Yai 36 - Baibuli I Leb Kumam 2013

¹ “Basalel, Okoliab, kede jotic apat dedede kame Rwot otieko mino apiranut kede niang i kom epone me timo jamini dedede kame mitere pi gero kabedo kacil, bino timo gi dedede bala kame Rwot otieko ciko.”

Jo Otero Giamia Atot

² Musa di do oko lwongo Basalel, Okoliab kede jotic apat dedede kame Rwot oudo omio apiranut, jo dedede kame oudo owinyo i cuny gi pi bino timo tic;

³ Musa di oko mino gin giamia dedede kame oudo jo me Isirael otero bute me timo tic me Eema kacil. Jo me Isirael oko meede kede tero giamia gi but Musa buli odiko.

⁴ Manono oko mino jo dedede kame oudo tie timo tice me epone dedede me Eema kacil oko ot kuno, dano acelacel oweko tic mere,

⁵ di gin kiko waco ne Musa be, “Jo tie kelo jamini kame tot kalamo kame mitere pi timo tic kame Rwot ociko ne wa timo.”

⁶ Aso, Musa oko mino cik kame oko sarakino i kimere dedede be, “Likame poore ngatamoro bobo kelo gimoro bala giamia me gero Eema kacil.” Di oko do gengo jo kelo giamia gi;

⁷ pien jamini kame oudo jo otieko kelo oudo tot kalamo kame oudo mitere pi tieko tic.

Gero Taberenakol

⁸ Jo kame oudo ipirana kalamo jo icegun kikom jo kame oudo tie timo tic, en kame oko timo taberenakol. Gin kitime kede isukan tomon kame kotimo kede ausin ebululu ebululu, akwakwar kede kame kwar mere, di kotubuso kom gi kede cal me cerubim.

⁹ Boro me esuka acelacel oudo tie mita tomon kiwie are, kede laco mere oudo tie mita are.

¹⁰ Gin kiko kuno isukan kany kiribakino gi karacel, di bobo kiko timo kamanono da kede icegun kany kame oudo odong.

¹¹ Gin kiko dodolo egoe kame erangi mere ebululu ebululu di kiko kune ilak esuka me ooko me abunge acelacel.

¹² I lak abunge me agege, gin kiko dodolo egoe nono tien ot kany, di bobo kiko dodolo egoe me lak abunge me are da tien ot kany di kipimere kede me abunge me agege.

¹³ Gin kiko timo akod ot kany me saabu di kiko tic kede gi me ribakino abungeta me isukan nogo karacel; manono oko mino taberenakol oko bedo di etie kicel.

¹⁴ Di gin kiko timo isukan tomon kiwie acel kame kotimo kede yer me diegi, me umo taberenakol.

¹⁵ Gin kiko timo gi di kirorom, boro me esuka acelacel oudo tie mita tomon kiwie adek, kede laco gi oudo tie mita are.

¹⁶ Gin kiko kuno isukan kany iribakino gi karacel i abunge acel, kanyape kame oudo odong da gin kiko kuno kiribakino i abunge acel.

¹⁷ Di kiko kuno egoe kame kododolo tien ot kany i lak esuka me ooko i abunge acelacel.

¹⁸ Gin kiko timo akodeta ot kany me nyonyo buronsi pi ribakino abungeta are nogo, tetekeny kibed aum acel.

¹⁹ Gin bobo kiko timo ne Eema nono aum ace are, acel kame kotimo kede lau me oromo kame konyongo kede kame ume ki ooko kame kotimo kede emukule ace apwot.

²⁰ Di do kiko timo ne Taberenakol ibaon me yat akasia kame kiko sisipo me timo purem mere.

²¹ Boro me ebao acelacel me purem oudo tie puti tomon kiwie kany kede laco gi oudo romo puti are.

²² Ebao acelacel oudo tie kede tiene are me ribakino gi karacel; gin kiko timo kamanono kede ibaon dedede me purem me Taberenakol.

²³ Gin kiko timo ibaon me purem me taberenakol kaman: ibaon ot are kame kocibo i ngete kame dok i bad tetu piny;

²⁴ kede kiko timo da kede nyonyo siliba agangeta ot ongwon kame koketo i dud ibaon ot are nogo, agangeta are are i dud ebao acelacel me gango tiene are.

²⁵ Gin kiko timo ibaon ot are me purem pi keto i nget taberenakol tetu ocelu kame dok i bad tetu malo,

²⁶ kede agangeta ot ongwon kame kotimo kede nyonyo siliba. Kiko keto agangeta are are i dud ebao acelacel.

²⁷ Gin kiko timo ibaon kanyape pi keto i ngei taberenakol kame dok i bad tetu tim,

²⁸ kede kiko timo da bobo ibaon are me isondana me ngee.

²⁹ Ibaon me isondana nogi gin kiko mino opokere i tetu piny, do kiko ribere i wi gi malo, i alung me agege. Ibaon are me isondana nogo bin oko timo kamanoni.

³⁰ Manoni bin oko mino ibaon me purem me ngee oko bedo kanyauni, di dud ebao acelacel oudo tie kede agangeta are are kame kotimo kede siliba.

³¹ Gin kiko timo ari tomon kiwie kany me ebao me yat akasia, ari kany pi ibaon me purem me tetucel me taberenakol,

³² kede da bobo ari kany pi ibaon me purem tetu ocelu, kede bobo kany me purem me ngee, bad kame dok tetu tim.

³³ Ari me diere, kame beo i kor ibaon me purem, oudo rire yai ki lak taberenakol tetucel tuno tetu ocelu.

³⁴ Gin kiko puno ibaon me purem kede saabu di kiko keto negi alung kame kotimo kede saabu, me rwako ari. Ari nogo da oudo kopuo kede saabu.

³⁵ Gin kiko timo isenge kede egoe kame meny, kame oudo kotimo kede ausin me erangi ebululu ebululu, akwakwar, kede kame kwar, di kiko kuno iye cal me cerubim kede apiranut.

³⁶ Kiko timo ipirin ongwon me yat akasia pi tweno egoe me isenge, kiko puno gi kede saabu, di kiko guro akod kame kotimo kede saabu i kom gi. Di do kiko timo negi agangeta ongwon kame kotimo kede siliba.

³⁷ Gin kiko timo egoe kame pwot di emeny, me galao ekeko me Eema; kitime kede ausin me erangi ebululu ebululu, akwakwar, kede kame kwar di kiko tubuso en, kikue kede piso me cing.

³⁸ Kiko timo ne egoe me galao ekeko nono ipirin kany kame koguro akod i kom gi. Di gin kiko puno wi ipirin nogo kede saabu karacel kede atad gi da, kede kiko timo ne ipirin nogo agangeta kame kotimo kede nyonyo buronsi.