Yai 1 - Baibuli I Leb Kumam 2013

Kotero Jo me Isirael kirac i Misiri

¹ Magi en nying awobe ka Yakobo kame bin oupere kede ot Misiri, ngat acelacel kede jo me ode:

² Ruben, Simeon, Lebi, Yuda,

³ Isakar, Sebulun, Benjamin,

⁴ Dan, Naputali, Gad kede Aser.

⁵ Idwe kede ikwae ka Yakobo dedede bin tie ot kanyaare. Wode Yosepu oudo tie Misiri cuto.

⁶ Ingei kare moro Yosepu kede imiegu mege, kede jo apat dedede me lwak gi oko totoun.

⁷ Do ikwae gi, gin jo me Isirael, oudo nywal twatwal; gin kiko nyai di kiko doko tek, omio kiko pongo lobo me Misiri.

⁸ Di do abaka ace koudo likame ngeo Yosepu oko doko ngapug me Misiri.

⁹ En eko waco ne jo mege be, “Nenunu, jo me Isirael odoko tot twatwal, doko kitek kalamo wa.

¹⁰ Ka yi moro opoto, cengemogo kiromo konyo jokwor yi kede wa di do kiko yai kibwot ki lobo wa. Pi manono, poore ongolenu gi rieko moro.”

¹¹ Aso, jo me Misiri oko keto negi jo kame kwao ipasoi pi tidilo gi kede tic atek. Gin kiko gero ne Parao bomban me Pitom kede Rameses pi bedo bomban me kano cam.

¹² Do bed bala oudo kotie tero gi kirac, jo me Isirael oko medo nywal ameda di kiko medo sarakin i lobo nono, manono oko mino jo me Misiri obedo kede lworo i kom gi.

¹³ Jo me Misiri di oko do cako dino jo me Isirael tic kede gero,

¹⁴ di kimio gi kuo atek kede tic atek me nyono lobo, gono matapali kede tice ace apat me poto. Gin oudo kidio gi timo tice dedede kede gero.

¹⁵ Di Parao me Misiri oko waco ne mon acolo mon anywal me Iburanian, Sipira kede Pua be,

¹⁶ “Kame itienu colo mon me Iburanian, nekunu idwe awobe, do idwe anyira iwekunu.”

¹⁷ Do mon koudo colo jo nogo oudo lworo Rubanga, omio likame gin kiko yei lubo gikame Parao ociko negi, do gin kiko weko idwe awobe obedo kuo.

¹⁸ Aso Parao oko lwongo mon koudo colo jo nogo di eko penyo gi be, “Pinyo komio itienu timo kamano? Pinyo komio itienu weko idwe awobe dong kuo?”

¹⁹ Gin kiko dwoko ne be, “Mon me Iburanian likame cal bala mon me Misiri; gin kitek, manono mio gi kinywal di pwodi dano acolo gi likame otuno.”

²⁰ Aso Rubanga oko tero mon nogo kiber, di jo me Isirael oko nyai di kiko doko tek.

²¹ Kite kame mon koudo colo jo nogo oudo lworo kede Rubanga, omio Rubanga oko mino gi miere.

²² I cen mere Parao di oko mino jo mege dedede cik be, “Ucunu i yi ecilet me Nail idwe awobe dedede kame Iburanian nywalo, do wekunu idwe anyira dong kuo.”