Yai 16 - Baibuli I Leb Kumam 2013

Emana kede Aluru

¹ Jo dedede me Isirael oko yai ki Elim; di do i ceng me tomon kiwie kany me duwe me are ingei yai ki Misiri, gin di kiko tuno i wi tim kame kolwongo be Sin, kame tie i dierediere me Elim kede Sinai.

² Jo dedede me Isirael oko bedo kede ingungur but Musa kede Aaron i wi tim

³ di kiwaco negi be, “Oudo koto eber ka Rwot oudo oneko wa i lobo me Misiri. Pien ki kuno wan oudo girwa obedo piny di ringo twak i agune, doko dano oudo camo kwon paka rome. Do wun nan ikelunu wa i wi tim kan pi mino wa to kec.”

⁴ Rwot oko waco ne Musa be, “Ango abino mino mugati cwei ne wu ki malo; ceng acelacel jo bino coko mugati kame kibino camo ceng nono paka tiek. Iepone nono ango abino tamo gi ka kibino lubo cik na amoto li.

⁵ I ceng me kanyape mere, gin kibino coko emana di kiko tedo cam, kipoore coko emana kame tot tien are kalamo emana kame oudo kibedo coko i ceng apat.”

⁶ Aso, Musa kede Aaron oko waco ne jo dedede me Isirael be, “Otieno me tin ibinunu ngeno be Rwot en kowoto wu ki lobo me Misiri.

⁷ Diki odiko ibinunu neno deyo ka Rwot, piento en etieko winyo ingungur wu i kome. Kara wan obedo alu en kamio ibedunu kede ingungur i kom wa?”

⁸ Musa oko waco be, “Rwot en kame bino mino wu ringo me acama otieno kede mugati kame romo wu odiko, piento en etieko winyo ingungur kame itienu kede i kome. Pien kame wun itienu kede ingungur moro i kom wan, udo itienu kede ingungur i kom Rwot.”

⁹ Musa oko waco ne Aaron be, “Wace jo dedede me Isirael kibin kicungi i nyim Rwot, piento en etieko winyo ingungur gi.”

¹⁰ Kakame Aaron ocoko kede jo dedede me Isirael di etie yamo kede gi, gin kiko neno bad me wi tim di kiko neno rieny me deyo ka Rwot di tie i edou.

¹¹ Rwot oko waco ne Musa be,

¹² “Ango atieko winyo ingungur me jo me Isirael. Wace gi be otieno di ceng tie donyo kibino bedo tie kede ringo me acama, di kiko bedo tie kede mugati kame romo gi odiko. Di gin kiko bino ngeno be, ango en Rwot Rubanga gi.”

¹³ Otieno di piny oyuto, aluru oko bwote di kiko umo kakame oudo gin kigero iye kimere gi; odiko di piny oru toyo oko mwono kanono.

¹⁴ Do esawa kame toyo otieko tengere kede, gimoro ayoyom oko dong i wi lobo kanono, aperepere di etitino.

¹⁵ Kakame jo me Isirael oneno kede gi nono, gin kiko donyo penyere ken gi ken gi be, “Nyo inononi?” Pien likame oudo gin kingeo be nyo inonono. Musa oko waco negi be, “Mano en mugati kame Rwot omio wu me acama.

¹⁶ Rwot ociko be ngat acelacel poore coko atot bala kame mitere ne; epoore coko awale are me emana ne buli dano di lubere kede wel me jo kame etie kede i ode.”

¹⁷ Jo me Isirael oko timo kamanono, jo mogo oko coko akalamo, do jo mogo oko coko kalikame romo.

¹⁸ Do kakame kipimo gi kede awalo, jo kame oudo ocoko akalamo oudo likame tie kede gimoro akalamo, doko da jo koudo ocoko kalikame romo oudo li kede rem moro.

¹⁹ Musa oko waco negi be, “Kur ngatamoro wek moro dong tuno diki odiko.”

²⁰ Do likame gin kiko yei winyo kop ka Musa, di jo mogo oko weko mogo odong paka odiko. Kakame piny oru kede magonogo oudo otieko top di kudiling odonyo iye. Musa oko doko ger negi.

²¹ Gin oudo kiko donyo coko gikame mitere negi buli odiko acelacel; do ka ceng oudo odoko kec, kodong i wi lobo oudo calar.

²² I ceng me kanyape oudo gin kicoko cam amako ceng are; awale ongwon pi dano acelacel. Jotel kame oudo tie me ekodet oko ot waco ne Musa kop nono,

²³ do Musa oko dwoko negi be, “Rwot ociko be diki obedo ceng adwong kame jo wei iye, en ceng Sabato kacil ka Rwot. Bulunu gikame imitunu bulo, doko da tedunu gikame imitunu tedo, di ikounu kano gi dedede kodong tuno diki odiko.”

²⁴ Aso, gin kiko kano gikame odong tuno odiko, bala kame Musa oudo owaco negi; di likame kudiling oko donyo iye amoto gin top.

²⁵ Musa oko waco negi be, “Camunu manoni tin, pien tin obedo ceng Sabato, en ceng kame kojalo ne Rwot kame jo wei iye, tin likame ibinunu udo giacama moro kame ibinunu depo.

²⁶ Wun ibinunu depo cam pi ceng kanyape, do i ceng me kanyaare mere, en ceng Sabato, likame cam moro bino bedo tie me adepa.”

²⁷ I ceng me kanyaare, jo mogo oko ot be koto ot depo, do likame kiko udo gimoro.

²⁸ Rwot oko waco ne Musa be, “Ibinunu dagi winyo cik na kede kop na tuno awene?

²⁹ Nenunu, ango Rwot atieko mino wu ceng Sabato me wei, pi manono, i ceng me kanyape ango abino donyo mino wu cam amako ceng are. Ngat acelacel poore dong bedo kakame etie iye i ceng me kanyaare, likame epoore yai ot tenge.”

³⁰ Aso, jo oko donyo wei i ceng me kanyaare.

³¹ Jo me Isirael oko lwongo cam nono be emana; oudo ecal bala nyige atitino di tar, di ebilere emit bala kotime kede mokic.

³² Musa oko waco be, “Rwot owaco be, ‘Poore ikanunu awalo me emana moro ne ikwae wu me kare dedede, tetekeny gida kikaruno bino neno cam kame ango apito wu kede i wi tim, kakame akwanyo wu kede ki lobo me Misiri.’ ”

³³ Musa oko waco ne Aaron be, “Kwany gulu iko piko iye awale are me emana di iko cibe i nyim Rwot, tetekeny ebed me agwoka pi ikwae wu me kare dedede.”

³⁴ Bala kame Musa owaco kede, Aaron oko kete i nyim isikan, pi gwoke i kanono.

³⁵ Jo me Isirael oko meede camo emana pi mwakini ot ongwon, tuno i kare kame kituno kede i lobo me Kanan, kakame kiko bedo iye.

³⁶ Gipim kame oudo kotio kede i kare nono, kame oudo kolwongo be omer, oudo tero pii me lita ot are.