹⁵ Simeon oudo tie kede awobe kanyape: Jemuel, Yamin, Okad, Yakin, Sokar kede Saul, en wot ka dako me Kanan. Gin oudo kibedo joakwari me ikekon kame bin kocako kede nying gi.

¹⁶ Lebi oudo tie kede awobe adek: Gereson, Kokat kede Merari. Lebi bin oko bedo kuo pi mwakini tol acel kede ot adek kiwie kanyaare.

¹⁷ Geresom oko nywalo awobe are: Libini kede Simei; gida kiko bedo kede ikwae atot.

¹⁸ Awobe ka Kokat gin ige: Amuram, Isikar, Keburon kede Usiel. Kokat bin oko bedo kuo pi mwakini tol acel kede ot adek kiwie adek.

¹⁹ Merari oko nywalo awobe are: Makali kede Musi. Magonogi en bin obedo ikekon me jo Lebi kede ikwae gi.

²⁰ Amuram bin oko nyomo Yokebed amin me papa mere, di kiko nywalo Aaron kede Musa. Amuram bin oko bedo kuo pi mwakini tol acel kede ot adek kiwie kanyaare.

²¹ Isikar oko nywalo awobe adek: Kora, Nepeg kede Sikiri.

²² Usiel da oudo oko nywalo awobe adek: Misael, Elisapan kede Sitiri.

²³ Aaron bin oko nyomo Eliseba nyar ka Aminadab, en oudo ebedo amin me Nakason. Gin kiko nywalo Nadab, Abiku, Eleasar, kede Itamar.

²⁴ Kora bin oko nywalo awobe adek: Asir, Elikana kede Abiasap. Gin bin kiko bedo joakwari me ikekon kopopokun ki ateker ka Kora.

²⁵ Eleasar, wot ka Aaron oko nyomo nyako acel kikom anyira ka Putiel, di kiko nywalo Pinekasi. Magonogi oudo obedo jotel me ude kede ikekon me ateker me jo Lebi.

²⁶ Aaron kede Musa gin nogi en kame Rwot oudo owaco negi be, “Otunu iwotunu jo me Isirael ki Misiri.”

²⁷ Gin kibedo jo koudo ooto waco ne Parao me Misiri pi gonyo jo me Isirael.

Gikame Rwot Ociko ne Musa kede Aaron

²⁸ Kakame Rwot oyamo kede Musa i lobo me Misiri,

²⁹ en ewaco ne be, “Ango en Rwot; wac ne Parao me Misiri gi dedede kame ango awaco ni.”

³⁰ Do Musa oko dwoko be, “Ango ngat kalikame atwero yamo kiber, benyo benyo kame Parao twero winyo kede kop na?”