Wel 34 - Baibuli I Leb Kumam 2013

Ikor me Lobo

¹ Rwot bin oko waco ne Musa

² be ecik jo me Isirael be, “Ka wun ikounu donyo Kanan, i lobo kame ango atie mino wu pi doko meru, ikor wu bino bedo kaman:

³ Ikor wu ki bad tetu piny bino cakere ki wi tim me Siin i ikor me Edom. Ebino cakere ki bad tetu kide i tetu ajikini me Nam Oto.

⁴ Di eko manaro tetu piny eko ot tetu emukura me Akurabim di eko ot ebeo Siin ape tuno Kades Barenea i bad tetu piny. Kikano di eko ot etuno Kasar Adar di eko ngolo ot Asamon.

⁵ Ikor nono bino lokere ki Asamon di eko ot tuno i aditot atie i ikor me Misiri, di eko ot jik i nam me Mediterania.

⁶ “I bad tetu tim ikor wu bino bedo nam me Mediterania.

⁷ “I bad tetu malo ikor wu bino cakere ki nam me Mediterania, di eko ot i bad tetu kide tuno i moru me Kor.

⁸ Ki kuno eko ot tuno Lebo Kamat di eko meede paka ot jik Sedad.

⁹ Ki Sedad, ikor wu bino ot i bad tetu kide eko tuno Sipiron, di eko ot jik Kasar Enan.

¹⁰ “I bad tetu kide, i kor wu bino cakere ki Kasar Enan di eko ot tuno Sepam,

¹¹ di eko meede kikano eko ot tuno Ribula i bad tetu kide me Ain, di eko lor piny eko ot tuno i imukuran kame tie i bad tetu kide me nam me Galilaya.

¹² Ikor nono ko dok i bad tetu piny di eko ririo ecilet me Yorodan eko ot tuno i Nam Oto. “Magonogi en kame bino bedo ikor me lobo wu.”

¹³ Musa bin oko waco ne jo me Isirael be, “Manoni en lobo kame ibinunu gamo doko meru di iucunu alulu, lobo kame Rwot otieko ciko be mi but jo me ikekon kanyangon kede dul.

¹⁴ Jo me ikekon ka Ruben kede me ka Gad kotieko mino gi lobere gi, kede da dul me jo me ekeko ka Manase.

¹⁵ Gin kotieko mino gi lobere gi i bad tetu kide me ecilet me Yorodan, kakame pimere kede Jeriko.”

Jotel kame bino Popoko Lobo

¹⁶ Rwot oko waco ne Musa be,

¹⁷ “Magi en jo kame bino popoko lobo ne jo me Isirael: Eleasar ngasaseredoti kede Yosua wot ka Nun.

¹⁸ Ibino da kwanyo ngatel acel ki ekeko acelacel pi konyo gin popoko lobo.”

¹⁹ Nying jotel kame Rwot oko yero ige: I ekeko ka Yuda ibino kwanyo Kaleb wot ka Jepune.

²⁰ I ekeko ka Simeon ibino kwanyo Semuel wot ka Amikud.

²¹ I ekeko ka Benjamin ibino kwanyo Elidad wot ka Kisilon.

²² I ekeko ka Dan ibino kwanyo Buki wot ka Yogili.

²³ I ikekon me awobe ka Yosepu ibino kwanyo Kaniel wot ka Epod i ekeko ka Manase,

²⁴ kede Kemuel wot ka Sipitan i ekeko ka Epuraimu.

²⁵ I ekeko ka Sebulun ibino kwanyo Elisapan wot ka Paranak.

²⁶ I ekeko ka Isakar ibino kwanyo Palatiel wot ka Asan.

²⁷ I ekeko ka Aser ibino kwanyo Akikud wot ka Selomi.

²⁸ I ekeko ka Naputali ibino kwanyo Pedakel wot ka Amikud.

²⁹ Magonogi en jo kame bin Rwot ociko be kony Eleasar kede Yosua poko lobo me Kanan ne jo me Isirael.