Wel 30 - Baibuli I Leb Kumam 2013

Iswilia kame mako Kwongere

¹ Di do Musa bin oko waco ne jotel me ikekon me Isirael kaman: Gikame Rwot otieko ciko ine.

² Kame icuo moro okwongere but Rwot, arabo elairo pi timo ne Rwot gimoro, en likame ebino turo cikere mere; en ebino timo gi dedede kame en ewaco kede doge.

³ Kame aponga kame pwodi bedo i ot ka papa mere okwongere but Rwot, arabo etwere kene di ecikere pi timo ne Rwot gimoro,

⁴ di papa mere oko winyo kop me kwongere mere nono arabo cikere mere kame en etwere kede kene, di likame eko waco kop moro iye; en ebino timo gi dedede kame en ekwongere iye, kede cikere mere da kame en etwere kede kene en ebino cobo.

⁵ Do ka papa mere oko dagi kop mere nono i kare kame en ewinyo kede kop nono, likame tie kwongere mere moro, arabo cikere mere kame en etwere kede kene, kame en ebino timo; doko Rwot da bino sasiro en, piento papa mere likame oko yei kede kop mere nono.

⁶ Ka dako kalikame oudo konyomo okwongere, arabo oudo ewaco kop moro di likame eketo tam mere iye, kop kame oko mino en etwere kene, ka en eko nyomere,

⁷ di cware oko winyo kop me kwongere mere nono di likame eko waco ne kop moro i kare kame en ewinyo kede kop nono, en ebino timo gikame oudo ekwongere iye, doko cikere mere kame oudo en etwere kede kene, en ebino cobo.

⁸ Do ka cware oko dagi ne i kare kame en ewinyo kede kop me kwongere mere nono, en likame ebino gwoko kwongere nono, arabo cikere kame oudo en ewaco kede doge di likame eketo tam mere iye, cikere kame oudo en etwere kede kene; doko Rwot bino sasiro en.

⁹ Apuserut arabo dako kopokere kede cware miero gwok kwongere mege dedede kede gikame en ecikere iye pi timo ne Rwot.

¹⁰ Ka dako kame konyomo okwongere arabo etwere kene di elairo pi timo ne Rwot gimoro,

¹¹ di cware oko winyo kop me kwongere mere nono di likame eko waco ne kop moro iye, doko likame eko dagi ne i esawa kame en ewinyo kede kop nono, dako nono bino timo gikame ekwongere iye dedede, kede da cikere kame en oudo etwere kede kene.

¹² Do ka cware oko dagi ne timo gikame en oudo ekwongere iye nono i kare kame ewinyo kede kop me kwongere mere nono, en likame ebino gwoko kwongere mere nono, arabo gikame en oudo etwere kede kene di ecikere iye pi timo ne Rwot. Cware udo otieko genge, doko Rwot da bino sasiro en.

¹³ Cware tie kede twero me moko arabo gengo kwongere arabo cikere moro kame en oudo etimo.

¹⁴ Do ka cware owinyo kop me kwongere kame en oudo etimo, di eko ling likame ewaco kop moro iye tuno i ceng me are, kobino tero be en eyei kop me kwongere ka dako mere nono, arabo cikere kame dako mere oudo otimo, cikere kame poore ecobi; en udo etieko yei kop me kwongere nogo, piento en likame eko waco ne dako mere kop moro i esawa kame oudo ewinyo kede kope nogo.

¹⁵ Do ka en ewinyo kope nogo di eko tieko kare moro, i cen mere di en eko gengo dako mere timo gi nogo, en kikome kame miero raco me dagi timo gi nogo bed i wie.

¹⁶ Magonogi en iswilia kame bin Rwot omio Musa i kom kop kame mako icuo kede dako mere, papa kede nyare kobedo aponga apwodi bedo kede en i paco.