Wer amit 7 - Baibuli I Leb Kumam 2013

Icuo

¹ Tieni tin cil i kalabanda benyo, in nyar ka abaka! Amuros ni ongwel di pwot, bala gikame ngatet won diru ocweo kede kidi me wel.

² Peni olukumikin bala awalo kalikame bwini angwe kur tiek kiye. Piny yii cal bala atukit me engano kame ature lili oluko.

³ Tune ni are cal bala itilio ibangin, bala amiem are.

⁴ Nguti cal bala gedo abor malo kame kotimo kede lak liec. Wangi cal bala ataparin atie i bomba me Kesibon, i nget erute me Bat Rabim. Umi cal bala gedo abor malo me Lebanon, kame neeno kede Damasiko.

⁵ Wii odiede bala moru me Kamel. Yer me wii col di kibocoboco di kimeny, cilo mere wao kiton cuny abaka.

⁶ In tin icil di ibus benyo; in mera me amara, nyako ayomo cunya!

⁷ In ibor di icil bala tugo, tune ni cal bala abunge me anyakini mege.

⁸ Ango abino yito i wi tugo nono di ako ngwedo anyakini mege. Kibuta tune ni tie bala abungeta ne anyakini me olok, wei ni tie na bala ngwece amit me olemo.

⁹ Noto dogi mit di winyiwinyi bala bwini kame beo i del dog dano kede i lake.

Dako

¹⁰ Ango abedo me opa na cunye tie i koma.

¹¹ Bia, opa na kame amaro, bia ooti i calo di oko buto kunono.

¹² Obino dilo yai ot neno olok, pi neno ka kicako lot, ka ature gi ocako ngamere, kede pi neno ka pomagurunet da ocako tuuro. Ango abino mini amara na i kunono.

¹³ Ature me yen me amara duny ngwe kur, doko anyakini abeco dedede tie i dog ekeko wa. Opa na me amara, ango abedo kano ni amara na cako sek tuno tin.