Wel 23 - Baibuli I Leb Kumam 2013

¹ Di do Balaam oko waco ne Balak be, “Ger nango alutarin kanyaare kan, di iko iiko na twonin kanyaare kede imerekekin da kanyaare.”

² Balak oko timo bala kame oudo owaco ne, di en kede Balaam kiko mino giayala me twon kede emerekek i wi alutari acelacel.

³ Di do Balaam oko waco ne Balak be, “Dong kan i nget giayala awanga ni di ango ber aoto tenge. Cengemogo Rwot twero bino pi riamo keda. Gimoroni kenekene kame en enyuto na, ango abino waco ni.” Di en eko ot malo i wi emukura kakaler,

⁴ di Rubanga oko riamo kede. Balaam oko waco ne Rubanga be, “Ango atieko iiko alutarin kanyaare, doko atieko mino giayala me twon kede emerekek i wi alutari acelacel.”

⁵ Rwot oko waco ne Balaam kop kame miero ewaci, di eko dwoke but Balak pi waco ne kop nono.

⁶ Aso, en eko dok di eko udo Balak pwodi tie cungo i nget giayala awanga mere nono, en karacel kede jotel dedede me Moab.

⁷ Balaam oko waco agole mere kaman: “Balak otieko kela ki Aram, abaka me Moab okela ki mori me bad tetu kide. ‘Bia ilam na ikwae ka Yakobo. Bia ironkino jo me Isirael.’

⁸ Benyo benyo kame ango alamo kede jo kalikame Rubanga olamo? Arabo benyo benyo kame ango aronkino kede jo kalikame Rwot oronkino?

⁹ Ango atie neno gi ki wi lela, ango angio gi ki wi imukuran. Gin kibedo ateker kame bedo ken gi; gin likame kineno ateker gi bala ateker acel kikom atekerin.

¹⁰ Ngai kame twero maro wel me jo me Isirael, arabo maro dul acel i kom ongwon me wel me jo me Isirael? Mito ajikini na bed bala me dano kopoore, doko mito ango gira atoi bala en.”

¹¹ Di do Balak oko waco ne Balaam be, “Nyo ine kame in itimo nango? Ango oudo akeli pi lamo jokwor na, do in likame tie gimoro kame iko timo kwanyo lamo ne gin winyo.”

¹² En eko gamo be, “Benyo, mam in iparo be ango miero kur agwokere di ako waco gikame Rwot waco na kenekene?”

Imurai me Are ka Balaam

¹³ Di do Balak oko waco ne Balaam be, “Bia oot bobo kabedo ace, kakame in iromo neno gi kiye; ibino neno jo mogo anonok kenekene kikom gi, do likame gin dedede; di do in iko lamo nango gin ki kunono.”

¹⁴ Aso, en eko tere i poto me Sopim, i wi moru me Pisiga. Di eko bobo gero alutarin kanyaare, di eko mino giayala me twon kede emerekek i wi alutari acelacel.

¹⁵ Balaam oko waco ne Balak be, “Cung kan i nget giayala awanga ni, di ango ber aoto riamo kede Rwot kuca.”

¹⁶ Rwot oko riamo kede Balaam di eko waco ne gikame poore eyami, di eko dwoke but Balak pi waco ne kop mere.

¹⁷ Kakame en etuno kede but Balak, eude pwodi etie cungo i nget giayala awanga mere, en karacel kede jotel me Moab. Balak oko penye gikame Rwot oudo owaco.

¹⁸ Di do Balaam oko murao kaman: “Yai Balak, di iko winyo; winy kop na, Okwe wot ka Sipor.

¹⁹ Rubanga likame obedo dano, tetekeny eromo ngalo, en likame ebedo anywali me dano tetekeny eromo loko tam mere. Gi dedede kame en ecikere iye, en etimo; en eyamo kop di eko cobo timo da.

²⁰ Neningo, ango kotieko mina cik pi lamo winyo; en etieko mino winyo, doko ango likame akaruno loko.

²¹ Likame tie gimoro arac kame en eneno i kom ikwae ka Yakobo; likame eneno peko moro i kom jo me Isirael. Rwot Rubanga gi tie kede gi, gin kiwaco be en ebedo abaka gi.

²² Rubanga ngat kokelo gi ki Misiri, tek bala jobi kame yi pirgi.

²³ Ateteni likame tie tiet moro kame koromo timo i kom ikwae ka Yakobo; likame tie jwok moro kame koromo timo i kom jo me Isirael. Nataman do jo bino waco kop i kom jo me Isirael be, ‘Nenunu gikame Rubanga otieko timo!’

²⁴ Nenunu, jo me Isirael tie yai malo bala engu adako, kitingere bala engu! Likame ebuto piny tuno di etieko mwodo le kame emako di eko mato remo me le kame eneko.”

²⁵ Di do Balak oko waco ne Balaam be, “Kur do ilam gi, doko kur ilam negi winyo da.”

²⁶ Do Balaam oko waco ne Balak be, “Benyo, likame oudo awaco ni be, ‘Gikame Rwot waco en kame miero ango atimi’?”

Imurai ka Balaam me Adek

²⁷ Aso, Balak oko waco ne Balaam be, “Nan do bia, ango amito teri kabedo ace; cengemogo cuny Rubanga bino bedo yom di eko yei ne in lamo gin nango ki kunono.”

²⁸ Di Balak oko tero Balaam i wi moru me Peor, kame neeno kede wi tim.

²⁹ Balaam oko waco ne Balak be, “Ger nango alutarin kanyaare kan, di iko iiko na twonin kanyaare kede imerekekin da kanyaare.”

³⁰ Aso, Balak oko timo bala kame Balaam oudo owaco ne, di eko mino giayala me twon kede emerekek i wi alutari acelacel.