Yai 40 - Baibuli I Leb Kumam 2013

Gero Taberenakol kede Mine but Rwot

¹ Rwot oko waco ne Musa be,

² “I ceng me agege i duwe kame geo, in ibino gero taberenakol, Eema me ariamakin keda.

³ Ibino keto iye Sanduku me Isikan, di iko galao Sanduku me Isikan nono kede esuka me isenge.

⁴ Ibino kelo emesa di iko napo jamini mege; doko iko bino kelo gicibo etala di iko keto italan mege iye.

⁵ In ibino keto alutari kame kotimo kede saabu, alutari me wango odok angwe kur, i nyim Sanduku me Isikan, di iko liero esuka kame kogalao kede ekeko me taberenakol.

⁶ Ibino keto alutari me wango giayala i nyim ekeko me taberenakol, Eema me ariamakin keda,

⁷ di iko keto kalaya i dierediere me Eema nono kede alutari, iko keto pii iye.

⁸ Ibino timo cel rimaro diakal, di iko liero esuka me galao erute me diakal.

⁹ Di do in iko bino kwanyo mo me wir, di iko wiro kede taberenakol karacel kede jamini dedede kame tie iye, iko kwere kede jamini mege dedede, tetekeny edok gikacil.

¹⁰ Ibino bobo da wiro alutari me wango giayala karacel kede jamini me timo tic iye dedede, di iko kwero alutari nono, tetekeny ebed gikacil twatwal.

¹¹ Di bobo iko bino wiro kalaya kede gi me cibe, di iko kwere.

¹² “In ibino kelo Aaron kede awobe mege i nyim ekeko me Eema me ariamakin keda, di iko lwoko gi kede pii,

¹³ di iko ngapo ne Aaron igoen me ngasaseredoti, iko bino wire di iko kwere, tetekeny ekaruno timo nango tic bala ngasaseredoti.

¹⁴ Ibino kelo awobe mege di iko ngapo negi isatin abocoboco,

¹⁵ di iko wiro gi bala papa gi, tetekeny kikaruno timo nango tic bala josaseredoti. Awira noni bino mino gin karacel kede ikwae gi kibedo josaseredoti i kare dedede me anyim.”

¹⁶ Musa oko timo gi dedede bala kame oudo Rwot ociko ne.

¹⁷ I mwaka me are cako i kare kame gin bin kiko yai kede ki Misiri, i ceng me agege i duwe kame geo, gin kiko gero taberenakol.

¹⁸ Musa oko mino kogero taberenakol; en emio koketo agangeta mege, di oko sisipo ibaon me purem mere, kede oko keketo ari mege, di oko sisipo ipirin mege.

¹⁹ En eko mino kopeto gi me umo wi taberenakol, di oko dokakino bobo aum ace i wi manono, bala kame oudo Rwot ociko ne Musa.

²⁰ Di do Musa oko tero kide are kame oudo kowandiko iye cik tomon di eko keto gi i yi Sanduku me Isikan. Eko rwako atekai i yi alung me sanduku nono, di eko cibo kom me timo kisa i wie.

²¹ En eko keto Sanduku me Isikan i taberenakol, di eko liero esuka me isenge oko galao en, bala kame oudo Rwot ociko ne.

²² Musa oko keto emesa i yi taberenakol, i bad tetu malo mere, do ooko me isenge,

²³ di eko keto mugati kame koyalo but Rwot i wie, bala kame oudo Rwot ociko ne.

²⁴ En eko keto gicibo etala i yi taberenakol, i bad tetu piny mere, di epimere kede emesa,

²⁵ di eko cwicwinyo italan i nyim Rwot, bala kame oudo Rwot ociko ne.

²⁶ En eko keto alutari kame kotimo kede saabu i yi taberenakol, i nyim esuka me isenge,

²⁷ di eko wango odok angwe kur i wie, bala kame oudo Rwot ociko ne.

²⁸ En eko bobo liero esuka kame galao ekeko me taberenakol,

²⁹ di eko keto alutari me wango giayala i nyim ekeko mere. Eko mino giayala awanga kede giayala me alos i wi alutari nono, bala kame oudo Rwot ociko ne.

³⁰ Di eko keto kalaya me lwokere i dierediere me Eema me ariamakin kede Rwot kede alutari nono, di eko keto iye pii me lwokere.

³¹ Musa, Aaron, kede awobe mege oudo lwoko cing gi kede tien gi kanono

³² i kare dedede kame gin oudo kidonyo kede i Eema, kede kame gin kioto i alutari, bala kame oudo Rwot ociko.

³³ Musa oko timo cel me diakal rimaro taberenakol karacel kede alutari, di eko liero esuka kame galao erute me diakal. Aso, Musa bin oko tieko timo tice dedede.

Edou Oumo Eema me Ariamakin kede Rwot

³⁴ Di do edou oko umo Eema, di rieny me deyo ka Rwot oko romo yi taberenakol.

³⁵ Manono oko mino Musa likame oko karuno donyo i yi Eema.

³⁶ Nakanaka ka oudo kokwanyo edou ki taberenakol, jo me Isirael oudo ko yai kimeede kede ot;

³⁷ do ka oudo edou pwodi likame kokwanyo, gida likame oudo kiyai.

³⁸ I kare me irim gin lung, gin oudo kineno edou ka Rwot tie i wi taberenakol i isawan me i ceng, do iwor gin oudo kiko neno mac en kame liel i edou nono.