Wer amit 1 - Baibuli I Leb Kumam 2013

¹ Wer amit kalamo were dedede but Sulumani.

Wer me Agege Dako

² Kong not lema; amara ni ber kalamo bwini.

³ Mo ni me sut ngwe kur; nyingi iruo adikinicel; manono omio mon dedede mari.

⁴ Tera aupere kedi, oring aringa; bed abaka na di iko tera i agola ni. Wan obino kilel karacel piri, obino kilel pi amara ni kalamo bedo kede kilel pi bwini; mon likame mari me nono.

⁵ Mon me Yerusalem, ango acol di acil, acol bala iemai me wi tim me Kedar, do di acil bala isukan me galao agolai me paco ka Abaka Sulumani.

⁶ Kur inenanu kede acae be pien del koma col, pien lieto me ceng omia ayuikino. Imiegu na obedo ger keda di kiko mina tic me gwoko poto me olok, do likame ango ako gwoko poto nango me olok.

⁷ Wac na, in ngat kame cunya mari, tuai kame in ibino ot kwano romini ni iye? Tuai kame ibino mino gi kiurako iye i dier iceng? Pinyo miero ango aum wia di ako rimo piny moni i diere me romini me awotino ni?

Icuo

⁸ Benyo, likame ingeo kanono, in dako me amara i diere me mon? Lub amarin me romini di iko ot kwano diegi ni i nget iemai me jokwai romini.

⁹ In mera me amara, atwero poro cilo ni kede asigiran amon awao cabalan ka Parao.

¹⁰ Lemi cil piento itubuso gi kede mwolere, doko da nguti neno cil piento itubuso en kede bira kame koupo.

¹¹ Do obino timo ni mwolere me saabu di kolilingo gi kede nyonyo siliba.

Dako

¹² Kakame abaka na odedar kede i mamakoe mo kame asut kede oko duny ngwe kur.

¹³ Opa na me amara cal na bala isau me mo mura ka etie buto i tune na.

¹⁴ Opa na me amara cal bala ature angwe mit atuuro i poti me olok me Engedi.

Icuo

¹⁵ In tin icil benyo, apa na me amara; wangi cal bala me awele.

Dako

¹⁶ In icil adikinicel, opa na me amara; in iyomo cunya twatwal. Lum anumu atie dongo en kame bino bedo apien wa.

¹⁷ Yen seda en kame bino bedo atekai me ot wa, kede yen pain en kame bino galao wi ot i yie.