Yai 18 - Baibuli I Leb Kumam 2013

Yesero Owelao Musa

¹ Yesero, ngasaseredoti me Midian, ngat koudo obedo papa me dako ka Musa, oko winyo gi dedede kame Rubanga otimo ne Musa kede jo me Isirael, epone kame ewoto kede jo me Isirael ki Misiri.

² I kare kame Musa oudo odwoko kede Sipora dako mere turgi, Yesero oudo oko game paco,

³ en karacel kede awobe mege are. Nying awobi acel oudo Geresom (pien Musa oudo owaco be, “Ango abedo ngakumbor i lobo me obukui”),

⁴ kede awobi me are oudo nyinge Elieser (piento en ewaco be, “Rubanga ka papa na en okonya di eko laka likame Parao oneka”).

⁵ Yesero, papa me dako ka Musa oko ot i moru kacil i wi tim, kakame Musa oudo ogero iye kimere; en etero ne Musa awobe mege kede dako mere.

⁶ En oudo ecwao ne Musa kop awaco be, “Ango Yesero papa me dako ni, atie bino buti kelo ni dako ni kede awobe ni are.”

⁷ Musa oko yai ot siramo ore; eluro i nyime di eko mote kede amot me notere. Ngat acelacel kibut gi oko pepenyo ngawote yot kome, di do kiko donyo i eema ka Musa.

⁸ Musa oko tatamo ne Yesero gi dedede kame Rwot otimo ne Parao kede jo me Misiri pi lako jo me Isirael. Etatamo ne da peko dedede kame jo me Isirael oriamo kede i yongayo kede epone kame Rubanga oko lako gi kede.

⁹ Yesero oko lelo pi bero dedede kame Rwot otimo ne jo me Isirael, iepone me lako gi ki Misiri.

¹⁰ En ewaco be, “Pak bed but Rwot ngat kolako wu ki cing jo me Misiri kede ki cing Parao.

¹¹ Nan ango angeo be Rwot tek kalamo rubangan dedede, piento en elako jo ki cing jo me Misiri kakame gin oudo kitie kede tim me acae i kom jo me Isirael.”

¹² Yesero oko kelo giayala awanga kede mic mogo ace pi mino Rubanga; Aaron kede joadongo me Isirael oko ot camo giayala karacel kede papa me dako ka Musa i nyim Rubanga.

Koyero Jongolkop

¹³ Ceng alubo mere, Musa oko bedo winyo pido kede ngolo kop, di jo oko luke cako odiko tuno otieno.

¹⁴ Kakame Yesero or Musa oneno kede gikame Musa tie timo ne jo, en eko penye be, “Nyo ino kame in itie timo ne jo? Pinyo komio in itimo tic no keni di jo apat tie cungo luki cako odiko tuno otieno?”

¹⁵ Musa oko dwoko ne papa me dako mere be, “Pien jo bino buta pi udo niang kibut Rubanga.

¹⁶ Kame gin kitie kede lok moro, gin kibino buta di ango ako ngolo kop i diere gi, di ako mino gi kingeo iswilia kede pwony ka Rubanga.”

¹⁷ Yesero oko waco ne be, “Gikame in itie timo likame ber.

¹⁸ In karacel kede jogi dedede itienu udo olo adwong. Tic no tek twatwal, likame in itwero time keni.

¹⁹ Nan winy gikame ayaro waco ni, abino mini tam, di Rubanga ko bedo tie kedi. In ipoore cungo kawang jo i nyim Rubanga, doko da di itero pido gi i nyim Rubanga.

²⁰ Poore imi gi iswilia kede pwony ka Rubanga, di iko mino gi kingei epone kame kipoore bedo kede, kede da gikame kipoore timo.

²¹ Doko da poore iyer jo kame twero tic, jo kame lworo Rubanga kede kame genere, jo kame dagi ud me yore arac. Ket jo nogo bed jo kame telo jo tutumian, kede jo toli, kede jo ot kany, kede jo tomon.

²² Poore gin kibed bala jo kame ngolo ne jo kop i kare dedede; gin kipoore kelo pido atek dedede butin, do pido atitino gin kikaruno ngolo kop iye. Manono bino mino tic ni doko yoyot, pien udo gin kitie konyo kori.

²³ Ka in itimo kamanoni, bala kame Rubanga ociko ni kede, ibino meede timo tic abongo olo, doko da jo dedede bino dok i kabedo gi di kotieko dweko cuny gi.”

²⁴ Aso, Musa oko yei winyo tam kame Yesero omie di eko timo gi dedede kame kowaco ne.

²⁵ Musa oko yero jo kame twero tic kikom jo dedede me Isirael, di eko cibo gi bedo jotel me jo tutumian, jo toli, jo ot kany, kede jo tomon.

²⁶ Di do gin kiko bedo winyo pido di kingolo kop pi kare dedede. Gin oudo kitero pido atek but Musa, do pido atitino gin oudo kingolo kop iye.

²⁷ Musa oko peruno ore Yesero, di Yesero oko dok ture.