Wel 3 - Baibuli I Leb Kumam 2013

Awobe ka Aron

¹ I kare kame Rwot oyamo kede Musa i moru me Sinai, magi en oudo idwe ka Aaron kede Musa.

² Aaron oudo tie kede awobe ongwon: Nadab awobi kao, Abiku, Eleasar, kede Itamar.

³ En bin ewiro gi pi bedo josaseredoti.

⁴ Do Rwot bin oko neko Abiku kede Nadab kakame gin bin kitio kede mac kalikame oudo kociko negi me mino giayala i wi tim me Sinai. Gin oudo likame kitie kede idwe, omio Eleasar kede Itamar kenekene en oko tic bala josaseredoti i kare me kuo ka Aaron.

Koyero Jolebi pi Tic ne Josaseredoti

⁵ Rwot oko waco ne Musa be,

⁶ “Kel jo me ekeko ka Lebi kan, di iko cibo gi bedo jotic kame bino donyo konyo ngasaseredoti Aaron.

⁷ Gin kibino donyo timo nen kede ne jo dedede tic i Eema me ariamakin keda.

⁸ Jame dedede kame tie i Eema nono bino bedo i cing gin, doko da kibino donyo timo ne jo dedede me Isirael tic.

⁹ Tic kame komio gin Jolebi en konyo Aaron kede ikwae mege.

¹⁰ Do in ibino cibo Aaron kede awobe mege bedo josaseredoti; ngat apat kame bino tamo timo tic nono kobino neke.”

¹¹ Di Rwot oko bobo waco ne Musa be,

^12-13 “I kare kame bin ango aneko kede idwe kao dedede i lobo me Misiri, ango bin ako kwero idwe kao dedede me jo kede me leini i Isirael pi bedo mega amaka. Ango nan agamo Jolebi kikom jo me Isirael pi bedo aluny me idwe kao dedede kame kobedo mino buta i Isirael. Gin kibino bedo mega amaka. Ango en Rwot.”

Maro Wel me Jolebi

¹⁴ Rwot oko ciko Musa i wi tim me Sinai

¹⁵ pi wandiko Jolebi dedede di lubere kede ude ka joakwari gi kede miere gi, cako kibut atin awobi me duwe acel ot malo.

¹⁶ Musa oko wandiko nying gi bala kame Rwot oudo ociko ne.

¹⁷ Awobe ka Lebi gin ige: Gereson, Kokat kede Merari.

¹⁸ Awobe ka Gereson gin ige: Libini kede Simei.

¹⁹ Awobe ka Kokat gin ige: Amuram, Isikar, Keburon, kede Usiel.

²⁰ Awobe ka Merari gin ige: Makali kede Musi. Magonogi en ikekon me Jolebi di lubere kede joakwari gi.

²¹ Ekeko ka Gereson oudo tie iye jo me ot ka Libini kede jo me ot ka Simei.

²² Cuo dedede kame oko wandiko i diere gin cako ki atin awobi me duwe acel oko bedo tutumia kanyaare kede tol kany (7,500).

²³ Jo ka Gereson nogi oudo poore gero kimere gi i bad tetu tim cen ngei Eema,

²⁴ di Eliasap wot ka Lael en kame tie ngatel gi.

²⁵ Jo ka Gereson nogi tic gin i Eema me ariamakin kede Rwot oudo obedo gwoko aum me eema i yie kede aum mere me ooko, egoe agalao ekeko me donyo iye,

²⁶ isukan agalao diakal mere karacel kede egoe agalao kadonyo i diakal mere kede aunoi mege. Tice dedede amakere kede gi nogi oudo tie i cing gin.

²⁷ Ekeko ka Kokat oudo tie iye jo me ot ka Amuram, Isikar, Keburon kede jo me ot ka Usiel.

²⁸ Cuo dedede kame oko wandiko i diere gin cako ki atin awobi me duwe acel oko bedo tutumia kanyauni kede tol kanyape (8,600).

²⁹ Jo ka Kokat nogi oudo poore gero kimere gi i bad tetu piny me Eema,

³⁰ di Elisapan wot ka Usiel en kame tie ngatel gi.

³¹ Jo ka Kokat nogi tic gin oudo obedo gwoko Sanduku me Isikan, emesa, gicibo etala, alutarin, jamini kame josaseredoti tio kede i Kabedo Kacil, kede esuka kame galao kadonyo i Kabedo Kacil Kalamo. Tice dedede amakere kede gi nogi oudo tie i cing gin.

³² Eleasar wot ka Aaron ngasaseredoti oudo obedo ngadwong me jotel me Jolebi. En oudo tic mere neno jo kame timo tic i Kabedo Kacil.

³³ Ekeko ka Merari oudo tie iye jo me ot ka Makali kede Musi.

³⁴ Cuo dedede kame oko wandiko i diere gin cako ki atin awobi me duwe acel oko bedo tutumia kanyape kede tol are (6,200).

³⁵ Suriel wot ka Abikail en kame oudo poore telo jo ka Merari nogi; gin oudo kipoore gero kimere gi i bad tetu malo me Eema.

³⁶ Gin bin oko mino gi tic me gwoko atekai me Eema, ariin mege, ipirin mege, agangeta kede kadudupo gi. Tice dedede amakere kede gi nogi oudo tie i cing gin.

³⁷ Doko da oudo koketo i cing gi kop amako ipirin, agangeta, loce kede aunoi me gero diakal aluko Eema.

³⁸ Jo kame oudo poore gero kimere gi i nyim Eema i bad tetu kide oudo obedo Musa, Aaron kede awobe ka Aaron. Tice dedede kame oudo kotimo i Kabedo Kacil pi jo me Isirael oudo tie i cing gin. Dano ace apat kame oudo cako donyo timo tice amako gin nogo oudo kopoore neke.

³⁹ Cuo dedede kikom Jolebi kame Musa kede Aaron oko wandiko cako kibut idwe awobe me duwe acel ingei Rwot ciko negi pi timo kamanono, oko bedo tutumia ot are kiwie are (22,000).

Jolebi Olunyo Wang Idwe Awobe Kao

⁴⁰ Rwot oko waco ne Musa be, “Wandiko nying cuo kobedo kao cako kibut idwe me duwe acel dok malo, di iko maro gi.

⁴¹ Gin kibedo mega, do ango abino gamo Jolebi kawang gi pi bedo mega amaka, doko da abino gamo leini ka Jolebi kawang leini kobedo nywal me kao kikom leini me jo me Isirael.”

⁴² Aso Musa oko wandiko nying cuo kobedo kao dedede me Isirael bala kame Rwot oudo ociko ne,

⁴³ di wel gi cako kibut idwe me duwe acel oko tuno tutumia ot are kiwie are kede tol are kede ot kanyaare kiwie adek (22,273).

⁴⁴ Di Rwot oko waco ne Musa be,

⁴⁵ “Nan wek Jolebi luny wang cuo kao me Isirael di gin kiko doko mega, di leini gi da ko lunyo wang leini kobedo nywal kao me jo me Isirael. Ango en Rwot.

⁴⁶ Bala kame wel me cuo me Isirael kobedo nywal kao kalamo wel me Jolebi kede tol are kede ot kanyaare kiwie adek (273), kopoore lako magonogo alaka kibuta.

⁴⁷ Buli acelacel kikom gi kobino culo siliba akaya kany, di koporo kede gipim me Kabedo Kacil,

⁴⁸ di iko bino mino Aaron kede awobe mege sente nogo.”

⁴⁹ Aso Musa oko coko sente kame kolako kede jo kobedo nywal kao me Isirael tol are kede ot kanyaare kiwie adek nogo, jo koudo orem likame Jolebi olunyo kawang gi,

⁵⁰ di wel me sente nono oko tuno siliba akaya tutumia acel kede tol adek kede ot kanyape kiwie kany (1,365).

⁵¹ Di Musa oko mino sente nono but Aaron kede awobe mege bala kame oudo Rwot ociko ne kede.